قالالىق ءماسليحاتتىڭ قوعامدىق قابىلداۋ بولمەسىنە جەكە قابىلداۋعا ءوتىنىش بىلدىرە كەلەتىندەر كوپ. سول ازاماتتاردىڭ ماسەلەلەرى بۇگىندە شەشىمىن تابۋدا. بۇل تۋرالى استانا قالاسى ءماسليحاتىنىڭ حاتشىسى ەرلان كاناليموۆ ءمالىم ەتتى.
«ءماسليحاتتىڭ قوعامدىق قابىلداۋىنا وتىنىشپەن كەلگەندەردىڭ ءبىرى – ەلوردالىق ۇلبولسىن سالىمجانقىزى. ول قارت ازاماتتارعا سىيلىق جاساپ, قايىرىمدىلىق اكتسياسىن وتكىزگىسى كەلەدى. ءبىز 1 قازان – قارتتار كۇنىندە شاي كەشىن ۇيىمداستىرۋعا كومەكتەسەمىز. مەملەكەتتىك ورگاندارمەن بىرگە جوعارى وقۋ ورنىنىڭ ستۋدەنتى نۇرتورە ارىنۇلىنا كومەك كورسەتۋگە نيەتتىمىز. نۇرتورە حالىقتىڭ الەۋمەتتىك وسال توپتارى ساناتىنداعى مۇقتاج ازاماتتارعا قايىرىمدىلىق كومەگىن بىركەلكى الۋدى ۇيلەستىرۋگە بولاتىن ارنايى پلاتفورما ازىرلەدى. جوبا وتە قىزىق جانە قولداۋدى قاجەت ەتەدى. بۇگىننەن باستاپ مۇددەلى باسقارمالارمەن, قوعامدىق ۇيىمدارمەن, كاسىپكەرلەرمەن بىرگە ءوز جوباسىن ىسكە اسىرا باستايدى. استانا قالاسىنىڭ ءماسليحاتى دەپۋتاتتارىنىڭ ازاماتتاردى قابىلداۋ كەستەسىمەن ەلوردالىق ءماسليحاتتىڭ سايتىندا تانىسۋعا بولادى» دەپ جازدى الەۋمەتتىك جەلىدەگى پاراقشاسىندا ەرلان كاناليموۆ.
