كەشە ەلوردادا «استانا دارىنى» دارىندى بالالار مەن تالانتتى جاستاردى انىقتاۋ جانە قولداۋ ورتالىعىنىڭ ۇيىمداستىرۋىمەن حيميا جانە بيولوگيا پاندەرى بويىنشا 7-8 سىنىپتار اراسىندا رەسپۋبليكالىق جاسوسپىرىمدەر وليمپياداسى باستالدى. وليمپيادا «دارىن» رەسپۋبليكالىق عىلىمي-پراكتيكالىق ورتالىعىنىڭ قولداۋىمەن «ZERDE-LIDER» ءبىلىم بەرۋ ورتالىعىمەن بىرلەسە ۇيىمداستىرىلدى.
وليمپيادانىڭ ماقساتى – حيميا, بيولوگيا پاندەرىن تەرەڭدەتىپ وقۋعا وقۋشىلاردىڭ قىزىعۋشىلىقتارىن ارتتىرۋ, وليمپيادالارعا دايىندىق جۇيەسىن جوعارى دەڭگەيدە جەتىلدىرۋ جانە وليمپيادالىق رەزەرۆتى قالىپتاستىرۋ.
بۇگىنگى تاڭدا مەكتەپ وقۋشىلارى اراسىندا حيميا-بيولوگيالىق باعىتتاعى پاندەرگە قىزىعۋشىلىق كۇننەن-كۇنگە ارتۋدا. قازىرگى تاڭدا ەلىمىزدىڭ الدىندا تۇرعان عىلىم, ءبىلىم, كاسىبي كەمەلدەنۋ الەمىندەگى ماسەلەلەردى شەشۋ ءۇشىن جاس دارىنداردى قولداۋ قاجەت. وسىنداي قولداۋدى ەكىنشى جىل قاتارىنان قايىرىمدىلىق قىزمەتىمەن تانىمال, وليمپيادانىڭ باس دەمەۋشىسى – الەمدەگى ەڭ ءىرى مۇناي كومپانياسى Exxon Mobil كورسەتىپ كەلەدى.
تەوريالىق جانە پراكتيكالىق سەكىلدى ەكى كەزەڭنەن تۇراتىن وليمپياداعا 171 وقۋشى قاتىسىپ جاتىر. ماراپاتتاۋ ءراسىمى 28 ساۋىردە «دۋمان» قوناق ۇيىندە وتەدى. جەڭىمپازدار مەن جۇلدەگەرلەر «دارىن» رەسپۋبليكالىق عىلىمي-پراكتيكالىق ورتالىعىنىڭ I, II جانە III دارەجەلى ديپلومدارىمەن جانە گراموتالارىمەن, سونداي-اق Exxon Mobil دەمەۋشى كومپانياسى ۇسىنعان باعالى سىيلىقتارمەن ماراپاتتالادى. وليمپيادانىڭ بارلىق قاتىسۋشىلارىنا سەرتيفيكاتتار تابىستالادى.
