جاقىندا استانا قالاسىنىڭ «كونگرەسس حولل» كونتسەرت زالىندا رەسپۋبليكالىق «حالىق زاڭگەرى» اكتسياسى ءوتتى.
«پاراگراف» اقپاراتتىق-انىقتامالىق جۇيەسى مەن قالالىق سىبايلاس جەمقورلىققا قارسى ءىس-قيمىل دەپارتامەنتى بىرلەسىپ ۇيىمداستىرعان ءىس-شاراعا ەلىمىزگە كەڭىنەن تانىمال زاڭگەرلەر مەن ادۆوكاتتار قاتىستى.
بۇل كۇندەرى بەلسەندى توپ قۇرامىندا زاڭ عىلىمدارىنىڭ دوكتورى, استانا قالاسى كاسىپكەرلىك, زاڭ جانە قۇقىق ءتارتىبى قوعامدىق كەڭەسى كوميسسياسىنىڭ توراعاسى, پروفەسسور ەسبەرگەن الاۋحانوۆ, زاڭ عىلىمدارىنىڭ كانديداتى, ادۆوكات ايگۇل يسماعۇلوۆا, «كۋراتور» زاڭ پالاتاسىنىڭ زاڭگەر-كەڭەسشىسى اسەمگۇل دوسكەنوۆا جانە تاعى باسقا ادامدار حالىققا تەگىن زاڭدىق كومەك كورسەتتى.
زاڭ كەڭەسشىلەرى پالاتاسىنىڭ توراعاسى انۋاربەك ىسقاقوۆتىڭ ايتۋىنشا, ەلورداداعى اكتسيا كەزىندە زاڭگەرلەرگە نەگىزىنەن الەۋمەتتىك تۇرعىدا كوبىرەك ساۋال قويىلدى. اسىرەسە, اليمەنت تولەۋگە, جول-كولىك وقيعاسى كەزىندەگى شىعىندى وتەۋگە بايلانىستى سۇراقتار لەگى مول بولعان.
وسى كۇنى ورتا ەسەپپەن ءۇش جۇزدەن اسا ادام زاڭگەرلەر كومەگىنە جۇگىنىپتى. ماسەلەن, ەلوردا تۇرىعىندارى جۇلدىز وسپانوۆا سوتقا تالاپ-ارىزدى ساۋاتتى جازۋ جونىندە كومەك سۇراسا, ەرمەك قۇسپان وزىندەگى جىلجىمايتىن مۇلىكتى قالاي زاڭداستىرۋ جولدارى تۋرالى كەڭەس الدى.
– ءبىز بۇرىن اقشا تولەپ ادۆوكاتتارعا جۇگىنىپ جۇردىك. بىراق ولاردىڭ بەرگەن كەڭەستەرىنەن ماسەلەمىز كوپ شەشىلە قويعان جوق. ال مۇنداعى ماماندار تەگىن كومەك كورسەتىپ, جان-جاقتى كەڭەس بەرەدى. ەندى الداعى ۋاقىتتا وسى زاڭگەرلەرمەن اقىلداسا وتىرىپ جۇمىس ىستەيتىن بولامىز, – دەيدى ولار.
بۇكىل ەل بويىنشا ءبىر مەزگىلدە «حالىق زاڭگەرى» اكتسياسىن وتكىزىپ وتىرعان قازاقستان تۇڭعىش مەملەكەت كورىنەدى. جوبا الداعى ۋاقىتتا دا ودان ءارى جالعاسىن تاپپاق.
