استانا جانە قوياندى سۋ قويمالارىنا ساربوياندىق تۇقى دەپ اتالاتىن 12 مىڭ شاباق جىبەرىلدى. شاباقتاردىڭ مولشەرى 2-3 سانتيمەتردەن اسپايدى. «جاس نۇر» وندىرىستىك-شارۋاشىلىق كاسىپورنى ماماندارىنىڭ ايتۋىنشا, الداعى جازدا بالىق اۋلاۋ ماۋسىمىنا قاراي ولار 35-40 سانتيمەترگە دەيىن وسەدى, ال سالماعى 400 گرامعا جەتەدى. بالىقشىلاردىڭ قارماعى مەن شورتاننان امان قالعان جاعدايدا تۇقىلاردىڭ سالماعى ءبىر جارىم كيلوگرامعا جۋىق بولۋى مۇمكىن.
نەلىكتەن تاڭداۋ بالىقتىڭ بۇل تۇرىنە ءتۇستى؟ تۇقىلار 70 جىل بۇرىن قازاقستاننىڭ استاناسى ورنالاسقان دالالىق كليماتتىق جاعدايداعى جەرگە ادەيى اكەلىنگەن. «جاس نۇر» وندىرىستىك-شارۋاشىلىق كاسىپورنىنىڭ باسشىسى نۇرجان سماعۇلوۆ بالىقتىڭ تەمپەراتۋرانىڭ وزگەرۋىنە وتە ءتوزىمدى ەكەنىن, اششى دا, تۇششى دا سۋدا تىرشىلىك ەتە بەرەتىنىن ايتتى. ءارى استانا ماڭى سۋ قويمالارىنداعى قامىس وسكىندەرىنەن باستاپ, باقا ۋىلدىرىعى مەن شايانعا دەيىنگى بارلىق نارسەمەن قورەكتەنەتىنىن اتاپ ءوتتى. بالىق ەلوردالىق بالىقشىلار اراسىندا دامدىلىگىمەن تانىمال.
شاباقتار «Maybalyk» ينكۋباتسيالىق بالىق پيتومنيگىندە ءوسىرىلىپ, «جاس نۇر» قىزمەتكەرلەرى ارقىلى سۋ قويمالارعا جەتكىزىلىپ وتىر. شاباقتار جىل سايىن ءوسىرىلىپ, سۋ قويمالارىنا جىبەرىلەدى. كەلەسى جىلدىڭ كوكتەمىندە كاسىپورىندار سۋ قويمالارىنداعى ساربوياندىق تۇقى بالىقتارىنىڭ سانىن 2 ميلليونعا دەيىن كوبەيتۋدى جوسپارلاپ وتىر.
بۇل بيولوگيالىق تەپە-تەڭدىكتى ساقتاۋ جانە سۋ كەڭىستىگىن تابيعي تازارتۋ ماقساتىندا جۇزەگە اسىرىلادى. مۇنداي اكتسيالاردى بارلىق بالىق شارۋاشىلىعى ۇيىمدارى ەلدىڭ سۋ ايدىندارىنداعى بالىقتاردىڭ تۇرلىك سانىن ساقتاۋ جانە ۇلعايتۋ ءۇشىن جۇزەگە اسىرادى. اتالعان جۇمىستار ەكولوگيا, گەولوگيا جانە تابيعي رەسۋرستار مينيسترلىگى بالىق شارۋاشىلىعى كوميتەتىنىڭ جانە اۋىلدىق وكرۋگتەر اكىمدىكتەرىنىڭ باقىلاۋىمەن وتكىزىلەدى. بالىقتىڭ بەلگىلى ءبىر تۇقىمىن تاڭداۋ مامانداردىڭ عىلىمي زەرتتەۋلەرىنىڭ ناتيجەلەرى بويىنشا جاسالادى. استانالىق بالىقشىلارعا جاقىن ماڭداعى سۋ ايدىندارىنان بالىق اۋلاۋ ءۇشىن وندىرىستىك-شارۋاشىلىق كاسىپورنىنان جولداما ساتىپ الۋ جەتكىلىكتى.
قانات وماروۆ
