سوڭعى كۇندەرى ەلدە كوپ تالقىلانعان تاقىرىپتىڭ ءبىرى – رەسەيدەن كەلگەن كوش. استانا قالاسى اكىمدىگىنىڭ ونلاين ءباسپاسوز ءماسليحاتىندا وسى تۋراسىنداعى سۇراقتارعا جاۋاپ الدىق. سپيكەر رەتىندە استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب, پوليتسيا دەپارتامەنتى كوشى-قون قىزمەتى باسقارماسىنىڭ باستىعى ارمان بايمۇحامبەت جانە «ازاماتتارعا ارنالعان ۇكىمەت» مەملەكەتتىك كورپوراتسياسى» كە اق قالالىق فيليالى ديرەكتورىنىڭ ورىنباسارى دينارا قۋانىشەۆا قاتىستى.
– جىل باسىنان بەرى استانا قالاسىنا 29 مىڭ شەتەلدىڭ ازاماتى تىركەلدى. ونىڭ 4 مىڭى – رەسەيلىك ازامات. كوشى-قون زاڭناماسىن بۇزعان 5 مىڭنان اسا ازامات جاۋاپكەرشىلىككە تارتىلىپ, 867-ءسى ەلدەن شىعارىلدى. شەتەلدىكتەردى شاقىرىپ, ولاردىڭ ەلدە بولۋ ەرەجەسىن قامتاماسىز ەتپەگەن 1083 ادام اكىمشىلىك جاۋاپقا تارتىلدى. شەتەلدىك جۇمىس كۇشىن تارتۋ جانە پايدالانۋ ەرەجەسىن ساقتاماعان 93 جۇمىس بەرۋشى, تىركەۋ جانە قۇجاتتاندىرۋ ەرەجەسىن بۇزعان 2866 ازاماتقا شارا قولدانىلدى, – دەدى ارمان بايمۇحامبەت.
«كوشىپ كەلۋشىنىڭ قازاقستان رەسپۋبليكاسىنا كەلۋى مەن وندا بولۋى قاعيداسىنىڭ» 9-تارماعىنا سايكەس, شەتەلدىك ازامات ءۇش جۇمىس كۇن ىشىندە ىشكى ىستەر ورگانىنا حابارلاۋى مىندەتتى. ەگەر شەتەلدىك وسى مەرزىمدە تىركەلمەسە اكىمشىلىك قۇقىق بۇزۋشىلىق تۋرالى كودەكستىڭ 518-بابى بويىنشا جاۋاپقا تارتىلادى. زاڭدى تۇلعالار ءۇشىن 10-نان 25 ايلىق ەسەپتىك كورسەتكىشكە دەيىن, ال قايتالانعان جاعدايدا 100 ايلىق ەسەپتىك كورسەتكىشكە دەيىن ايىپپۇل سالىنادى. بۇل 306 مىڭ تەڭگەگە تەڭ. جەكە تۇلعالار ءۇشىن ەسكەرتۋ تۇرىندەگى جازا بەرىلەدى, ال قايتالاپ بۇزعان جاعدايدا 30 ايلىق ەسەپتىك كورسەتكىش نەمەسە 91 مىڭ تەڭگە مولشەرىندە ايىپپۇل تولەيدى.
ەلگە كەلگەن شەتەلدىكتەر حابارلامانى ءۇش تاسىلمەن بەرە الادى.
ءبىرىنشى, جەكە جانە زاڭدى تۇلعالار كوشىپ كەلۋشىنىڭ كەلگەنى تۋرالى ەلەكتروندىق ۆيزالىق جانە كوشى-قون پورتالى, ياعني vmp.gov.kz نەمەسە egov.kz. ارقىلى تىكەلەي حابارلاي الادى. ول ءۇشىن قازاقستاندىق تاراپقا كوشىپ كەلۋشىنىڭ ەلەكتروندىق تسيفرلىق قولتاڭباسى جانە پاسپورتتىق دەرەكتەرى جەتكىلىكتى.
ەكىنشى, قازاقستان تاراپىنان قابىلداۋشى جەكە جانە زاڭدى تۇلعالار شەتەلدىكتىڭ كەلگەنى تۋرالى حابارلامانى تىكەلەي ءوز اۋدانى بويىنشا ىشكى ىستەر ورگانىنىڭ كوشى-قون قىزمەتىنىڭ بولىمدەرى مەن بولىمشەلەرىنە بەرە الادى.
