ورامال تاعۋ ماسەلەسى وقۋ جىلى باستالعان كەزدە ۇنەمى كوتەرىلەتىن تاپتاۋرىن تاقىرىپقا اينالادى. ءبىر قىزىعى, بۇل ماسەلەگە كەلگەندە جۇرتتىڭ پىكىرى دە ەكىگە جارىلىپ تۇر. ەندەشە ورامال تاعۋ ماسەلەسى تۋرالى جۇرتشىلىق, جازۋشىلار نە دەيدى؟ وعان دا نازار سالىپ كورەيىك.
زەينەپ احمەتوۆا, جازۋشى:
– اسىرە دىنشىلدەر قازاقتىڭ تىنىشتىعىن بۇزىپ, تۇتاستىعىنا كەدەرگى كەلتىرۋ ءۇشىن ادەيى قوزدىرىپ ءجۇر. ايتپەسە سول ورامالدى سونشالىق ءسوز قىلاتىن ەشتەڭە جوق. اتا-بابامىزدا حيدجاب دەگەن بولماعان. قازاقتىڭ قىزدارى بۇرىن كۇيەۋگە تيگەنگە دەيىن باسىنا ورامال سالماعان. ۇكىلى تاقيا, قۇندىز بورىك, مونشاقتى قاسابا, شاشاقتى سورابا كيدى. بىرىنەن-ءبىرى وتەتىن ادەمى باس كيىمدەرىمىز بولدى. سول باس كيىمدەر ادەمى بولىپ تۇرۋى ءۇشىن قازاق قىزدارى شاش كۇتىمىنە كوپ كوڭىل ءبولدى. قاراشاش, ءسۇمبىلشاش, قولاڭشاش, التىنشاش دەپ قانشاما اقىن قىزداردىڭ شاشىن ولەڭگە قوستى. سول شاشقا تاعاتىن قانشاما اشەكەي بۇيىمىمىز بار. ەندى سونىڭ ءبارىن جەرگە كومۋىمىز كەرەك پە؟!
ەرلان رىسقالي, ءداستۇرلى ءانشى:
– بىرىڭعاي مەكتەپ فورماسى بولعانى دۇرىس! بىراق ول ءبىزدىڭ ۇلتتىق مەنتاليتەتىمىزگە ساي بولۋى ءتيىس. ۇلدىڭ شالبارى تىرتىسىپ, قىزدىڭ يۋبكا-كوفتاسى شولتيىپ تۇرماۋى كەرەك! سوسىن اياعىنا ءتۋفليدى مىندەتتەۋدىڭ قاجەتى جوق! مەكتەپ فورماسىنا كەلەتىن جەڭىل اياق كيىم كيسە بولادى. ال ورامال تاعۋ, تاقپاۋ ەڭ الدىمەن, بالانىڭ, سوسىن اتا-انانىڭ قۇزىرىندا بولۋى ءتيىس. مەكتەپ اكىمشىلىگى تەك ورامالدىڭ مىندەتتى تۇردە مەكتەپ فورماسىمەن كيگەنىن عانا قاداعالاۋ كەرەك! مەكتەپ فورماسىنان باسقا كيىممەن ورامال تاعىپ كەلسە مەكتەپكە كىرگىزبەۋ كەرەك! ءتارتىپ بارىنە ورتاق! بىرىڭعاي فورما بولۋى ءتيىس!
ءدىندى كۇشتەپ ۇيرەتۋگە بولمايدى. جانە تىم دىنشىلدىكپەن مەملەكەتتىك جۇيەگە قارسى شىعۋعا دا بولمايدى! اۋليە بولساڭ دا ورتاق تارتىپكە باعىنۋعا ءتيىسسىڭ! مۇنى كوكپارعا سالۋدىڭ قاجەتى جوق. مەملەكەت ناقتى ءتارتىپتى ورناتىپ, سونىڭ ورىندالۋىن قاتاڭ باقىلاپ, تالاپ ەتۋى ءتيىس! ءارى-بەرىدەن سوڭ ءدىن سەنىڭ سىرتقى كەلبەتىڭمەن ەمەس, ىشكى جاندۇنيەڭ, جۇرەك, امالىڭمەن ولشەنەدى!
