استانا قالاسى تىلدەردى دامىتۋ جانە ارحيۆ ءىسى باسقارماسىنىڭ ۇيىمداستىرۋىمەن ءبىر ايعا جۋىق ۋاقىت وتكەن «ءتىلىم – تىرەگىم» اتتى قازاقستان حالقى تىلدەرىنىڭ ءححىV قالالىق فەستيۆالى تۇيىندەلدى. فەستيۆالدىڭ قورىتىندى كەشى ءا.مامبەتوۆ اتىنداعى مەملەكەتتىك دراما جانە كومەديا تەاترىندا ءوتتى.
بيىلعى ءتىل مەرەكەسى ۇلت ۇستازى احمەت بايتۇرسىنۇلىنىڭ 150 جىلدىعى اياسىندا ۇيىمداستىرىلدى. ءتىل ءبىلىمىنىڭ اتاسى تۋعان 5 قىركۇيەك كۇنى «قالامگەرلەر» اللەياسىنداعى «الاش قايراتكەرلەرى» ەسكەرتكىشىنە گۇل شوقتارىن قويىپ, الاش ارداقتىلارىنىڭ رۋحىنا تاعزىم ەتۋدەن باستالعان فەستيۆال شەڭبەرىندە 16, جالپى قالا بويىنشا ۇلكەندى-كىشىلى 300-دەن استام ءىس-شارا ءوتتى. سونىڭ ىشىندە ءتۇرلى جارىستار, رەسمي كەزدەسۋلەر, كوڭىلدى كەشتەر, تارتىستى باسەكەلەر مەن ۇلتتىق ويىندار, ينتەللەكتۋالدى سايىستار بولدى. قورىتىندى كەشتە سولاردىڭ جەڭىمپازدارى مەن جۇلدەگەرلەرى ماراپاتتالىپ, اسەم اندەر اۋەلەدى.
– نەگىزى, تىلدەر مەرەكەسى, ءتىلدىڭ ماسەلەسى بەلگىلى ءبىر ايمەن, بەلگىلى ءبىر داتامەن شەكتەلىپ قالمايدى. ءتىلدىڭ ماسەلەسى – ۇلتتىڭ ماسەلەسى, مەملەكەتتىڭ ماسەلەسى. ءتىل بار جەردە, ۇلت بولادى, ال ءتىل جوق جەردە, ۇلتتى ۇلت دەۋگە كەلە مە, بۇل – كۇماندى ماسەلە, – دەگەن قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ جاستارعا ۇندەۋ جولدادى.
– بۇعان دەيىن, تاۋەلسىزدىكتىڭ العاشقى جىلدارى, قازاق تىلىنە دەگەن, انا تىلىمىزگە دەگەن ۇلكەن قىزىعۋشىلىق بولدى. سەنىم ۇيالاپ, ءتىلدىڭ الەۋەتى جاقسى ارتىپ كەلە جاتىر ەدى. سوڭعى كەزدەردە ينتەرنەتكە, باسقا دا سەبەپتەرگە بايلانىستى جاستار اراسىندا ءوزىمىزدىڭ انا ءتىلىمىزدى مەنسىنبەي, وزگە تىلدە كوبىرەك سويلەۋ ترەندى بايقالىپ كەلە جاتىر. سوندىقتان ءوزىمىزدىڭ انا ءتىلىمىزدى قادىرلەۋگە شاقىرامىن. ويتكەنى انا ءتىلىمىز سىزدەرمەن بىزدەن باسقا ەشكىمگە كەرەك ەمەس, – دەدى باسقارما باسشىسى.
فەستيۆال اياسىندا وتكەن قازاقشا كۋيز ويىندارىنا بەلسەنە قاتىسقانى ءۇشىن «الاش» توبى مەن «جالىن» توبى, ءۇشىنشى ورىن العان استانا قالاسى دەنە شىنىقتىرۋ جانە سپورت باسقارماسىنىڭ «دوپينگ» قۇراماسى مەن قالالىق توتەنشە جاعدايلار دەپارتامەنتىنىڭ «قۇتقارۋشىلار» قۇراماسى, ەكىنشى ورىندى يەلەنگەن استانا قالاسى اكىمدىگى قىزمەتكەرلەرىنەن قۇرالعان «قۇراما» توبى جانە ءبىرىنشى ورىندى جەڭىپ العان ءبىلىم باسقارماسىنىڭ «ءتىل جاناشىرلارى» قۇراماسى ماراپاتتالدى.
«حانتالاپاي» ۇلتتىق ويىندار سايىسىندا ءۇشىنشى ورىندى №42 ورتا مەكتەپ وقۋشىسى نۇرداۋلەت اقىشوۆ, ەكىنشى ورىندى №52 مەكتەپ- گيمنازياسىنىڭ وقۋشىسى ىرىسكەلدى اتتوكۋروۆ, ءبىرىنشى ورىندى №7 مەكتەپ-گيمنازياسىنىڭ وقۋشىسى داستان امانگەلدى يەلەندى.
توعىزقۇمالاق سايىسىندا ەپتىلىك كورسەتىپ, توپتى جارعان جەڭىمپازدار: ءۇشىنشى ورىن – №32 مەكتەپ-گيمنازياسىنىڭ وقۋشىسى جەڭىسحان قابىلبەك, ەكىنشى ورىن – №32 مەكتەپ-گيمنازياسىنىڭ وقۋشىسى ءاليحان جاحان, ءبىرىنشى ورىن – №90 مەكتەپ-گيمنازياسىنىڭ وقۋشىسى دياس بورانباي.
ارقان تارتۋ سايىسىندا ءۇشىنشى ورىن №24 ورتا مەكتەپتىڭ قۇراماسىنا, ەكىنشى ورىن №52 مەكتەپ-ليتسەي قۇراماسىنا, ءبىرىنشى ورىن №85 مەكتەپ- ليتسەي قۇراماسىنا بەرىلدى.
16 كەلىلىك گىر كوتەرۋدەن ءۇشىنشى ورىندى №85 مەكتەپتىڭ وقۋشىسى ەركەبۇلان الەمحان, ەكىنشى ورىندى №52 مەكتەپتىڭ وقۋشىسى باعداۋلەت تەمىربەكوۆ, ءبىرىنشى ورىندى №85 مەكتەپتىڭ وقۋشىسى دانيال مەدەتۇلى يەلەندى.
موبيلوگرافتار سايىسىندا اسىلجان قۇدايبەرگەن مەن ءاليا تۇگەلباەۆا ءۇشىنشى ورىندى ءبولىستى. مەرۋەرت جاقسىباي ەكىنشى ورىندى الدى, ال داستان ءمۇرسالىم ۇزدىك موبيلوگراف اتاندى.
بارلىق جەڭىمپازدار مەن جۇلدەگەرلەر كەش بارىسىندا ماراپاتتالدى. جاڭاباي وتەگەنوۆ, مەدەت سالىقوۆ پەن كلارا تولەنباەۆا, شاحريزات سەيداحمەت, قۇرماش ماحانوۆ سەكىلدى بەلگىلى انشىلەر, كاراوكە جارىسىندا جاقسى ونەر كورسەتكەن ماعجان عالىمبەك, «ىڭكار-اي» بي توبى كەشكە جينالعانداردىڭ كوڭىلىن كوتەردى.
