تالىمگەرلەر قولداۋ ءبىلدىردى
![](https://astana-akshamy.kz/wp-content/uploads/2023/09/تالىمگەرلەر-كەڭەسى-780x470.jpg)
استانا قالاسىنىڭ اكىمدىگىندە مەملەكەتتىك قىزمەت ىستەرى اگەنتتىگىنىڭ استانا قالاسى بويىنشا دەپارتامەنتى جانىنداعى «تالىمگەرلەر كەڭەسى» كونسۋلتاتيۆتىك-كەڭەسشى ورگانىنىڭ وتىرىسى ءوتتى. وتىرىستى استانا قالاسى قوعامدىق كەڭەسىنىڭ توراعاسى سانسىزباي ەسىلوۆ جۇرگىزدى.
قازىر مەملەكەتىمىز ءۇشىن كاسىبي دەڭگەيى جوعارى ماماندار دايىنداۋ قانداي وزەكتى بولسا, جاس ماماندارعا قولداۋ كورسەتۋ دە ءدال سونداي ماڭىزعا يە. بۇل تۇرعىدا الدىڭعى تولقىننىڭ كەيىنگى تولقىنعا اقىل-كەڭەسىن ايتىپ, باعىت-باعدار سىلتەۋى دە ارتىقتىق ەتپەيدى. وسىعان وراي مەملەكەتتىك قىزمەتتىڭ بەدەلىن نىعايتىپ, مەملەكەتتىك قىزمەتشىنىڭ ءيميدجى مەن بولمىسىن قالىپتاستىرۋ ماقساتىندا تالىمگەرلەر كەڭەسى قۇرىلعان ەدى.
مىنە بۇگىن سول تالىمگەرلەر كەڭەسى مۇشەلەرىنىڭ الدىنا اقىل-كەڭەسىن تىڭداپ, باتاسىن الۋ ءۇشىن قىزمەتكە جاڭادان تاعايىندالعان استانا قالاسى قوعامدىق دەنساۋلىق ساقتاۋ باسقارماسىنىڭ باسشىسى ءاليا رۇستەموۆا مەن استانا قالاسى اكتيۆتەر جانە مەملەكەتتىك ساتىپ الۋ باسقارماسىنىڭ باسشىسى نۇرلان ءالىمجانوۆ كەلدى.
ەلوردانىڭ قوعامدىق دەنساۋلىق سالاسى – وتە كۇردەلى سالا. مۇندا شەشىمىن تابا الماي, قوردالانىپ قالعان ءتۇيىندى تۇيتكىلدەر مەن الدا جۇيەلى دە ماقساتتى تۇردە اتقارىلاتىن سان-سالالى ىستەر از ەمەس. قازىر قالادا 12 مەملەكەتتىك, 29 جەكەمەنشىك اۋرۋحانا مەن ەمحانا بار. وسى مەكەمەلەردىڭ جۇمىسىنداعى ىستەلگەن ىستەر مەن ورىن العان كەمشىلىكتەر بۇرىن وسى سالادا ورىنباسار بولعان جاڭا باسشىعا ەتەنە تانىس. ەندى سولاردى شەشۋدىڭ جولى قانداي؟ مىنە وسى جانە باسقا دا ماسەلەلەردى ءاليا شايزاداقىزى ورتاعا سالدى.
ال بۇعان دەيىن استانا قالاسى اكىمى اپپاراتى باسشىسىنىڭ ورىنباسارى بولعان نۇرلان تالعاتۇلى دا استانا قالاسى اكتيۆتەر جانە مەملەكەتتىك ساتىپ الۋ باسقارماسىنىڭ باسشىسى لاۋازىمىنداعى ءوزىنىڭ جاڭا قىزمەتىنىڭ جاي-جاپسارىن بايانداپ, الدا اتقارىلار جۇمىستاردىڭ لەگىنە توقتالدى.
قالالىق مەملەكەتتىك ورگاندارعا تاعايىندالاتىن ءبىرىنشى باسشىلاردىڭ ءومىربايانى مەن جۇمىس-جوسپارىن تىڭداعاننان كەيىن مەملەكەتتىك قىزمەت ىستەر اگەنتتىگىنىڭ استانا قالاسى بويىنشا دەپارتامەنت باسشىسى, ادەپ جونىندەگى كەڭەس توراعاسى ءالي كومەكباەۆ, تالىمگەرلەر كەڭەسى مۇشەلەرى قايىرجان توقىشوۆ, مۇحتار ەركەتاەۆ, داۋلەتكەرەي راحماتۋللين ۇسىنىس-پىكىرلەرى مەن اقىل كەڭەستەرىن ايتىپ, ولاردىڭ باسشىلىق قىزمەتتەگى جۇمىسىنا ساتتىلىك تىلەدى.