حالىققا قىزمەت ەتەتىن ورتالىقتارعا شەتەلدىكتەر كوپتەپ جۇگىنۋىنە بايلانىستى ساۋران №7 مەكەنجايىنداعى ورتالىقتا قوسىمشا 20 جۇمىس ورنى, نۇرلى جول ا-82 مەكەنجايىندا 15 جۇمىس ورنىمەن قامتىلىپ, اعىمدى رەتتەۋگە ءمان بەرىلدى. شەتەلدىكتەر جەكە سايكەستەندىرۋ ءنومىرىن (جسن) الۋ ءۇشىن جەكە كۋالىگى نەمەسە پاسپورتىمەن جۇگىنۋى ءتيىس
ءۇشىنشى وڭاي ءادىس – Apر Store نەمەسە Play Market-تەن e-Qonaq قوسىمشاسىن جۇكتەۋ ارقىلى جۇزەگە اسادى. سمارتفون كامەراسىنىڭ كومەگىمەن شەتەلدىكتىڭ تولقۇجاتىن سكانەرلەپ, دەرەكتەردى جۇكتەۋگە بولادى. حابارلامانى اۆتوريزاتسيالاۋ جانە تولتىرۋ ءينتۋيتيۆتى, ءبىر مينۋت ۋاقىت الادى.
– حالىققا قىزمەت ەتەتىن ورتالىقتارعا شەتەلدىكتەر كوپتەپ جۇگىنۋىنە بايلانىستى ساۋران №7 مەكەنجايىنداعى ورتالىقتا قوسىمشا 20 جۇمىس ورنى, نۇرلى جول ا-82 مەكەنجايىندا 15 جۇمىس ورنىمەن قامتىلىپ, اعىمدى رەتتەۋگە ءمان بەرىلدى. شەتەلدىكتەر جەكە سايكەستەندىرۋ ءنومىرىن (جسن) الۋ ءۇشىن جەكە كۋالىگى نەمەسە پاسپورتىمەن جۇگىنۋى ءتيىس, – دەدى مەملەكەتتىك كورپوراتسياسىنىڭ وكىلى.
ميگراتسياعا ساياسي كوزقاراسقا قاتىستى سەبەپتەر, كيكىلجىڭدەر, سوعىس سياقتى ءتۇرلى سيپاتتاعى قيىندىقتار, جاڭا جۇمىس ورنىن ىزدەۋ, ءومىر ءسۇرۋ سالتىن وزگەرتۋ, ەكولوگيا, ءبىلىم الۋ ماقساتىمەن جەر اۋىستىرۋ ت.ب. جاعداي اسەر ەتەدى. قازىر رەسەيدەن ميگراتسيالىق اعىن بايقالادى. نەگىزگى سەبەپ – رەسەيلىكتەر جارتىلاي موبيليزاتسيادان قاشۋدا.
باسقارما باسشىسى يليا سكۋبتىڭ سوزىنشە, قازاقستان مەن رەسەي اراسىنداعى ەڭبەك ميگراتسياسى جەرگىلىكتى جەردىڭ زاڭدارى جانە ەۋرازيالىق ەكونوميكالىق وداقتىڭ كەلىسىم نەگىزىندە ىسكە اسادى.
– ەلگە كەلەتىن شەتەلدىكتەر قازاقستان رەسپۋبليكاسىنىڭ «حالىقتىڭ كوشى-قونى تۋرالى» زاڭىنا باعىنادى. سونداي-اق ەۋرازيالىق ەكونوميكالىق وداققا مۇشە ەلدەردىڭ اۋماعىندا ەڭبەك قىزمەتىن جۇزەگە اسىرۋ جانە كوشىپ-قونۋى تۋرالى كەلىسىمگە سايكەس جۇزەگە اسادى.
جىل باسىنان بەرى ءبىزدىڭ باسقارماعا 92 ادام «بوسقىن» مارتەبەسىن الۋعا جۇگىندى. ونىڭ ەكەۋى – رەسەيلىك ازامات. قازىر بۇل ۇسىنىس زاڭعا ساي قارالۋدا. ەلوردادا بوسقىن مارتەبەسى ءتورت ادامعا بەرىلدى. ونىڭ ەكەۋى – قىتاي جانە ەكەۋى اۋعانستان ەلىنىڭ ازاماتى.
