ەلوردانىڭ دوستىق ۇيىندە ءارتۇرلى ءدىني ۇيىم وكىلدەرى وتباسى ينستيتۋتى ماسەلەلەرىن تالقىلادى.
استانا قالاسىنىڭ ءدىن ىستەرى ءجونىندەگى باسقارما باسشىسى نۇرداۋلەت ءالمۇحانوۆ الەۋمەتتىڭ وزەكتى تاقىرىبى رەتىندە جاستار تاربيەسىنىڭ كىلتى – وتباسى ەكەنىنە توقتالدى. قوعامدا, جاستار اراسىندا وتباسى قۇندىلىعى تۋرالى جاعىمدى پىكىرلەردى نىعايتا تۇسەتىن شارالاردى قاراستىرىپ, ونىڭ وڭتايلى ناتيجەگە قول جەتكىزەتىنىنە سەنىم ءبىلدىردى.
قوعامدىق دامۋ ينستيتۋتىنىڭ مالىمەتىنشە, ەلىمىزدە نەكەگە تۇرۋ سانى تومەندەپ كەتكەن. ال وتباسى قۇرعان ەكى جاستىڭ بىرگە ءومىر ءسۇرۋ ۇزاقتىعى 4 جىلعا دەيىن عانا سوزىلادى. مۇنداي دەرەكتەردى دىندەردى زەرتتەۋ ورتالىعىنىڭ ءدىنتانۋشىسى ايناگۇل رايىمبەك ورتاعا سالدى.
– ءبىزدىڭ ماقساتىمىز – وتباسى قۇندىلىعى تاقىرىبىن تالداپ قانا قويماي, قاجەتتى شەشىم شىعارۋ. ماسەلەن, 2017 جىلدان باستاپ 2022 جىلعا دەيىنگى ارالىقتا ەلىمىزدە نەكەگە تۇرۋ سانى تومەندەگەن. ال اجىراسۋ بويىنشا بۇرىن نەكەدە بولۋ ۇزاقتىعى 5-10 جىل ارالىعىندا بولسا, 2020 جىلدان بەرى ول 1-4 جىل ارالىعىنا وزگەردى. ازاماتتىق نەكە بويىنشا ساۋالناماعا قاتىسقانداردىڭ ويى 3-كە بولىنگەن. ءبىرى ونى قولداسا, ەكىنشىسى مۇنداي نەكەنى قولدامايتىنىن جەتكىزگەن. ءۇشىنشى تاراپ بولسا ازاماتتىق نەكەگە بەيتاراپ قارايدى. بۇل ستاتيستيكا ەلىمىزدە وتباسى ينستيتۋتىنىڭ ساپاسى ناشارلاپ كەتكەنىن كورسەتەدى, – دەيدى مامان.
جيىنعا استانا قالاسىنىڭ باس يمامى ەربولات ءجۇسىپوۆ تە قاتىستى. ونىڭ سوزىنشە, ەلوردادا مەشىتتەر جانىنان جانۇيالارعا كەڭەس بەرۋ ورتالىقتارى اشىلادى.
