جارىسقا ەلىمىزگە مەملەكەتتىك ورگانداردىڭ باسشىلارى, بيزنەس قاۋىمداستىق وكىلدەرى, تانىمال ارتىستەر, سپورتشىلار مەن جۇگىرۋ كلۋبتارىنىڭ مۇشەلەرى قاتىستى. تاڭعى 06:00-دە EXPO كەشەنىنىڭ ماڭىنا جينالعان جەلاياقتار اراسىندا استانا قالاسى اكىمىنىڭ ورىنباسارى ەرلان بەكمۇرزاەۆ تا بولدى.
مارافونشىلار مەرەكەسىن اشقان دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ:
– Astana Marathon-نىڭ تانىمالدىلىعى ارتىپ كەلەدى. بيىل الەمنىڭ 10-نان اسا ەلىنەن مارافونشىلار ارنايى كەلدى. ولار 10 جانە 42 شاقىرىمدى باعىندىرادى.
جۇگىرۋدىڭ پايداسى جانە ونىڭ اعزاعا اسەرى مول. سالاۋاتتى ءومىر سالتىنىڭ نەگىزى – ءجۇرۋ, ادىمداپ ءجۇرۋ, جۇگىرۋ جانە جۇگىرۋ كەزىندە ورىندالاتىن ءتۇرلى جاتتىعۋ. جۇگىرۋدى داعدىعا اينالدىرعان تۇرعىنداردىڭ سانى ارتا بەرسىن! – دەدى.
استانا قالاسى اكىمدىگىنىڭ قولداۋىمەن Astana Marathon Events كومانداسى سپورتتىق جارىستى ۇيىمداستىردى. 18 جاستان اسقان قاتىسۋشىلار 42,2 شاقىرىمعا, 16 جاستان جوعارى جەلاياقتار 10 شاقىرىمعا جۇگىردى. مارافون قاتىسۋشىلارى مەن قوناقتارى كوڭىل كوتەرەتىن باعدارلاما مەن فيتنەس جاتتىقتىرۋشىلار ۇيىمداستىرعان دەنە قىزدىراتىن جاتتىعۋعا قاتىستى. مارافونعا قاتىسۋشىلارعا ءار 5 شاقىرىم سايىن سۋ ۇسىنىلدى. 42,2 شاقىرىمعا جۇگىرگەن مارافونشىلارعا يزوتونيكالىق سۋسىندار بەرىلدى.
2018 جىلى Astana Marathon حالىقارالىق مارافوندار مەن جۇگىرۋلەر قاۋىمداستىعىنا (AIMS) كىردى. بۇل جارىس ورتا ازياداعى ەڭ تانىمال مارافونعا اينالدى. 2019 جىلى Astana Marathon World Athletics Bronze Label-ءدى جەڭىپ, ول الەمدىك اتلەتيكا ۇيىمى مويىنداعان ورتالىق ازياداعى العاشقى Label مارافونى بولدى. 2020 جىلدان باستاپ Astana Marathon Abbott World Marathon majors Wanda Age Group بىلىكتىلىگى جوعارى مارافونداردىڭ توبىنا كىردى.
جارىس قورىتىندىسى بويىنشا 42,2 شاقىرىمعا جۇگىرگەن ايەلدەر اراسىندا گۇلنۇر ەلەمەسوۆا مارەگە 3 ساعات 1 مينۋت 15 سەكۋندتا ءبىرىنشى كەلدى. ەكىنشى جانە ءۇشىنشى ورىندى ءاليا تۇرانوۆا (03:06:08) مەن اينۇر ماليكوۆا (03:10:45) ءوزارا ءبولىستى. ەرلەر اراسىنداعى مارافوندا وزبەكستاندىق نودير تانيەۆ ۇزدىك بولدى. ول 2 ساعات 39 مينۋت 20 سەكۋندتا مارە سىزىعىن كەسىپ ءوتتى. ودان ەكى مينۋت كەش كەلگەن استانالىق اكىم ەركەباي ەكىنشى ورىندى السا, ايدىن قاسەنگە (02:48:32) ءۇشىنشى ورىن بۇيىردى.
18-39 جاستاعى ايەلدەر اراسىندا نۇرشات ەسەنباەۆا, ەرلەر اراسىندا ماقسۇت شاريپوۆ دارالاندى. 40-44 جاس بويىنشا بيبىگۇل سۇلەيمەنوۆا مەن دانيار قاسىموۆ ۇزدىك شىقتى. 45-49 جاستاعى جەلاياقتار اراسىندا روزا بايمۋسينا مەن كيريلل سەرگەەۆ مارەگە ءبىرىنشى كەلدى. 50-54 جاس كاتەگورياسىندا – راديك حاسانوۆ, 55-59 جاس كاتەگورياسىندا – ۆالەنتينا تيتوۆسكايا, 60-64 جاس كاتەگورياسىندا – بايزاق تالاپنۇر, 65-69 جاس كاتەگورياسىندا ۆالەري كۋليكوۆ ءبىرىنشى ورىن الدى.
10 شاقىرىمعا جۇگىرگەن ايەلدەر اراسىندا ولگا ساۋپ (00:39:08), ەرلەر اراسىندا ءالىمجان بالتابەك (00:33:08) جەڭىسكە جەتتى.
– الدا قازاقستان چەمپيوناتى وتەدى, سوعان قاتىسامىن. بۇل جارىستا بابىمدى تەكسەردىم. ءوزىمنىڭ ەڭ ۇزدىك ناتيجەم – 31 مينۋت. رەكوردىمدى بۇزباسام دا, چەمپيون اتانعانىما قۋانىشتىمىن, – دەدى جارىس جەڭىمپازى ءالىمجان بالتابەك.