بيىل 866 ادام «قانداس» ستاتۋسىن الدى. اتاپ ايتقاندا, 520 قانداس وزبەكستاننان كوشىپ كەلسە, رەسەيدان – 149, قىتايدان – 122, موڭعوليادان – 48, قىرعىزستاننان – 15, تۇركمەنستاننان – 6, يران مەن تاجىكستاننان – 2, اقش پەن شۆەيتساريادان 1 ادام تاريحي وتانىنا ورالدى, – دەدى يليا سكۋب.
كوشى-قون پروتسەسى باقىلاۋدا, ەلدىڭ ىشكى جاعدايىنا تەرىس اسەرى بولمايدى. ونلاين بريفينگتەن وسىنداي وي تۇيدىك.
بيىل 866 ادام «قانداس» ستاتۋسىن الدى. اتاپ ايتقاندا, 520 قانداس وزبەكستاننان كوشىپ كەلسە, رەسەيدان – 149, قىتايدان – 122, موڭعوليادان – 48, قىرعىزستاننان – 15, تۇركمەنستاننان – 6, يران مەن تاجىكستاننان – 2, اقش پەن شۆەيتساريادان 1 ادام تاريحي وتانىنا كەلدى
ەلدىگىمىز ءبۇتىن, بىرلىگىمىز بەكەم بولسىن
شىن مانىندە, بىزدە ءبارى دۇرىس پا؟ رەسەيدەن كەلەتىن ۇلى كوشتىڭ ىشكى نارىققا اسەرى قانداي؟ بۇل سۇراقتاردى دا نازاردان تىس قالدىرماي, سارالاپ كوردىك.
ساراپشىلار Google ىزدەۋ جۇيەسىندە «رەسەيدەن قايدا كوشۋگە بولادى؟» دەگەن ساۋال وتە كوپ ىزدەلەتىنىن ايتۋدا. رەسەيلىكتەر ءومىر سۇرۋگە ىڭعايلى ەلدەردى ىزدەستىرىپ جاتقانى, ونىڭ ىشىندە, قازاقستاندى تاڭدايتىنى انىق.
سولتۇستىكتەگى كورشىمەن شەكتەسەتىن 7,5 مىڭ شاقىرىمدىق شەكارادا 30-دان استام وتكىزۋ پۋنكت بار. قازىر وبلىستارداعى شەكارالىق پۋنكتەردە ۇزىن-سونار كەزەك قالىپتاستى. مۇنى الەۋمەتتىك جەلىدەن كورىپ, ءبىلىپ وتىرمىز. ۇقك شەكارا قىزمەتى مۇنى رەسمي مالىمدەپ, ءتورت اۆتوموبيلدىك وتكىزۋ پۋنكتىندە كەپتەلىس بايقالاتىنىن راستادى.
رەسەي پرەزيدەنتى موبيليزاتسيادان قاشقانداردى 10 جىلعا دەيىن سوتتاۋدى تاپسىرعانىمەن, كوشتىڭ قىسقارار ءتۇرى جوق. ءتىپتى 21-25 قىركۇيەك ارالىعىندا رەسەي شەكاراسىنان 250 مىڭنان استام ەر-ازامات شەكارادان ءوتتى دەگەن اقپارات بار. مەملەكەتتىك كىرىستەر كوميتەتىنىڭ دەرەگىنشە, ەلدىڭ شەكاراسىنا كىرىپ-شىققان كولىكتەر سانى 20 پايىزعا كوبەيدى. اسىرەسە, اقتوبە, اتىراۋ, قوستاناي, باتىس قازاقستان وبلىسىنداعى پۋنكتتەردە 500-600 كولىكتىڭ كەزەكتە تۇرعانى بەلگىلى بولدى.
30 جىلدا 1,5 ميلليون قانداستى قابىلدادىق دەپ ماقتانىپ جۇرگەندە, اينالدىرعان 8 ايدا بۇل كورسەتكىشتەن اسىرىپ جىبەردىك. ىشكى ىستەر مينيسترلىگى كوشى-قون كوميتەتى توراعاسىنىڭ مىندەتىن اتقارۋشى اسلان اتالىقوۆتىڭ سوزىنشە, جىل باسىنان بەرى ەلگە 4 ميلليون 399 مىڭ شەتەلدىك كەلسە, سونىڭ 1,7 ميلليونى – رەسەيدەن, 1,5 ميلليونى – وزبەكستاننان, 547 مىڭى – قىرعىزستاننان, 200 مىڭى تاجىكستاننان كەلدى.
