استانا قالاسىنىڭ اكىمى جەڭىس قاسىمبەك ەسىل اۋدانىنداعى پريگورودنىي ەلدى مەكەنىنىڭ تۇرعىندارىمەن كەزدەستى. جيىندا تۇرعىندار تاراپىنان تاسجولدار, اۋلالار مەن قوعامدىق كەڭىستىكتەر سالۋ, اپاتتى جانە ەسكى تۇرعىن ۇيلەردى بۇزۋ, گاز قۇبىرىن تارتۋ, الەۋمەتتىك نىسانداردىڭ قۇرىلىسىن جۇرگىزۋ سياقتى ماسەلەلەردى كوتەرىپ, اكىمنەن جاۋابىن كۇتتى.
«اۋداندار مەن ەلدى مەكەندەردىڭ تۇرعىندارىمەن تۇراقتى كەزدەسىپ تۇرامىن. جاقىندا پريگورودنىي ەلدى مەكەنىنىڭ تۇرعىندارىمەن كەزدەستىم. وتكەن كەزدەسۋدىڭ قورىتىندىسى بويىنشا ءبىز «جول كارتاسىن» جاساعان ەدىك, وندا 30-دان اسا ءتۇرلى ماسەلە قاراستىرىلدى. بۇگىنگى كەزدەسۋدە وسى ماسەلەلەرگە جان-جاقتى شولۋ جاسالدى: 19 ماسەلە شەشىلدى, تاعى 12-ءسىن شەشۋ جۇمىسى ءجۇرىپ جاتىر» دەپ جازدى اكىم الەۋمەتتىك جەلىدەگى پاراقشاسىندا.
قالا باسشىسى 2024-2025 جىلدارى ۇلتتىق جوبا اياسىندا ەلوردادا 24 جايلى مەكتەپ سالىناتىنىن مالىمدەدى. ونىڭ 15-ءى ەسىل جانە نۇرا اۋداندارىندا ورنالاسادى, سول سياقتى جاڭا فورماتتاعى مەكتەپ پريگورودنىي ەلدى مەكەنىندە دە بولادى.
«سونىمەن قاتار كەزدەسۋ بارىسىندا تۇرعىندار باسسەين ماسەلەسىن كوتەردى. قالادا باسسەينگە دەگەن قاجەتتىلىك بار. الداعى 3 جىلدا, مەملەكەت باسشىسىنىڭ تاپسىرماسىنا سايكەس, 15 وقۋشىلار سارايىن سالۋدى جوسپارلاپ وتىرمىز. ولاردىڭ ءبىرى پريگورودنىي ەلدى مەكەنىندە ورنالاسادى, تيىسىنشە, وندا باسسەين دە بولادى» دەپ ءتۇسىندىردى ج.قاسىمبەك.
ەلدى مەكەندەردەگى وزەكتى ماسەلەلەردىڭ ءبىرى – اپاتتى جاعدايداعى توزىعى جەتكەن تۇرعىن ۇيلەردى بۇزۋ. اكىم 2024 جىلى مۇنداي ۇيلەردەن تاعى 700 تۇرعىندى كوشىرۋ جوسپارلانعانىن جەتكىزدى.
«بۇگىنگى تۇرعىندارمەن كەزدەسۋدەن كەيىن ەڭ الدىمەن قانداي ماسەلەلەردى شەشۋىمىز كەرەك ەكەنىن انىقتايمىز» دەپ تۇيىندەدى ءسوزىن قالا باسشىسى.
