بيىل ەلوردانىڭ تۇرعىن الاپتارىن دامىتۋ ءۇشىن 8,8 ملرد تەڭگە ءبولىندى. ونىڭ ىشىندە رەسپۋبليكالىق بيۋدجەتتەن 7,3 ملرد جانە جەرگىلىكتى بيۋدجەتتەن 1,5 ملرد تەڭگە قاراستىرىلىپ وتىر. بۇل تۋرالى قالالىق ءماسليحاتتا بايانداما جاساعان استانا قالالىق كولىك جانە جول-كولىك ينفراقۇرىلىمىن دامىتۋ باسقارماسى باسشىسىنىڭ مىندەتىن اتقارۋشى مەرەي بايىرحان مالىمدەدى.
– بولىنگەن قاراجاتقا قالانىڭ 6 تۇرعىن الابىندا 7 جوبانى ىسكە اسىرۋ جوسپارلانۋدا. مىسالى, وڭتۇستىك-شىعىس تۇرعىن الابىندا ينجەنەرلىك جەلىلەر مەن جولداردى سالۋ بويىنشا ءبىرىنشى جانە ەكىنشى كەزەكتەگى قوس جوبا ىسكە اسادى. جوباعا ساي, بارلىعى 20 كوشە سالۋ قاراستىرىلعان. جوبانىڭ العاشقى كەزەگىندە 6 كوشە سالۋ جوسپارلانىپ وتىر. ءبىرىنشى كەزەكتەگى جۇمىستاردىڭ قۇنى 6,9 ملرد تەڭگە, – دەدى مەرەي بايىرحان.
ونىڭ ايتۋىنشا, كەلەسى كەزەكتەگى ينجەنەرلىك جەلىلەر مەن جولداردى سالۋ جۇمىسىنا شامامەن 13,6 ملرد تەڭگە جۇمسالماق.
– ءبىرىنشى كەزەكتەگى جۇمىستاردى ورىنداۋ تولىق اياقتالدى. ول – ەسىل, بۇقتىرما, ەدىل, جايىق كوشەلەرىنىڭ بويىندا ينجەنەرلىك جەلىلەر, جولدار سالۋ. اتالعان كوشەلەردى اعىمداعى جىلى قالانىڭ كوممۋنالدىق مەنشىگىنە بەرۋ جوسپارلانۋدا. ەكىنشى كەزەكتە اتقارىلاتىن جۇمىستار ەرتىس, دەگەرەس, اقارىس كوشەلەرىن قامتيدى. ولار دا بيىل قالانىڭ بالانسىنا بەرىلمەك, – دەدى باسقارماسى باسشىسىنىڭ مىندەتىن اتقارۋشى.
مەرەي بايىرحاننىڭ ايتۋىنشا, 3 جانە 4 كەزەكتەگى جۇمىستاردى باستاۋ ءۇشىن جوبالاۋ-سمەتالىق قۇجاتتار رەسپۋبليكالىق بيۋدجەت كوميسسياسىنىڭ قاراۋىنا جىبەرىلگەن. جالپى ولار 2024 جىلى قولعا الىنادى دەپ جوسپارلانىپ وتىر.