ارينە, رەسەيلىكتەردى ءبىز شاقىرىپ جاتقان جوقپىز, ولار سوعىستان قاشۋدا. وسىنداي قارقىنمەن جالعاسا بەرسە, جىل اياعىنا دەيىن 3-3,5 ميلليوننان اسايىن دەپ تۇر-اۋ شاماسى! بۇلاي دەۋىمىزدىڭ سەبەبى – رەسەيلىكتەر قازاقستاندا ۆيزاسىز 30 كۇن جۇرە الادى. ودان ارتىق قالعىسى كەلسە, ميگراتسيالىق قىزمەتكە تىركەلىپ, تاعى 60 كۇنگە سوزدىرۋعا مۇمكىندىگى بار. ياعني ءبىر جىلعا جۋىق ۋاقىت ەمىن-ەركىن جۇرۋگە تولىق قۇقىلى. ەۋرازيالىق ەكونوميكالىق وداققا مۇشە ەلدەر وسىنداي مىندەتتەمەنى ورىنداۋى ءتيىس. رەسەيلىكتەر تاعى امالىن تاۋىپ, ءتىپتى ازاماتتىق السا نە بولادى؟ 30 جىلدا قازاقتىڭ ۇلەس سالماعى 69,6 پايىزعا جەتتى دەپ قۋانىپ جۇرگەندە, وزگە ۇلت وكىلدەرى كوبەيىپ, ۇلتتىق ماسەلەلەردى شەشۋ تاعى دا شەگەرىلە بەرمەي مە؟ ويتكەنى رەسەيلىكتەر ورىسى باسىم وڭىرلەردى قونىس ەتەتىنى ايتپاسا دا تۇسىنىكتى عوي!
جۋرناليست كامشات تاسبولات: «حالىققا قىزمەت كورسەتۋ ورتالىعىندا, «حان شاتىردا» رەسەيلىكتەر ءورىپ ءجۇر. حقك-دە الدىمدا ءبىر رەسەيلىك تۇردى, جسن الۋعا رۇقسات بەرىلمەگەن سياقتى. سەبەبىن انىقتاۋعا كەتتى. جالپى, رەسەيلىكتەرگە جسن بەرۋدى مەملەكەت تىيدى دەپ ۇمىتتەنەمىز. گەورگيەۆ لەنتاسىن كولىكتەرىنە ءىلىپ الىپ, جول ەرەجەلەرىن بۇزىپ تا جۇرگەندەرى بار. «سەرگەك» وتاندىق نومىرلەردى بايقاي قالادى عوي, ال رەسەيلىك كولىكتەردى شە؟ بايقاۋىمىزشا, ساۋدا ورتالىقتارىنداعى قىزمەت كورسەتۋ سالاسىندا جەرگىلىكتى ورىستار, ياعني, ءوز ازاماتتارىمىز ەمەس, رەسەيلىكتەر توبە كورسەتە باستاعان سياقتى. باياعى 90-جىلدارداعى دەموگرافيالىق, ەكونوميكالىق, الەۋمەتتىك جاعدايعا ەشكىم ورالعىسى كەلمەيدى» دەپ سەكەمدەنەدى.
راسىندا كەشە ساۋران №7 مەكەنجايىنداعى حالىققا قىزمەت كورسەتۋ ورتالىعىندا ۇزىن-سونار كەزەك قالىپتاستى. ءتىپتى جۇزدەگەن ادام عيماراتتىڭ سىرتىندا بىرنەشە قاتاردا تۇرىپ, كەزەگىن كۇتتى.
جالدامالى پاتەر اقىسى قىمباتتادى ما؟
ەلگە ەل قوسىلسا قۇت دەيدى عوي, بۇل جولعىسى جۇت بولماسا بولعانى! سەبەبى نارىق باعامى قۇبىلىپ, پاتەردىڭ باعاسى وسكەنى جايلى اقپارات شىعا باستادى.
