استانانىڭ قارقىندى قۇرىلىسىنا جانە شاھار حالقىنىڭ ارتۋىنا بايلانىستى قالا تىرشىلىگىن قامتاماسىز ەتەتىن قۋات كوزدەرىنىڭ تاپشىلىعىن بولدىرماۋ ءۇشىن ينفراقۇرىلىمدىق جوبالار جۇزەگە اسىپ جاتىر. قالالىق ءماسليحات دەپۋتاتتارى بىرنەشەۋىن ارالاپ, قۇرىلىس جۇمىستارى بارىسىمەن تانىستى. سونىڭ ىشىندە «ينتەرناتسيونالنىي» تۇرعىن الابىنداعى 3-سورعى-سۇزگى ستانساسى مەن قورعالجىن تاسجولى بويىنداعى «تۇران» گاز قازاندىعىنا باردى.
3-سورعى-سۇزگى ستانساسىنىڭ قۇرىلىسى باستالعانىنا ءبىر جىل بولدى. وتكەن جىلدىڭ قازان ايىنان بەرى ءبىرشاما جۇمىس تياناقتالعان. قازىر استانالىقتار جاي كۇندەرى تاۋلىگىنە 305 تەكشە مەتر سۋ تۇتىنسا, دەمالىس كۇندەرى بۇل كورسەتكىش 326 تەكشە مەترگە جەتەدى. ال اتالمىش نىسان قالاعا تاۋلىگىنە قوسىمشا 105 تەكشە مەتر بەرەدى.
– وسى جىلدىڭ اياعىنا دەيىن نىساننىڭ ءبىر بولىگى ىسكە قوسىلادى. كەلەسى جىلدىڭ جەلتوقسانىندا تولىعىمەن پايدالانۋعا بەرىلەدى. بيىل شاھارعا وسى ستانسادان تاۋلىگىنە 35 تەكشە مەتر سۋ كەلەتىن بولادى. قالعان 70 تەكشە مەتر 2023 جىلى كەلەدى. سۋ وسىندا «ۆياچەسلاۆ» سۋ قويماسىنان كەلىپ, تازارتىلادى. سوسىن قالاعا كەتەدى, – دەيدى قالالىق وتىن-ەنەرگەتيكا كەشەنى جانە كوممۋنالدىق شارۋاشىلىق باسقارماسىنىڭ باسشىسى مارسەل ۇزاقباەۆ.
3-سورعى-سۇزگى ستانساسىنا دەيىن ماگيسترالدى سۋ قۇبىرىنىڭ قاشىقتىعى – 1,33 شاقىرىم. ال ستانسادان تۇران داڭعىلىنا دەيىن – 17,55 شاقىرىم. باسقارما باسشىسىنىڭ ايتۋىنشا, جوبانىڭ جالپى قۇنى – 42,66 ملرد تەڭگە. بىراق نارىقتاعى جاعدايعا, قۇرىلىس ماتەريالدارى مەن قوندىرعىلاردىڭ قىمباتتاۋىنا بايلانىستى جوبا تۇزەتۋگە جىبەرىلدى. وسى جىلعا 25 ملرد تەڭگە ءبولىندى. سونىڭ 1,2 ملرد تەڭگەسى يگەرىلدى.
قالالىق ءماسليحات دەپۋتاتى ازامات ايتحوجين وسى نىسان «ۋچحوز», «كۇيگەنجار» ەلدى مەكەندەرىن سۋمەن قامتي ما دەپ سۇرادى. مارسەل ۇزاقباەۆتىڭ سوزىنشە, بۇل ستانسا تۇران داڭعىلىنا دەيىنگى اۋماقتى قامتيدى, اتالعان ەلدى مەكەندەر ءۇشىن 4-سورعى-سۇزگى ستانساسىن سالۋ كەرەك.
ءماسليحات دەپۋتاتتارى بيىلعى جەلتوقسان ايىنا دەيىن نىساننىڭ ءبىر بولىگى پايدالانۋعا بەرىلەتىنىنە كۇمان ءبىلدىردى. مەردىگەر «ۇلگەرەمىز, قوندىرعىلار دا, قارجىلاندىرۋ دا جەتكىلىكتى» دەپ سەندىردى. وسى ايدىڭ 15-ىنە دەيىن نەگىزگى عيماراتتىڭ توبەسى جابىلادى. ال نىسانعا جىلۋ تارتۋ ءۇشىن اۆتونومدى قازاندىق سالىنادى. دەپۋتاتتار ستانساعا جەلتوقسان ايىندا قايتا كەلىپ, تەكسەرەتىن بولدى.
«تۇران» گاز قازاندىعى قورعالجىن تاسجولى جانە تۇران داڭعىلى بويىنداعى ۇيلەردى, جالپى 40 مىڭعا جۋىق پاتەر مەن الەۋمەتتىك نىسانداردى جىلۋمەن قامتاماسىز ەتەدى. كەلەسى جىلىتۋ ماۋسىمىندا نىسان جۇمىس ىستەي باستايدى. ونىڭ قۋاتى 350 گكال/ساع نەمەسە 422 مۆت قۇرايدى. 2023 جىلدىڭ سوڭىنا دەيىن 6 قازاندىقتىڭ ءبىرىنشى كەزەگى ىسكە قوسىلادى. جالپى جوبا كەلەسى جىلى كەزەڭ-كەزەڭىمەن جۇزەگە اسىرىلادى.
قالادا تاعى وسىنداي «تەلمان» جانە «وڭتۇستىك-شىعىس» گاز قازاندىعى سالىنادى. وسى ءۇش ستانسانى قوسقاندا, ەلورداعا قوسىمشا 1500 گكال/ساع جىلۋ كەلەدى. «تەلمان» گاز قازاندىعى «تەلمان» تۇرعىن الابى مەن تاۋەلسىزدىك داڭعىلىنىڭ ءبىر بولىگىن جىلۋمەن قامتيدى. ال «وڭتۇستىك-شىعىس» ستانساسى «مىڭجىلدىق» اللەياسى, «نۇرلى جول» ۆوكزالى اۋماعى, «باعىستان» تۇرعىن ءۇي كەشەنىنە جىلۋ بەرەدى. وسى ستانسالار سالىنىپ جاتقان 3-جەو-دان قۋاتتى ءۇش ەسەدەن ارتىق بەرۋگە قاۋقارلى.
– گاز قازاندىقتارى قۇرىلىسى ماسكەۋ تاجىريبەسىنە سۇيەنىپ باستالدى. بۇل جوبالار قارجىنى دا ۇنەمدەيدى, جەو-دان ۇزىننان-ۇزاق قۇبىرلاردى تارتۋ قاجەت ەمەس. وسىنداي قازاندىقتار بەلگىلى ءبىر اۋداندارعا ارنالعان, – دەيدى قالالىق ءماسليحات حاتشىسى ەرلان كاناليموۆ.
