ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ قازاق وركەسترى XXVI كونتسەرتتىك ماۋسىم شىمىلدىعىن قازاقتىڭ اتى اڭىزعا اينالعان كۇمىس كومەي ءانشىسى كۇلاش بايسەيىتوۆانىڭ 110 جىلدىعىنا ارنالعان «بۇلبۇل» اتتى كونتسەرتىمەن اشتى.
24 جاسىندا كسرو حالىق ءارتىسى اتانعان كۇلاش بايسەيىتوۆا – قازاق وپەراسىنىڭ نەگىزىن سالۋشىلاردىڭ ءبىرى, كسرو مەملەكەتتىك سىيلىعىنىڭ لاۋرەاتى. ونىڭ ونەردەگى ورنى تاريحقا التىن ارىپپەن جازىلدى. بۇلبۇل ءانشى بالا كەزىنەن حالىق اندەرىن تاماشا ورىنداۋمەن, بويىنداعى ارتىستىك شەبەرلىگىمەن كوزگە تۇسە باستادى. قامشىنىڭ سابىنداي قىسقا عانا عۇمىرىندا «قازاقتىڭ بۇلبۇلى» اتانعان تالانتتى ءانشى بۇگىنگى كۇنى ەل اۋزىندا قالعان اڭىز تۇلعانىڭ ءبىرى.
ول قازاقستاندىق جانە شەتەلدىك وپەرادا سان-قىرلى وبرازداردى سومدادى. سونىڭ ىشىندە ەۆگەني برۋسيلوۆسكيدىڭ «قىز جىبەك» وپەراسىندا جىبەكتىڭ, احمەت جۇبانوۆ پەن لاتيف ءحاميديدىڭ «اباي» وپەراسىندا اجار بەينەسىن, پەتر چايكوۆسكيدىڭ «ەۆگەني ونەگين», دجاكوما ءپۋچچيندىڭ «چيو-چيو سان» وپەراسىندا باستى رولدەردى وينادى. وسى رولدەر ارقىلى كۇلاش بايسەيىتوۆا كورەرمەننىڭ ىستىق ىقىلاسىنا بولەندى.
– بۇلبۇل ءانشى 1936 جىلى قازاق مادەنيەتىنىڭ ون كۇندىگىن وتكىزۋ ءۇشىن ەلىمىزدىڭ ونەرپازدارىمەن بىرگە ماسكەۋگە اتتانادى. ونىڭ ورىنداۋشىلىق شەبەرلىگى وتە جوعارى باعالانىپ, جەزتاڭداي ءانشىمىز كوپتىڭ قوشەمەتىنە بولەنگەن بولاتىن. كونتسەرتىمىزدى «بۇلبۇل» دەپ اتاۋىمىز بەكەر ەمەس, سەبەبى اسەم ءۇندى كۇلاش قالىڭ جۇرتشىلىققا «بۇلبۇل» ەسىمىمەن تاڭىلعان ەدى.
ونىڭ رەپەرتۋارى وتە كەڭ جانە باي. ءبىر كونتسەرت باعدارلاماسىندا بارلىق رەپەرتۋاردى ورىنداۋ مۇمكىن ەمەس. ول كۇي اناسى دينا شەشەيمەن وتە جاقسى قارىم-قاتىناستا بولعان. سول سەبەپتەن كونتسەرت باعدارلاماسى دينانىڭ «اسەم قوڭىر» كۇيىن ەنگىزدىك, – دەيدى قازاق وركەسترىنىڭ كوركەمدىك جەتەكشىسى-باس ديريجەرى, قازاقستاننىڭ ەڭبەك سىڭىرگەن قايراتكەرى, پروفەسسور ايتقالي جايىموۆ.
سونىمەن قاتار جامبىل جامباەۆتىڭ «كۇلاشقا» ءانى, ەۆگەني برۋسيلوۆسكيدىڭ «قىز جىبەك» وپەراسىنان «گاككۋ», لاتيف ءحاميديدىڭ «قازاق ءۆالسى» مەن «بۇلبۇل», مۇقان تولەباەۆتىڭ «ءبىرجان مەن سارا» وپەراسىنان ايتىس, «اباي» وپەراسىنان اجار ارياسى, «قىز جىبەك» وپەراسىنان «شەگەنىڭ تەرمەسى» ورىندالدى.
كۇلاش بايسەيىتوۆا قۇرمانعازى وركەسترىمەن تىعىز بايلانىستا ەدى. ولار العاشقى گاسترولدىك ساپارلارعا بىرگە بارعان. سونى ەسكەرە وتىرىپ, قۇرمانعازىنىڭ «سارىارقا» كۇيىمەن كونتسەرت اياقتالدى.
كونتسەرتتە قازاقستاننىڭ ەڭبەك سىڭىرگەن قايراتكەرلەرى ارايلىم راحىمقىزى, سۆەتلانا ايتباەۆا, سۇندەت بايعوجين, بيبىگۇل جانۇزاق, «دارىن» مەملەكەتتىك جاستار سىيلىعىنىڭ لاۋرەاتى التىنبەك ءابىلدا, حالىقارالىق جانە رەسپۋبليكالىق بايقاۋلاردىڭ لاۋرەاتتارى فەرۋزا راحمەتوۆا, ايگەرىم امانجولوۆا, ايگەرىم وراز, تالعات اللابيرينوۆ, بوتاگوز ءتاشىموۆا ونەر كورسەتتى.
