ەلوردا مەكتەپتەرىنىڭ تاريح ءپانى مۇعالىمدەرى 2022-2023 وقۋ جىلىندا «مۋزەيدەگى مەكتەپ كۇنى» جوباسى اياسىندا ۇلتتىق مۋزەيدە ءار اپتانىڭ بەيسەنبى كۇندەرى ساباق وتكىزەدى. اتالمىش جوبا استانا قالاسىنىڭ ءبىلىم باسقارماسى مەن مادەنيەت جانە سپورت مينيسترلىگىنىڭ قولداۋمەن ىسكە اسىرىلىپ جاتىر.
جوبانىڭ ماقساتى – وقۋشىلاردىڭ بويىندا تاريحي سانا, تولەرانتتىلىق, ءوز ەلى جانە باسقا ەلدەردىڭ تاريحى مەن مادەنيەتىنە قۇرمەت قالىپتاستىرۋ, عاسىرلار بويى قالىپتاسقان جالپىادامزاتتىق قۇندىلىقتاردى دارىتۋ جانە زەرتتەۋشىلىك, ويلاۋ, كوممۋنيكاتيۆتى داعدىلاردى دامىتۋ.
مۋزەيدەگى تاريح ساباقتارىنا قالا مەكتەپتەرىنىڭ 5-9-سىنىپتاردىڭ وقۋشىلارى قاتىسادى. ءبىر ساباق مەكتەپ باعدارلاماسىنا ساي 35-45 مينۋتقا سوزىلادى. كەزەكتى ساباقتى №60 مەكتەپ-ليتسەيىنىڭ تاريح ءپانى مۇعالىمى ب.قۇلتاي 6-سىنىپقا ارنالعان «قازاق حاندىعىنىڭ XVI-XVII عع. دامۋى», №84 مەكتەپ-ليتسەيدىڭ تاريح ءپانى مۇعالىمى ر.جاحانوۆا 9-سىنىپتار ءۇشىن «تىڭ يگەرۋ جىلدارىنداعى قازاقستان», №65 مەكتەپ-گيمنازياسىنىڭ تاريح ءپانى ۇستازى ۇ.سماعۇلوۆا «استانا – تاۋەلسىز قازاقستاننىڭ استاناسى» تاقىرىپتارىندا وتكىزدى.
