قىركۇيەك ايى جاقىندادى دەگەنشە بالانى مەكتەپكە دايىنداۋ ءۇشىن اتا-انالار بىرەسە بازارعا بارىپ, بىرەسە ساۋدا ءۇيىن جاعالاپ, جارمەڭكەدەن ارزانداۋ بۇيىمداردى الۋعا تىرىسادى. اسىرەسە 3-4 بالاسى مەكتەپكە باراتىن وتباسىعا بالانى مەكتەپكە دايىنداۋ وڭاي ەمەس. ءبىر بالانى مەكتەپكە دايىنداۋ ءۇشىن اتا-انا قانشا قارجى جۇمسايتىنىن ءبىلۋ ماقساتىندا ەلوردا دۇكەندەرى مەن بازارلارىن ارالاپ شىققان ەدىك.
بازارداعى باعا
«استانالىق بازار» ساۋدا ءۇيى («ارتەم») جانىنداعى اشىق الاڭدا مەكتەپ جارمەڭكەسى بيىل دا اشىلدى. مۇندا كەلگەندە اتا-انالار بالالارىن مەكتەپكە دايىنداۋ قامىنا كىرىسىپ كەتكەنىن بايقادىق. ءار ساتۋشى ماڭىندا بىرنەشە ادامنان تۇر, تاڭداۋ بار. كيىمنىڭ ساپاسىنا قاراي باعاسى بەلگىلەنگەن. ماسەلەن, قىز بالاعا فورما 6000 تەڭگەدەن جوعارى, فارتۋك باعاسى 2500-3000 تەڭگە ارالىعىندا (بىلتىر 2000 تەڭگە). ۇل بالالارعا ارنالعان كوستيۋمنىڭ باعاسى – 23000 تەڭگە (بىلتىر 20000 تەڭگە). جەيدە 5500 ارالىعىندا (بىلتىر 4500 تەڭگە). ال گالستۋك 1500 تەڭگەدەن (بىلتىر 1000 تەڭگە). سپورت كوستيۋمىن 5 مىڭنان 10 مىڭ تەڭگەگە دەيىن الۋعا بولادى. كەڭسە تاۋارلارى ءبىراز قىمباتتاعان: كۇندەلىكتىڭ باعاسى بىلتىر 700 تەڭگە بولسا, بيىل 850 تەڭگە. 1 داپتەر 50 تەڭگەدەن (بۇرىن 40 تەڭگە), ءبىر جەردەن بارلىق كەڭسە تاۋارلارىن, وقۋ قۇرالدارىن الاتىن بولسا, جەڭىلدىك جاساپ, داپتەردى 40 تەڭگەدەن الۋعا بولادى. سومكە بىلتىر 5000-نان باستالاتىن, بيىل 6000-نان الۋعا بولادى. رەسەيدىڭ ريۋكزاكتارى 10-12 مىڭ تەڭگە ارالىعىندا. ءبىر وقۋشىعا وقۋ قۇرالدارىن الۋ كەمىندە 40-45 مىڭعا تۇسەدى. قىز بالا 25 مىڭ تەڭگەگە كيىنسە, ۇل بالا 40 مىڭعا مەكتەپكە بارۋعا دايىن بولادى. مۇنىڭ ءبارى – بىشكەكتەن, قىتايدان كەلگەن تاۋارلار, ال رەسەيلىك, تۇركيالىق كيىمدەر باعاسى بۇدان الدەقايدا جوعارى.
ساتۋشىلار ءبىر بالانى مەكتەپكە دايىنداۋ ءۇشىن بيىل ورتاشا ەسەپپەن 60-70 مىڭ تەڭگە (بىلتىر 50-60 مىڭ تەڭگە) كەرەك ەكەنىن ايتادى.
