بۇگىن استانا قالاسىندا جاڭادان اشىلعان №96 مەكتەپ-گيمنازياسىندا 250-گە جۋىق ءبىرىنشى سىنىپ وقۋشىسى مەكتەپ تابالدىرىعىن العاش رەت اتتادى. مەكتەپتىڭ ءبىر اۋىسىمدا 1200 وقۋشىنى, ەكى اۋىسىمدا 2400 وقۋشىنى قابىلدايتىن جوبالىق قۋاتى بار. وقىتۋ ەكى تىلدە جۇرگىزىلەدى. مۇندا ينكليۋزيۆتى ءبىلىم بەرۋ ءۇشىن بارلىق جاعداي جاسالعان.
استانا قالاسى ءماسليحاتىنىڭ توراعاسى ەرلان كاناليموۆ جاڭادان اشىلعان گيمنازيادا وتكەن سالتاناتتى ءىس-شاراعا قاتىستى.
– ارايلى جازدىڭ ءۇش ايىن مازمۇندى دا, ءماندى وتكىزىپ, ساعىنىشپەن التىن ۇيا مەكتەپتەرىنە ورالىپ وتىرعان وقۋشىلاردى جاڭا وقۋ جىلىمەن قۇتتىقتايمىن, – دەدى ول ءوز سوزىندە.
– مەكتەپتە مامانداندىرىلعان پاندىك كابينەتتەر, روبوتوتەحنيكا جانە STEM كابينەتتەرى, ينكليۋزيانى قولداۋ كابينەتتەرى, ەدش, كاسىپتىك دايىندىق كابينەتتەرى, وقۋ زالى بار كىتاپحانا, سپورت جانە اكت زالدارى, 400 ورىندىق اسحانا بار. «AMANAT» پارتياسى ەلوردالىق فيليالىنىڭ سايلاۋالدى باعدارلاماسىن ورىنداۋ بويىنشا جول كارتاسى اياسىندا 2027 جىلعا دەيىن 53 مەكتەپ سالۋ قاراستىرىلعان. ونىڭ 11-ءى بيىل سالىنادى. ولار الەۋمەتتىك نىسانداردىڭ قاجەتتىلىكتەرىن ەسكەرە وتىرىپ, قالانىڭ بارلىق اۋدانىندا ورنالاسقان. مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسىن ىسكە اسىرۋ باستالدى, ونىڭ شەڭبەرىندە 2025 جىلعا دەيىن ەلوردادا 90 000-عا جۋىق وقۋشى ورنىنا ارنالعان 24 مەكتەپ سالۋ جوسپارلانعان, – دەدى ە.كاناليموۆ جاڭا مەكتەپتىڭ اشىلۋ سالتاناتى كەزىندە.
2023-2024 وقۋ جىلىندا بەرىلەتىن 11 مەكتەپتىڭ ازىرگە 4-ەۋى اشىلدى, قالعانى وقۋ جىلىنىڭ سوڭىنا دەيىن پايدالانۋعا بەرىلمەك.
