ەلوردا تۇرعىندارىنىڭ سانى كوبەيگەن سايىن ازىق-تۇلىككە دەگەن سۇرانىس تا ارتا تۇسكەنى انىق. وسى جاعدايدى ەسكەرگەن استانا قالاسىنىڭ اكىمدىگى ەلوردادا وڭىرلەر جارمەڭكەسىن وتكىزۋدى داستۇرگە اينالدىرعان. بيىلعى كۇزگى ازىق-تۇلىك جارمەڭكەسىن تۇركىستان وبلىسىنىڭ اۋىل شارۋاشىلىعى تاۋارلارىن وندىرۋشىلەر باستادى. وتكەن دەمالىس كۇندەرى وڭتۇستىك ءوڭىر ديقاندارى ەلورداعا 556 توننا ءونىم اكەلدى. استانادا وتەتىن وڭىرلەر جارمەڭكەسىنىڭ باستى ەرەكشەلىگى – ونىمدەر نارىقتاعىدان تومەن باعامەن ساتىلادى.
باس قالادا وتكەن سەنبى-جەكسەنبى كۇندەرى اۋىل شارۋاشىلىعى ونىمدەرىنىڭ جارمەڭكەسىن تۇركىستان وبلىسىنىڭ شارۋالارى باستادى. جارمەڭكەگە 80-نەن استام تاۋار وندىرۋشىلەر وزىمەن بىرگە 556 تونناعا جۋىق ءونىم الىپ كەلدى.
استانا تۇرعىندارىنا كوكونىستەر, جەمىستەر, بالىق, ەت, ءسۇت جانە باسقا دا ونىمدەر ۇسىنىلدى. جوعارىدا اتالعان ونىمدەردىڭ قۇنى نارىق باعاسىنان تومەن.
«مەن ءۇشىن بۇل, ەڭ الدىمەن, قولجەتىمدى باعا جانە جاقسى تاڭداۋ. ءسىز مۇندا الدەقايدا ارزان ءونىم ساتىپ الاسىز. جارمەڭكەنىڭ قالانىڭ بىرنەشە نۇكتەسىندە وتكەنىن قالايمىن. سەبەبى بارلىعىنا وعان ىڭعايلى جەتۋگە مۇمكىندىك بولار ەدى» دەيدى قالا تۇرعىنى اسەم ورساەۆا.
ۇيىمداستىرۋشىلار كەلەسى اپتادا جارمەڭكەگە جامبىل جانە اتىراۋ وبلىستارىنان كوكونىس, بالىق ونىمدەرى اكەلىنەتىنىن حابارلادى. تۇرعىندار ءتيىمدى باعامەن ازىق-تۇلىك ساتىپ الىپ قانا قويماي, كونتسەرتتىك باعدارلامانى دا تاماشالايدى. جارمەڭكە ءار دەمالىس كۇندەرى 2 قىركۇيەكتەن 29 قازانعا دەيىن قازۇوۋ الدىنداعى تاۋەلسىزدىك داڭعىلى, 50 مەكەنجايى بويىنشا وتەدى.
