ەلوردادا «جاسىل استانا» ەكولوگيا ايلىعى باستالدى. جالپىقالالىق سەنبىلىككە 56 مىڭنان استام قالا تۇرعىنى قاتىسىپ, اباتتاندىرۋ, كوگالداندىرۋ جانە سانيتارلىق تازالاۋ جۇمىسىن اتقاردى. ەكولوگيا ايلىعى بارىسىندا ەسىل, اقبۇلاق, سارىبۇلاق وزەنىنىڭ ارناسى جانە قوعامدىق كەڭىستىكتەر تۇرمىس قالدىقتارىنان تازالانىپ, كوشەتتەر وتىرعىزىلادى. سەنبىلىككە شىققان ازاماتتار 110 تونناعا جۋىق قوقىس شىعارىپ, 1200-گە جۋىق جاسىل جەلەك وتىرعىزدى.
ءبىز اقبۇلاق وزەنىنىڭ ەكى جاعاسىندا وتكەن تازارتۋ جانە اعاش وتىرعىزۋ ءراسىمىن كوزبەن كورىپ قايتتىق. مۇندا وتكەن كۇزگى سەنبىلىككە بايقوڭىر مەن الماتى اۋدانىنىڭ تۇرعىندارى بەلسەندى قاتىستى.
الماتى اۋدانىنىڭ 16 مىڭداي تۇرعىنى قاتىسىپ, ولار 300-گە جۋىق قاراعاي, ۇيەڭكى, شاعان كوشەتىن وتىرعىزدى.
– ەكولوگيا ايلىعىنىڭ ماقساتى – قوعام نازارىن قالا كوشەلەرىندە تازالىق ساقتاۋعا اۋدارۋ جانە ەكولوگيا مادەنيەتىن قالىپتاستىرۋ, وسكەلەڭ ۇرپاققا تاربيە بەرۋ. ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىلارى مەن ستۋدەنتتەرى سەنبىلىككە قاتىسىپ, وزەن جاعاسىن, گۇلزارلاردى, سكۆەرلەردى تازالادى, – دەدى الماتى اۋدانى اكىمدىگى ءوندىرىس-تەحنيكا ءبولىمىنىڭ باس مامانى نۇرعازى ۇسەن.
بايقوڭىر اۋدانىندا 10 مىڭعا جۋىق ادام قاتىسىپ, 50-دەن اسا ارنايى تەحنيكا جۇمىلدىرىلدى. اقبۇلاق وزەنىنىڭ بايقوڭىر اۋدانىنا جاتاتىن ەكىنشى جاعالاۋىنداعى سەنبىلىككە شىققاندار اراسىندا ارداگەرلەر باسىم بولدى. ولار وزەن جاعاسىن قوقىستان تازارتىپ, 186 كوشەت وتىرعىزدى.
– تازالىق – مادەنيەت پەن كورەگەندىكتىڭ ايقىن بەلگىسى. قورشاعان ورتانىڭ تازالىعىن تىڭعىلىقتى ساقتاپ, مۇنتازداي ۇستاۋ – وركەنيەتتى قوعامنىڭ ولشەمى. سوندىقتان جاستارعا ۇلگى كورسەتۋ ءۇشىن سەنبىلىككە شىعىپ, تازالىق ايلىعىنا اتسالىسۋدى ويلادىم. قيمىل بەلسەندىلىگى سالاۋاتتى ءومىر سالتىن قالىپتاستىرۋدىڭ نەگىزگى شارتى دەسەك, سەنبىلىككە شىعىپ, ءبىر جاعى قوزعالىس بەلسەندىلىگىن ارتتىرىپ, دەنساۋلىققا وڭ اسەر ەتۋگە, ەكىنشى جاعى قالانى تازارتۋعا اتسالىسۋعا ۇلەس قوسۋعا بولادى, – دەدى بايقوڭىر اۋدانىنىڭ تۇرعىنى, ەل اعاسى سەيدۋللا ەسقابىلوۆ.
سەنبىلىككە «Elorda Aqparat» جشس-كە قاراستى «استانا اقشامى» مەن «ۆەچەرنيايا استانا» گازەتىنىڭ, Elorda.info اقپارات سايتىنىڭ جۋرناليستەرى قاتىستى. ولار تۇران داڭعىلى بويىنداعى «عاشىقتار» ساياباعىن تازالادى.
