استانا قالاسى قوعامدىق كەڭەسىنىڭ وتىرىسىندا شاھاردىڭ جىلىتۋ ماۋسىمىنا دايىندىعى, وعان دايىندىق بارىسىندا جاسالعان جۇمىستار تۋرالى قالالىق وتىن-ەنەرگەتيكا كەشەنى جانە كوممۋنالدىق شارۋاشىلىق باسقارماسى باسشىسىنىڭ ورىنباسارى رۇستەم زاكارين باياندادى.
ونىڭ ايتۋىنشا, 1-جەو, 2-جەو, اۋداندىق قازاندىقتار, جىلۋ جەلىلەرى, ەلەكتر جەلىلەرى سەكىلدى ەنەرگيا كوزدەرىنىڭ جالپى دايىندىعى – 96 پايىز. ءبىلىم نىساندارى – 100 پايىز, دەنساۋلىق ساقتاۋ نىساندارى – 90 پايىز, مادەني نىساندار – 98 پايىز, ال تۇرعىن ۇيلەر 94 پايىز جىلىتۋ ماۋسىمىنا دايىن.
جىلىتۋ ماۋسىمىنا دايىندىق بارىسىندا 1-جەو-دا №4 جانە №9 سۋ جىلىتۋ قازاندىقتارى, 2-جەو-دا بىرىنشىدەن سەگىزىنشىگە دەيىن ەنەرگەتيكالىق قازاندىقتارى, بىرىنشىدەن التىنشىعا دەيىن تۋربواگرەگاتتار جانە №2, 3, 4 سۋ جىلىتۋ قازاندىقتارى جوندەلدى. قازىر 1-جەو جىلىتۋ ماۋسىمىنا تولىقتاي دايىن, ال 2-جەو-نىڭ دايىندىعى 96,1 پايىزدى قۇرايدى. مۇندا №5 قازاندىقتى كۇردەلى جوندەۋ جانە №4 تۋربواگرەگاتتى اعىمداعى جوندەۋ جۇرگىزىلىپ جاتىر. قازاندىق 15 قازاندا, تۋربواگرەگات وسى اپتانىڭ اياعىنا دەيىن جوندەلىپ ءبىتۋى ءتيىس.
جىلۋ-ەلەكتر ورتالىقتارىندا كومىر قورى – 492 مىڭ توننا, مازۋت – 3 مىڭ توننا. «پرومىشلەننىي», «پريگورودنىي», «ۋپتك», «جەلەزنودوروجنىي», «ميچۋرينو», «ينتەرناتسيونالنىي» تۇرعىن الاپتارىنداعى اۋداندىق قازاندىقتار دا وتىنمەن قامتاماسىز ەتىلدى.
«استانا-تەپلوترانزيت» اق-تىڭ جىلۋ جەلىلەرى 99 پايىزعا, «استانا-رەك» اق-تىڭ ەلەكتر جەلىلەرى 91,4 پايىزعا, «استانا سۋ ارناسى» مكك سۋ جەلىلەرى 100 پايىزعا, «استانا-ورنەك» جشس-ءتىڭ اۆتونومدى قازاندىقتارى 100 پايىزعا دايىن.
ەلوردانى گازداندىرۋ جالعاسىپ جاتقانىن ايتقان بايانداماشى گاز تاراتۋ جەلىلەرىنىڭ 680 شاقىرىمى سالىنعانىن جەتكىزدى. الماتى جانە سارىارقا اۋداندارىنداعى 10 تۇرعىن الاپتا گاز جەلىلەرى تولىعىمەن سالىندى. ناتيجەسىندە 200 مىڭ استانالىق گازبەن قامتۋ جۇيەسىنە قوسىلۋعا قول جەتكىزدى. بيىل بايقوڭىر جانە ەسىل اۋداندارىن گازداندىرۋ باستالدى. بۇگىندە 14 مىڭ ابونەنت گازعا قوسىلدى. 1-جەو جانە 2-جەو-داعى بارلىق 16 سۋ جىلىتۋ قازاندىقتارى گازعا كوشىرىلدى. 20 الەۋمەتتىك نىساندى گازعا قوسۋ جۇمىستارى اياقتالۋعا جاقىن.
ەلوردادا قازىر 14 ورىندا كومىر ساتۋمەن 8 نەگىزگى كومپانيا اينالىسادى. بارلىق كومپانيامەن باعانى وسىرمەۋ تۋرالى مەموراندۋم جاسالدى. جىلداعى جوسپارعا ساي قىركۇيەك-قاراشا ايلارىندا اي سايىن كومىردىڭ 70 مىڭ تونناسىن قالاعا جەتكىزۋ جوسپارى جاسالدى.
وتىرىس كۇن تارتىبىنە مەملەكەتتىك كورسەتىلەتىن قىزمەتتەردى جەتىلدىرۋ, استانا قالاسىنىڭ رامىزدەرىنە وزگەرىس ەنگىزۋ, پرەزيدەنت سايلاۋىنا بايلانىستى ۇمىتكەرلەرگە ۇگىت جۇمىستارىن جۇرگىزۋ ءۇشىن باسپا ماتەريالدارىن ورنالاستىرۋعا جانە سايلاۋشىلارمەن كەزدەسۋ ۇيىمداستىرۋعا ورىنداردى بەرۋ ماسەلەلەرى دە شىعارىلدى.
قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپتىڭ مالىمدەۋىنشە, قالانىڭ استانا دەپ قايتا اتالۋىنا بايلانىستى ەلوردانىڭ ەلتاڭباسى مەن تۋىنداعى «Nur-Sultan» دەگەن ءسوز «Astana» دەگەن سوزگە اۋىستىرىلادى. وزگەرىس سول عانا. ال استانا قالاسى اكىمى اپپاراتى باسشىسىنىڭ ورىنباسارى جاناسىل شاۋكەنتاەۆ قالا حالقىنىڭ ارتۋىنا بايلانىستى ۇمىتكەرلەردىڭ سايلاۋشىلارمەن كەزدەسۋ وتكىزۋ ورىندارى 60-تان 70-كە ارتقانىن جەتكىزدى.
