ەلوردادا اينەكتەن سالىنعان بيىك عيماراتتاردىڭ سانى جىل وتكەن سايىن كوبەيىپ كەلەدى. سولاردىڭ سىرتىن شاڭنان تازالاپ, تەرەزەسىن جارقىراتىپ جۋاتىن وندىرىستىك الپينيستەرمەن جۇزدەسۋدىڭ ءساتى تۇسە بەرمەيتىنى بەلگىلى. جاقىندا «نۇرسايا-2» تۇرعىن ءۇي كەشەنىندە ەڭبەك ەتىپ جۇرگەن وسىنداي ەرەكشە كاسىپ يەلەرىن كەزدەيسوق كەزدەستىرىپ قالدىق. مۇمكىندىكتى پايدالانىپ, «ورمەكشى» جىگىتتەردى اڭگىمەگە تارتتىق.
قيىندىعى مەن قاۋپى قاتار جۇرەتىن ماماندىقتى مەڭگەرگەندەردىڭ بەسەۋى دە ءوزىمىزدىڭ قاراكوزدەر ەكەن. ءىشىم جىلىپ سالا بەردى. ارنايى تاپسىرىسپەن كەلگەندەرىن ايتقان «ايسۇلتان» جەكە مەنشىك كاسىپورىننىڭ جەتەكشىسى سەرىك قاراتاەۆ ەرەكشە كاسىپتىڭ قىر-سىرىمەن ءبولىستى.
– وندىرىستىك الپينيزم – قاۋىپ-قاتەرگە تولى كاسىپ. سوعان قاراماستان بۇل ماماندىقتى تاڭداۋشىلار كوپ. وسى ىسپەن اينالىسىپ جۇرگەنىمىزگە ەكى جىلعا جۋىقتادى. بۇگىندە بيىك عيماراتتاردىڭ قاسبەتىن تازالاپ, تەرەزە جۋمەن بىرگە تەرەزە, جەلدەتكىش ورناتۋ, شاتىردى قاردان تازالاۋ, قاسبەتىن سىرلاپ, اسەمدەۋ دە ءبىزدىڭ موينىمىزدا. جىل ون ەكى اي بويى جۇمىس ىستەيمىز. جالاقىمىز ءار ماۋسىمعا بايلانىستى قۇبىلىپ تۇرادى. ماسەلەن, جازدا تاپسىرىس كوپ تۇسەدى. ال قىستىڭ ۋاقىتىندا جۇمىس ازايادى. بۇل سالادا جەڭىل جانە اۋىر جاراقات الاتىندار كوپ. ونىڭ نەگىزگى سەبەبى – قاۋىپسىزدىك شاراسىن ساقتاماۋ. باستىسى, بيىكتىكتەن قورىقپاۋ كەرەك, – دەدى سەرىك قاراتاەۆ.
شىندىعىندا, بيىكتەن قورىقپاعانداردىڭ ءبارى بىردەي بۇل جۇمىستى يگەرىپ كەتە المايدى. تەك جاۋاپكەرشىلىكتى جاقسى ءتۇسىنىپ, قاۋىپسىزدىك شارالارىن, تەحنيكالىق تالاپتاردى قاتال ساقتاعاندار عانا شىن «الپينيست» بولا الادى.
ەلىمىزدە جاڭا دامىپ كەلە جاتقان جاس كاسىپكە قىزىعاتىندار از ەمەس. سولاردىڭ ءبىرى – استانالىق جاندوس قادىراليەۆ. ول 2016 جىلدان بەرى وسى سالادا ەڭبەك ەتىپ كەلەدى. جاسى 29-دا. العاشقى ەڭبەك جولىن ەكسپو اۋماعىنداعى «شاردا» باستاعان جىگىت ەڭبەك قاۋىپسىزدىگىن قاتاڭ ساقتاپ, ۇستىندەگى كيىم مەن جۇمىسقا قاجەتتى قۇرال-جابدىقتارىن تالاپقا ساي, ۋاقىتىلى اۋىستىرىپ وتىراتىندىعىن, وسىنداي قاراپايىم ەرەجەلەردى داعدىعا اينالعاندىرۋىنىڭ ارقاسىندا جاراقات الماي امان جۇرگەنىن ايتتى.
– بالا كۇنىمنەن ادامعا ادرەنالين سىيلايتىن ىستەردى جاقسى كورەمىن. سوندىقتان بولار, ۇنەمى سپورتپەن اينالىسامىن. قالاداعى بيىك عيماراتتىڭ قاسبەتىن جۋاتىن الپينيستەردى كورگەندە قىزىعاتىنمىن. ءسويتىپ ءوزىم دە وندىرىستەگى الپينيست بولۋ ءۇشىن الماتىدا ارنايى دايىندىق كۋرسىنان ءوتىپ, سەرتيفيكات العاننان كەيىن وسى ماماندىق بويىنشا جۇمىسقا ورنالاستىم. سودان بەرى مىنە التى جىل ءوتتى, وسى سالادا قىزمەت ەتىپ كەلەمىن. جۇمىس ۋاقىتىمىز تاڭعى 9-دا باستالىپ, كەشكى ساعات 7-گە دەيىن جالعاسادى. قازىر ءتورت قاباتتى عيماراتتىڭ تەرەزەلەرىن جۋعا كىرىسكەلى تۇرمىز. ءبىزدىڭ ماماندىق قاۋىپسىزدىك شارالارىن قاتاڭ ساقتاۋدى جانە اسقان جاۋاپكەرشىلىكتى تالاپ ەتەدى, – دەدى جاندوس قادىراليەۆ.
بيىكتىكتەن قورىقپايتىن جىگىت استانانى بارلىق قىرىنان تاماشالاي الاتىنىن, قۇس ۇشار بيىكتىكتەن كەيدە تاڭنىڭ قالاي اتقانىن, كەيدە كۇننىڭ قالاي باتقانىن قىزىقتايتىنىن, سول ادەمىلىككە كوز تاستاعان سايىن كەرەمەت كۇيگە بولەنىپ, ءوز جۇمىسىنان ءلاززات الاتىنىن جاسىرمادى. ال مۇنداي سەزىمدى ساناۋلى ماماندىق يەلەرى عانا باستان وتكەرەتىنىن ەسكەرسەك, جىگىتتەردىڭ جۇمىسى قاۋىپتى عانا ەمەس, ەرلىكپەن پارا-پار. ەندەشە, بيىككە ورلەگەن, ەلى مەن جەرىنىڭ ەرتەڭى ءۇشىن نامىستى بەرمەگەن قازاقتىڭ قايسار قىراندارى قاي سالادا دا الدىڭعى ساپتان كورىنە بەرسىن! ءار كۇن سايىن باستارىن قاپەرگە تىگىپ, تاۋەكەلگە بەل بۋاتىن باتىرلارىمىز امان بولىپ, استانانىڭ اجارلانا تۇسۋىنە اتسالىسا بەرسە ەكەن دەيمىز.
