وقۋشىلارعا – قوسىمشا ءبىلىم
جاڭا وقۋ جىلى قارساڭىندا تۇران داڭعىلىندا ورنالاسقان جاڭا بەس قاباتتى وقۋشىلار سارايى اشىلادى.
«SANA» وقۋشىلار سارايىندا 56 باعىت بويىنشا 50-دەن استام ۇيىرمە جۇمىس ىستەيدى. 99 وقىتۋشى جاسوسپىرىمدەردىڭ رۋحاني-مادەني شىعارماشىلىق الەۋەتىن دامىتاتىن بولادى.
عيماراتتىڭ جالپى اۋدانى – 8 مىڭ شارشى مەتر. وندا وقۋشىلار سۋدو جانە اۆيا مودەلدەۋ, فوتو جانە بەينە ستۋدياسى, cooking club (اسپازدىق كلۋبى), Apple جانە Windows سىنىبىندا ءبىلىمىن شىڭدايدى. باستى ەرەكشەلىگى – تەك بالالارعا ارنالعان 25 مەترلى باسسەين بولادى.
جاسوسپىرىمدەر مەن بالالار ءۇشىن قوسىمشا ءبىلىم بەرۋگە ارنالعان ورتالىققا استانا قالاسى ءماسليحاتىنىڭ توراعاسى ەرلان كاناليموۆ ارنايى بارىپ, جۇمىسىمەن تانىسىپ:
– زاماناۋي جابدىقتارمەن جابدىقتالعان ورتالىق ءبىر ۋاقىتتا 700-گە دەيىن وقۋشىنى قابىلداي الادى. جىل بويى جۇمىس ىستەيتىن وقۋشىلار سارايى بي, ۆوكال, روبوتوتەحنيكا, ءارتۇرلى سپورت تۇرلەرى, الەۋمەتتىك عىلىمدار بويىنشا قىزمەت كورسەتەدى, – دەدى.
زاماناۋي ورتالىق جاڭا وقۋ جىلىندا جۇمىستى تولىق باستاۋعا دايىن.
– ورتالىق مۇعالىمدەرىنىڭ 99 پايىزى جيناقتالدى. 1 قىركۇيەكتەن تولىق قۇرامدا جۇمىس ىستەيمىز. ۇيىرمە جۇمىسى بالانىڭ قابىلەتىنە قاراي ۇيىمداستىرىلادى. وقۋشى ءوزى بەيىمدەلىپ جاتقان سالا بويىنشا جاس ەرەكشەلىگىنە قاراي ەڭ تومەنگى دەڭگەيدەن جوعارى دەڭگەيگە دەيىن شىڭدالادى. مىسالى, تەحنولوگيالار كۋرسىندا بالا اۋەلى تەحنيكانىڭ قۇرىلىسىمەن تانىسادى, بىرتە-بىرتە روبوتپەن جۇمىس ىستەۋگە دەيىن جاتتىعادى. مۇندا زاماناۋي جۋرناليستيكا داعدىلارىن ۇيرەتۋ كۋرسى بار, – دەيدى ورتالىقتىڭ ءبىلىم جانە تاربيە ءبولىمىنىڭ جەتەكشىسى قازبەك ەلۋبايۇلى.