5 قىركۇيەك – ۇلت ۇستازى احمەت بايتۇرسىنۇلىنىڭ تۋعان كۇنى. وسىنى ەسكەرگەن ەل ۇكىمەتى 2017 جىلى وسى كۇندى قازاقستان حالقى تىلدەرى كۇنى ەتىپ بەكىتتى. استانا قالاسى تىلدەردى دامىتۋ جانە ارحيۆ ءىسى باسقارماسى تىلدەر مەرەكەسىن ءبىر اي بويى وتكىزەدى. ءتيىستى شارالار بۇگىن «قالامگەرلەر» اللەياسىنداعى «الاش قايراتكەرلەرى» ەسكەرتكىشىنە گۇل شوقتارىن قويۋ راسىمىمەن باستالدى.
تاعزىم شاراسىنا اقىن-جازۋشىلار, قالا جۇرتشىلىعى, مۇعالىمدەر, ستۋدەنتتەر, مەكتەپ وقۋشىلارى قاتىسادى. سونداي-اق بۇگىن قالا مەكەمەلەرىندە تىلدەر كۇنىنە ارنالعان اپتالىق باستالىپ, ونىڭ اياسىندا اشىق ساباقتار, سەمينارلار, دوڭگەلەك ۇستەل وتىرىستارى, ءتۇرلى بايقاۋلار ۇيىمداستىرىلادى. اتالعان اپتالىق بالاباقشالار مەن مەكتەپتەردە, مادەنيەت, مەديتسينا, سپورت باعىتىنداعى جانە باسقا دا مەملەكەتتىك مەكەمەلەردە وتەدى.
جالپى ەلوردادا قازاقستان حالقى تىلدەرى كۇنىنە ارنالعان نەگىزگى ونعا تارتا شارا وتكىزۋ جوسپارلانعان. سونىڭ ىشىندە كورنەكتى تۇلعالاردىڭ دانالىق سوزدەرىنەن اۋديوماتەريالدار دايىندالىپ, 5 قىركۇيەكتەن باستاپ قوعامدىق كولىكتەردە ورنالاستىرىلادى. قالا ساياباقتارى مەن اۆتوبۋستاردا ۆيكتورينالىق ويىندار ۇيىمداستىرىلىپ, جەكەمەنشىك كولىكتەرگە پاتريوتتىق جازبالار, بەينەلەر قوندىرىلادى. الاشتىڭ ارداقتى اقىنى ماعجان جۇمابايۇلىنىڭ 130 جىلدىعىنا وراي جاس اقىنداردىڭ قاتىسۋىمەن پوەزيا كەشى, قالا تۇرعىندارى مەن قوناقتارىنا ارنالعان «ءسىز قازاق ءتىلىن بىلەسىز بە؟» ۆيكتوريناسى ۇيىمداستىرىلادى. استانا قالاسى اكىمدىگىنە قاراستى مەملەكەتتىك مەكەمە قىزمەتكەرلەرى اراسىندا «قازاقشا Quiz» ينتەللەكتۋالدى سايىسى وتەدى. استانا قالاسىنداعى جاس وتباسىلار اراسىندا سالت-ءداستۇر, ۇلتتىق قۇندىلىقتار بويىنشا سايىس ۇيىمداستىرىلادى.
كورنەكتى جازۋشى-دراماتۋرگ, كينودراماتۋرگ, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك ەرى اكىم ءتارازيدىڭ 90 جاس مەرەيتويى جاقىنداپ قالدى. وسىعان وراي, استانا قالاسى تىلدەردى دامىتۋ جانە ارحيۆ ءىسى باسقارماسى 22 قىركۇيەك كۇنى تىلدەر مەرەكەسى اياسىندا قالامگەر مەرەيتويىنا ارنالعان «تولعاۋى توقسان تارازي» اتتى ادەبي كەش وتكىزەدى.
