قازاقستان رەسپۋبليكاسى كونستيتۋتسياسىنىڭ 13-بابى 2-تارماعىنا سايكەس, اركىمنىڭ ءوز قۇقىعى مەن بوستاندىعىن سوت ارقىلى قورعاۋعا قۇقىعى بار. كونستيتۋتسيانىڭ 25-بابىنىڭ 2-تارماعىندا ازاماتتاردى تۇرعىن ۇيمەن قامتاماسىز ەتۋ ءۇشىن جاعدايلار جاسالاتىنى, زاڭدا كورسەتىلگەن ساناتتاعى مۇقتاج ازاماتتارعا تۇرعىن ءۇي, زاڭمەن بەلگىلەنگەن تالاپتارعا سايكەس, مەملەكەتتىك تۇرعىن ءۇي قورىنان ولاردىڭ شاما-شارقى كوتەرەتىن اقىعا بەرىلەتىنى بەلگىلەنگەن.
قوعامىمىزداعى ءار ادام ءوزىنىڭ تۇرعىن ءۇيى بولۋى ءۇشىن ارەكەت جاسايدى. اكىمشىلىك ورگان مەن ازاماتتار اراسىندا تۋىندايتىن تۇرعىن ءۇي داۋلارى الەۋمەتتىك دۇرىس شەشىمدى قابىلداۋ تۇرعىسىنان وزەكتى بولىپ كەلەدى. وسى سانات بويىنشا تالاپكەرلەردىڭ كوبى حالىقتىڭ الەۋمەتتىك وسال توبىنا جاتادى. ولار جىلدار بويى تۇرعىن ءۇي الۋ ماسەلەسىن شەشە المايدى جانە ءوز قۇقىعىن قورعاي المايدى. وسى ساناتتاعى ىستەر بويىنشا جاريا-قۇقىقتىق داۋلاردا بيلىك ورگاندارىنىڭ شەشىمى مەن ءىس-ارەكەتىنە شاعىم جاساۋ كەزىندە ازاماتتار كوبىنەسە تەڭ ەمەس جاعدايدا بولادى جانە ولاردىڭ مۇمكىندىكتەرى مەملەكەتتىك اپپاراتتىڭ رەسۋرستارىمەن سالىستىرۋعا كەلمەيتىنى ايقىن كورىنەدى. وسىنداي تەڭسىزدىكتى بولدىرماۋ ماقساتىندا قازاقستان رەسپۋبليكاسىنىڭ اكىمشىلىك راسىمدىك-پروتسەستىك كودەكسى (بۇدان ءارى – ارپك) قابىلدانىپ, 2021 جىلعى 1 شىلدەدەن باستاپ قولدانىسقا ەنگىزىلدى. جاڭا كودەكس ءوز ماقساتىنا قول جەتكىزىپ وتىر دەپ نىق سەنىممەن ايتۋعا بولادى. ماسەلەن, استانا قالاسىندا مامانداندىرىلعان اۋدانارالىق اكىمشىلىك سوتىنىڭ 2022 جىلعى 30 قاراشاداعى شەشىمىمەن ازامات ۋ-دىڭ تالاپ ارىزى قاناعاتتاندىرىلدى. سوت بارىسىندا تۇرعىن ءۇي ينسپەكتسياسىنىڭ 2022 جىلعى 24 قاراشاداعى بۇيرىعىمەن ۋ-دىڭ تۇرعىن ءۇي الۋعا مۇقتاجدار تىزىمىنەن الىنىپ تاستالۋى زاڭسىز دەپ تانىلدى. سوت جاۋاپكەرگە تالاپكەردى 2012 جىلعى 19 قازاننان باستاپ «ءى جانە ءىى توپتاعى مۇگەدەكتەر» ساناتى بويىنشا تۇرعىن ءۇي الۋعا مۇقتاجدار ەسەبىنە قايتا قويۋدى مىندەتتەدى. سوت داۋدى ءمانى بويىنشا شەشىپ, داۋلى بۇيرىقتى زاڭسىز دەپ تانىدى. بۇعان قازاقستان رەسپۋبليكاسىنىڭ «تۇرعىن ءۇي قاتىناستارى تۋرالى» زاڭىنىڭ 73-بابىنىڭ ەرەجەلەرى, ارپك-ءنىڭ 10 جانە 13-باپتارىنىڭ ەرەجەلەرى نەگىز. وسىلايشا سوت تالاپ قويۋشىنىڭ اتا زاڭىمىزدا جانە ارنايى زاڭدا كورسەتىلگەن قۇقىعى ءتيىستى دارەجەدە قورعالدى. جاڭا كودەكستە سوت تورەلىگىن جۇزەگە اسىرۋدا باسقا كوزقاراستى قامتاماسىز ەتەتىن تۇبەگەيلى جاڭا جانە ايتارلىقتاي ەرەكشەلەنەتىن قاعيداتتار بار. مۇنداي ايىرماشىلىقتاردىڭ تيىمدىلىگى بۇگىندە ايقىن باسىمدىققا يە بولىپ وتىر.
باقىتبەك ءداۋىتوۆ,
استانا قالالىق مامانداندىرىلعان اۋدانارالىق اكىمشىلىك سوتىنىڭ سۋدياسى
