استانا قالاسى سارىارقا اۋدانىنداعى ينفراقۇرىلىمنىڭ باسىم بولىگى وتكەن عاسىردا سالىنعان. مۇنداعى كوپ ۇيلەردىڭ ىرگەتاسى وسىدان 70-80 جىل بۇرىن قالانعان. سوندىقتان اۋدان اۋماعىنداعى ءۇيدى جوندەۋ ماسەلەلەرى – تۇرعىنداردى تولعاندىرعان باستى پروبلەمانىڭ ءبىرى بولىپ وتىر.
– بۇل جۇيەلى ماسەلەنى شەشۋ ءۇشىن قالادا «وركەن قالا» باعدارلاماسى اشىلعان بولاتىن. باعدارلاما بويىنشا تۇرعىندار مەملەكەتتەن پايىزسىز قاراجات الىپ, ايىنا ورتاشا ەسەپپەن 2000 تەڭگە تولەپ, ورتاق مۇلىكتەرىنە تولىقتاي جوندەۋ جۇرگىزە الادى, – دەدى اۋدان اكىمى ءجۇسىپ جۇماعۇلوۆ.
«وركەن قالا» باعدارلاماسىنا قاتىسا وتىرىپ, تۇرعىندار وزدەرىنىڭ تۇرعىن ءۇي كەشەنىنە كۇردەلى جوندەۋدى ءبولىپ-ءبولىپ جۇرگىزە الادى. باعدارلاما بويىنشا شاتىردى, قاسبەتتى, ليفتتەردى, كىرەبەرىستى, جەرتولەنى, سۋ قۇبىرىن, سۋ بۇرۋ, جىلۋمەن جابدىقتاۋ جەلىلەرىن, ياعني كوندومينيۋم وبەكتىسىنىڭ جالپىعا ورتاق مۇلكىن تولىقتاي جاڭارتۋعا بولادى.
باعدارلاما بويىنشا مەملەكەت تۇرعىن ءۇي كەشەنىن جوندەۋگە قاراجات بولەدى, سودان كەيىن اتالعان سوما مۇلىك يەلەرى اراسىندا بولىنەدى. وسىلايشا, تۇرعىندار ءبولىپ تولەۋدى راسىمدەيدى جانە ول پايىزسىز بولادى.
مەردىگەردى تۇرعىنداردىڭ وزدەرى تاڭدايدى جانە جالدايدى. ال مەردىگەردىڭ جۇمىسىن قابىلداۋعا «وركەن قالا» جشس, تۇرعىن ءۇي ينسپەكتسياسى, تەحنيكالىق جانە اۆتورلىق قاداعالاۋ, ءۇي كەڭەسى, ميب/جم/پيك توراعاسى جانە مەردىگەرلىك ۇيىم قاتىسادى.
باعدارلاماعا قاتىسۋ ءۇشىن پاتەر يەلەرى جينالىس وتكىزەدى جانە قايتارىمدى نەگىزدە كۇردەلى جوندەۋ جۇرگىزۋ تۋرالى شەشىم قابىلدايدى.
ءۇي قاسبەتى, شاتىر جابىنى, ينجەنەرلىك جەلىلەر, كىرەبەرىس, ليفتتەردى ءتيىمدى جوندەۋ جايىندا تولىعىراق اقپارات الۋ ءۇشىن رەسپۋبليكا داڭعىلى, 32 مەكەنجايعا كەلۋگە نەمەسە 24-93-53 تەلەفونى ارقىلى حابارلاسۋعا بولادى.
باعدارلامانى ىسكە اسىرۋ باستالعاننان بەرى اۋداننىڭ 46 ۇيىندە جوندەۋ جانە 20 ۇيدە كۇردەلى جوندەۋ جۇمىسى جۇرگىزىلدى. اعىمداعى جوندەۋ جۇمىستارى 26 ۇيدە جۇرگىزىلىپ, 83 ليفت اۋىستىرىلدى. الداعى جىلى 10 ۇيدە قاسبەت, شاتىر جوندەلەدى, ليفتىلەر, ينجەنەرلىك جەلىلەر اۋىستىرىلادى.
بايان اسىلبەكوۆا
