«استانالىق» تسيرككە العاش رەت اتى اڭىزعا اينالعان يۋري نيكۋلين اتىنداعى ماسكەۋدىڭ ءتۇرلى-ءتۇستى بۋلۆارداعى تسيركى گاسترولدىك ساپارمەن كەلدى. الەمدىك تسيرك كەڭىستىگىندە ءوزىنىڭ ۇلكەن ورنى بار اتاقتى تسيرك ۇجىمى بالالار جىلى اياسىندا 23 قازانعا دەيىن استانالىق ارەنادا ونەر كورسەتەدى.
تولىق قۇراممەن ەلورداعا كەلگەن ماسكەۋ تسيركى كورەرمەن نازارىنا ۆيرتۋوز گيمناستشىلار, اۋە گيمناستشىلارى مەن جونگلەرلەر, اكروبات-ەكستسەنتريكتەر مەن ەكۆيليبريستەر, كوپشىلىك سۇيەتىن سايقىمازاقتاردىڭ قىزىق باعدارلامالارىن ۇسىنادى.
بۇل يۋري نيكۋليننىڭ 100 جىلدىعىنا ارنالعان باعدارلاماعا ۇزدىك ارتىستەر قاتىسادى. تسيركتىڭ العاشقى قويىلىمى 1 قازان كۇنى ءوتتى. سول كۇنگى باعدارلاما حالىقارالىق قارتتار كۇنىنە ارنالىپ, ونى قارتتار ۇيىندەگى قاريالار مەن بالالار ءۇيىنىڭ تاربيەلەنۋشىلەرى, الەۋمەتتىك از قامتىلعان وتباسىلاردان شىققان بالالار تەگىن تاماشالادى.
بايان اسىلبەكوۆا