بەلگىلى ايتىسكەر اقىن اسەم ەرەجەقىزى facebook-تەگى اككاۋنتىندا: «شەتتە وقىپ جاتقاندىقتان «استاناداعى پاتەرىمدى بوس تۇرماسىن» دەپ جالعا بەرىپ قويعانمىن عوي! وسى ايدىڭ اياعى التى ايدان بەرى تۇرعان قىزدار جاتاقحاناعا شىعىپ, پاتەردى krisha.kz بەردىم. بۇگىندىككە ەكى رەسەيلىك سۇراپتى. بىرىنشىسىنە ءۇزىلدى-كەسىلدى «بەرمەيمىن» دەدىم. ەكىنشىسى ماسكەۋلىك جىگىت «IT سالاسىنىڭ مامانىمىن, تابىسىم وتە جاقسى, اراق ىشپەيمىن, تەمەكى شەكپەيمىن. التى ايلىق پاتەراقىنى بىردەن تولەيىن» دەپتى. ءسىڭلىم بۇل حاباردى قۋانا جەتكىزدى. پاتەرىڭ جاقسى وتەتىن بولدى دەپ تۇر عوي, قايتسىن ەندى؟! قازاق جاستارى سولاردىڭ كەسىرىنەن دالادا قالىپ جاتقانىن ەستىپ-كورىپ وتىرمىز. «بەرمەيمىن» دەدىم. ارتىنشا ەكى قازاق قىزى «تۇرىپ جاتقان پاتەرىمىزدى پاتەر يەلەرى 300 مىڭ تەڭگەگە كوتەرىپ جىبەردى. تولەي الماي شىعىپ كەتتىك» دەپ حابارلاسقان ەكەن. باعاسىن ءبىراز ءتۇسىرىپ سول ەكى قىزعا بەر, ازىن-اۋلاق يپوتەكاسىن جاپسا بولدى دەدىم. ورىستار رەنجىمەس, نەگە رەنجىمەۋ كەرەگىن ءوزى دە بىلەتىن شىعار» دەگەن جازبا قالدىردى.
اتىراۋ قالاسىنان بالا-شاعاسىمەن كوشىپ كەلگەن رۋسلان ۇسەنباەۆ ەلورداداعى عىلىمي ورتالىقتا قىزمەت ەتەدى. جارىن دا بالاباقشاعا ورنالاستىرعان ەكەن. ەسىلدىڭ وڭ جاق بەتىنەن 160 مىڭ تەڭگەگە پاتەر جالداپ تۇرادى. بىلە بىلگەن ادامعا از قارجى ەمەس. ەندى ءۇيدىڭ يەسى پاتەر اقىنى 260 مىڭ تەڭگەگە كوتەرەتىنىن ايتىپتى.
– پاتەر يەسى حابارلاسىپ: «ۇسىنىس كوپتەپ تۇسۋدە. رەسەيلىكتەر 300-350 مىڭ تەڭگەگە سۇراۋدا. قازاقسىڭ عوي, 260 مىڭ تەڭگەگە بەرەيىن. تۇرا بەرىڭدەر» دەدى. نە ايتارىمدى بىلمەي, ەسەڭگىرەپ قالدىم. ءوزىمنىڭ جالاقىم – 200 مىڭ تەڭگە. ايەلىمدىكى – 140 مىڭ تەڭگە. سوندا تاپقان-تايانعانىمدى پاتەرگە بەرسەم, قالاي كۇن كورەمىن؟ – دەپ جىلارمان بولىپ وتىر.
ارينە, بۇل جاعداي ارەڭ كۇنىن كورىپ وتىرعان حالىققا جۇدىرىق بولىپ تيگەندەي. ەستەرىڭىزدە بولار, قايبىر جىلى ءرۋبلدىڭ قۇنى ءتۇسىپ, رەسەيدىڭ ەسكى-قۇسقى كولىگىن تاسىپ, ولاردى ءبىراز بايىتقان ەدىك. سول كەزدەگىگە قاراعاندا ءرۋبلدىڭ قۇنى ەكى ەسە ءوستى. قازىر رۋبل تەڭگەگە قاراعاندا ەداۋىر قۇندى بولعاندىقتان, رەسەيلىكتەر ءۇشىن پاتەردى جالداۋدا, ازىق-تۇلىكتى الۋدا قيىندىق بولمايدى.
ءبىز ساۋران كوشەسىندەگى حالىققا قىزمەت كورسەتۋگە ورتالىعىنا بارىپ, سونداعى رەسەيلىكتەردى سوزگە تارتتىق. ءوزىن انتون دەپ تانىستىرعان ازامات ءنوۆوسىبىر قالاسىنان كەلگەنىن ايتتى. ول قازىرگى جاعدايعا بايلانىستى قازاقستانعا كەلگەنىن, IT سالاسىنىڭ مامانى ەكەنىن ايتتى.
