رۋحانيات بەسىگى سانالاتىن كىتاپحانا ءىسىن دامىتۋدا كىتاپحاناشىلارعا ۇلكەن جاۋاپكەرشىلىك جۇكتەلەدى. سوندىقتان كىتاپحاناشىلار جان-جاقتى بولعانى دۇرىس. ەندىگى ۋاقىتتا كىتاپحاناشى ماماندىعىندا وقيتىندار جاڭا سالانى يگەرىپ شىعادى.
«كىتاپحاناشىلاردىڭ جالاقىسىن وسىرۋمەن قاتار اتالعان ماماندىققا جاڭا مازمۇن بەرۋ كەرەك دەپ ويلايمىز. كىتاپحاناشى تەك كىتاپ قورىن تۇگەندەپ, ونى وقىرمانعا تاۋىپ بەرەتىن عانا ەمەس, جان-جاقتى بولۋى كەرەك. مىسالى, كىتاپ ىزدەپ كەلگەن بالالار مەن جاستارعا باعىت-باعدار بەرە الۋى ءتيىس. سونىمەن قاتار IT-مامانداردى دا كىتاپحانا سالاسىنا تارتۋ ماڭىزدى» دەپ مالىمدەدى ءماجىلىس دەپۋتاتى جۇلدىز سۇلەيمەنوۆا Amanat پارتياسى الاڭىندا وتكەن ءباسپاسوز ءماسليحاتىندا.
حالىق قالاۋلىسىنىڭ ايتۋىنشا, وتاندىق كىتاپحانا سالاسى مەملەكەتتىك قولداۋ مەن ىلگەرىلەتۋدى كەرەك ەتەدى.
«ەلىمىزدە الداعى ۋاقىتتا كىتاپحاناشى ماماندىعىنا تاپشىلىق تۋىندايتىنىن ەسكەرە وتىرىپ, ءبىز گرانتتى 30 پايىزعا ارتتىرۋدى سۇرادىق. بۇل ماسەلە بيىلعى وقۋ جىلىندا شەشىلدى. تالداۋ ناتيجەسى كورسەتكەندەي, الداعى 3 جىلدا 6200 كىتاپحاناشى تاپشى بولادى. كەلەسى ماسەلە – كىتاپحاناشى-پەداگوگ نەمەسە پەداگوگ-كىتاپحاناشى دەگەن ماماندىق اشۋ. بۇعان قاتىستى مينيسترلىكتەن قاراستىرىپ جاتىرمىز دەگەن جاۋاپ كەلدى» دەيدى دەپۋتات.
بريفينگتە كىتاپحاناشى ماماندىعىنا بولىنەتىن مەملەكەتتىك گرانتتىڭ تولىق يگەرىلمەي قالاتىنى بەلگىلى بولدى.
«بۇگىندە ەلىمىزدە 120 جوعارى وقۋ ورنى بار. ونىڭ ىشىندە 14-ءى – اسكەري جانە ارنايى وقۋ ورىندارى. كىتاپحاناشى-پەداگوگ ماماندىعى بويىنشا رەەستردەن وتكىزدىك. اتالعان جاڭاشىلدىقتى بيىلدان باستاپ جۇزەگە اسىرايىن دەپ وتىرمىز. كىتاپحاناشى ماماندىعىنا بيىل باكالاۆرياتقا 100 گرانت, ال ماگيستراتۋراعا 20 جانە دوكتورانتۋراعا 3 گرانت ءبولىندى» دەدى عىلىم جانە جوعارى ءبىلىم مينيسترلىگى جوعارى بىلىمنەن كەيىنگى ءبىلىم كوميتەتى توراعاسىنىڭ ورىنباسارى بانىم ناربەكوۆا.
