استانا قالاسىنىڭ اكىمى التاي كولگىنوۆ «وتاۋ» شاعىن اۋدانىنىڭ تۇرعىندارىمەن كەزدەستى. جۇزدەسۋدە تۇرعىندار بىرقاتار وزەكتى پروبلەمانى كوتەردى.
«كەشە ەكوايلىق اياسىندا «بىرگە تازا قازاقستان» جانە «دۇنيەجۇزىلىك تازالىق كۇنى» اتتى بۇكىلالەمدىك ەكواكتسياسى بويىنشا جالپىقالالىق سەنبىلىك باستالدى. «وتاۋ» شاعىن اۋدانىنىڭ تۇرعىندارىمەن بىرگە اعاش وتىرعىزدىق. «وتاۋدا» (الماتى اۋدانى, مەترو جاعى) جەڭىلدەتىلگەن قولجەتىمدى تۇرعىن ءۇي شاعىن اۋدانىن سالدىق. ەندى شاعىن اۋداندى ودان ءارى دامىتۋ بويىنشا اتقارىلار جۇمىستار كوپ.
كەزدەسۋدە قالا تۇرعىندارى بىرقاتار پروبلەمانى كوتەردى. ولاردىڭ اراسىندا الەۋمەتتىك نىساندار قۇرىلىسى (مەكتەپتەر, بالاباقشالار, ەمحانالار جانە ت.ب.), اۋداندى اباتتاندىرۋ (اۋلا اۋماقتارى), قوسىمشا اۆتوبۋس مارشرۋتتارىن ىسكە قوسۋ, جىلى ايالدامالار ورناتۋ, جول سالۋ جانە جوندەۋ, ينتەرنەت ساپاسىن جاقسارتۋ, قۇرىلىس كومپانياسى تاراپىنان كەتكەن كەمشىلىكتى قالپىنا كەلتىرۋ, سول سياقتى كارىز جۇمىسى, ساۋدا ازىق-تۇلىك دۇكەنىن اشۋ جانە ت.ب. ماسەلەلەر بولدى. ماسەلەن, شاعىن اۋداندا ەكى مەكتەپ سالۋ جوسپارلاندى. وزدەرىڭىز بىلەتىندەي, قازىر ءىرى مەكتەپتەردىڭ قۇرىلىسىنا كوشىپ جاتىرمىز. وسىلايشا ءبىر مەكتەپ 4 مىڭ وقۋشىعا (2 اۋىسىمدا) ارنالادى. قازىر جوبالىق-سمەتالىق قۇجاتتاما ازىرلەۋ جۇمىسى ءجۇرىپ جاتىر. سونىمەن قاتار, ەگجەي-تەگجەيلى جوسپارلاۋ جوباسىندا بالاباقشا قۇرىلىسى قاراستىرىلدى. بۇدان بولەك, گيپەرماركەت قۇرىلىسىنا دا ارنالعان جەر تەلىمى بار. بۇل ماسەلەلەر بويىنشا ءتيىستى جۇمىستار قولعا الىندى: بىرقاتارىن قىسقا مەرزىمدە شەشەمىز, ال جۇيەلى ماسەلەلەر كوبىرەك ۋاقىت قاجەت ەتەدى. وسى باعىتتاعى جۇمىستاردى ورىنداۋ كەستەسىن قۇرامىز» دەپ ءتۇسىندىردى قالا باسشىسى.