رەسەيدىڭ كراسنودار اۋماعىنان كەلگەن الەكساندر ءساموحيننىڭ ايتۋىنشا, استاناعا كەلگەلى تۋريستىك ورىنداردى ارالاپ, كورىپ شىعىپتى. «ماعان قالا جانە ونىڭ تۇرعىندارىنىڭ جىلىشىرايلىعى قاتتى ۇنادى. ىڭعايلى جۇمىس تاۋىپ جاتسام, كەلەشەگىمدى قازاقستانمەن بايلانىستىرعىم كەلەدى» دەيدى ول.
نارىقتا سۇرانىسقا ساي باعانىڭ قىمباتتاۋى – زاڭدىلىق. قازىر شەكارادا قارجى اينالىمى قالىپتاستى. بۇل ءسوزىمدى «ەل بىرلىگى» قوعامدىق بىرلەستىگىنىڭ توراعاسى باقىت سماعۇل قۋاتتاپ: «كوكشەتاۋدىڭ ۆوكزالىندا تۇرمىز. استاناعا تۋىستارىمىزدى شىعارىپ سالۋعا كەلگەنبىز. تاكسيلەر باعانى ۋداي قىمباتتاتىپ جىبەرىپتى. inDriver-دەن كولىك ىزدەدىك. تاپپادىق. جەلىدە ەشكىم جوق. تاكسيستەردەن باعانى نەگە شارىقتاتىپ جىبەردىڭدەر دەسەك, كوكشەتاۋدىڭ بار تاكسيى پەتروپاۆلدا رەسەيدەن كەلىپ جاتقانداردى كۇتىپ الىپ, مول اقشاعا ايتقان جەرىنە اپارادى ەكەن. مۇندا تاكسي قات بولعاسىن باعاسىن كوتەرۋگە تۋرا كەلىپتى».
كۇنى كەشە قوستانايدان كورشىم كەلدى. «كوكشەتاۋعا بارعان ەدىم. قوستانايدا تاكسي قىزمەتىنە سۇرانىس ارتتى دەگەننەن كەيىن, سوندا تارتتىم. شىنىمەن قوستانايدىڭ تەمىرجول ۆوكزالىندا ادامنىڭ قاراسى قالىڭ. كوبىسىنىڭ ارمانى – استاناعا جەتۋ. سودان ءۇش ادامنان 250 مىڭ تەڭگە الىپ, استاناعا جولعا شىعىپ كەتتىك!» دەپ ماقتانىپ ايتىپ وتىر.
رەسەيلىكتەردىڭ قازاقستانعا كوپتەپ قونىس اۋدارۋى نارىقتان بولەك, بانك سالاسىنا دا اسەر ەتۋدە ەكەن. ويتكەنى شەكارادان بەرى وتكەندەردىڭ باسىم بولىگى ۆاليۋتاسىن تەڭگەگە وسى جاقتا اۋىستىرادى. «بۇل ءبىزدىڭ بانكتەرگە ءتيىمسىز بولعالى تۇر» دەيدى ەكونوميستەر.
ءبىزدىڭ رەسەيلىكتەردى جارىلقاۋعا ەكونوميكالىق پوتەنتسيالىمىز جەتە مە ەكەن؟ اسىرەسە ەڭ تومەنگى جالاقى – 60 مىڭ تەڭگەمەن كۇنەلتەتىندەردىڭ جاعدايى قالاي بولماق؟
P.S: نە بولسا دا, سىرتقى ميگراتسيانى توقتاتۋ ءۇشىن شەكارانى جاۋىپ تاستاي المايمىز. قازاقستان حالقى اسسامبلەياسى دەگەن قۇرىلىم ءوزىنىڭ تيىمدىلىگىن دالەلدەيتىن كەز كەلدى. وسى ۋاقىتقا دەيىن پارلامەنت ماجىلىسىنە دەيىن كۆوتا ارقىلى وتۋىنە جاعداي جاساپ, كەڭ مۇمكىندىك بەرىلدى. ەندى ولار سىرتتان كەلگەن وزگە ۇلت وكىلدەرى ءبىزدىڭ ەلدىڭ زاڭىنا باعىنۋدى جان-جاقتى ناسيحاتتاپ, ەلدىڭ بەرەكە-بىرلىگىن ارتتىرۋعا ۇلەس قوسۋى ءتيىس.