– 4 بالانىڭ اناسىمىن, ەكەۋى ەرەسەك, مەكتەپكە باراتىن ەكى بالامنىڭ جىل سايىن كەرەك-جاراعىن وسىلاي دايارلايمىن. بيىل كيەتىن كوستيۋم, فورمانى تاڭداپ الدىق, ەندى, مىنە, كەڭسە تاۋارلارىن ساتىپ الىپ تۇرمىن, بىلتىرعىدان ەداۋىر قىمباتتاپتى, – دەيدى كوپبالالى انا دانا قۋانىشەۆا.
دۇكەندە قانداي؟
كەڭسە تاۋارلارى دۇكەنىندە قارىنداش 1500 تەڭگەدەن, قالامدى 25 تەڭگەدەن, قاراپايىم قارىنداشتى 35 تەڭگەدەن, سۋرەت سالۋعا ارنالعان البومدى 135 تەڭگەدەن, سىزعىشتى 80 تەڭگەدەن باستاپ ساتىپ الۋعا بولادى. كىتاپتار مەن داپتەرلەرگە ارنالعان مۇقابا 175 تەڭگەدەن, كارتون 200 تەڭگەدەن, قايراعىش 50 تەڭگە تۇرسا, ەرمەكساز ءۇشىن 300 تەڭگە تولەيسىز.
سۋپەرماركەتتەگى باعالاردى قاراساق, قالامنىڭ باعاسى – 29 تەڭگەدەن, داپتەر – 29 تەڭگەدەن, قاراپايىم ءتۇرلى ءتۇستى قارىنداشتار – 199, ءتۇرلى ءتۇستى كارتون – 429, فلوماستەرلەر – 155, ۇشتاعىش – 99 تەڭگەدەن, ءتۇرلى قىلقالام – 369, بوياۋ – 259, گۋاش – 355, سۋرەت سالۋعا ارنالعان البومنىڭ باعاسى – 129 تەڭگەدەن.
بۇدان وزگە جۇمىسباستىلىعىنا بايلانىستى دۇكەندەر مەن جارمەڭكەلەرگە شىعا المايتىن اتا-انالارعا مەكتەپ تاۋارلارىن ساتىپ الۋدىڭ ونلاين-سەرۆيسى بار. وسى ارقىلى اتا-انا ينتەرنەت-پلاتفورمادا جەتكىزىلىممەن تاۋارلارعا تاپسىرىس بەرە الادى. ارينە, بىراق باعا ايتارلىقتاي جوعارى.
جارمەڭكەلەرى قاي جەردە؟
استاناداعى مەكتەپ جارمەڭكەلەرىن مىنا مەكەنجايدان تابا الاسىزدار:
– نۇرا اۋدانىنداعى تسيرك تۇراعى;
– بايقوڭىر اۋدانىنداعى «تۇلپار» ساۋدا ءۇيى الدىنداعى تۇراق;
– Demalys Promenade اللەياسى, ش.قوسشىعۇلۇلى كوشەسى, 14 – سارىارقا اۋدانىندا;
– ەسىل اۋدانىنداعى بوتانيكالىق باقتىڭ تۇراعى;
– الماتى اۋدانىندا – ابىلاي حان داڭعىلى, 20ا.
بالالارىن مەكتەپكە ساقاداي ساي ەتىپ دايارلاۋ – اتا-انا ءۇشىن جاۋاپتى ءىس. ءبىرى قالتاسىنا قاراي كوسىلسە, ەندى ءبىرى ءوز قالاۋىنا قاراي دايىندالادى. جىل سايىن داستۇرگە اينالعان رەسپۋبليكالىق «مەكتەپكە جول» شاراسىنىڭ شاراپاتى دا كوپتەگەن الەۋمەتتىك جاعىنان از قورعالعان وتباسىعا كومەگىن بەرىپ, سەپتىگىن تيگىزىپ جاتادى. كەلەسى اپتادا ساباق باستالادى. قالادا دا, اۋىلدا دا اتا-انالار, وقۋشىلار قىزۋ دايىندىق ۇستىندە.
