Amanat پارتياسىنىڭ قولداۋىمەن, قر مادەنيەت جانە سپورت مينيسترلىگى جانە The Great Steppe Tour قوعامدىق قورى, ۇلتتىق سپورت تۇرلەرى قاۋىمداستىعىنىڭ ۇيىمداستىرۋىمەن «ۇلى دالا جورىعى» رەسپۋبليكالىق مارافون-بايگە باستالدى.
Amanat پارتياسىنىڭ ءتوراعاسى ەرلان قوشانوۆ سالتاناتتى راسىمگە قاتىسىپ, پرەزيدەنت قاسىم-جومارت توقاەۆتىڭ قۇتتىقتاۋ ءسوزىن وقىپ بەردى.
– ءبىزدىڭ بابالارىمىز ۇلى دالا شەجىرەسىن تۇلپاردىڭ تۇياعىمەن جازعان. بۇگىنگى ۇرپاق – سول كوشپەندىلەر مادەنيەتىنىڭ زاڭدى مۇراگەرى. شىن مانىندە, قازاق پەن جىلقى – ەگىز ۇعىم. ارعىماق اتتى حالقىمىزدىڭ سيمۆولى دەۋگە بولادى. ءبىز قازىرگى زاماننىڭ جاقسى قاسيەتتەرىن بويعا سىڭىرە وتىرىپ, ۇلتتىق بولمىسىمىزدى جاڭعىرتۋعا ءتيىسپىز. بۇگىنگى بايگەنىڭ باستى ماقساتى – وسى. ءار وڭىردەن كەلگەن شاباندوزدار كەڭ-بايتاق قازاق دالاسىن كوكتەي ءوتىپ, قاسيەتتى تۇركىستان قالاسىنا ات باسىن تىرەيدى. بۇل – ناعىز ازاماتتار مەن قازاناتتار سىنالاتىن دودا. سونداي-اق ەلىمىزگە رۋحاني سەرپىلىس اكەلىپ, جاستاردى وتانشىلدىققا باۋليتىن بىرەگەي جوبا, – دەلىنگەن قۇتتىقتاۋدا.
اشىلۋ سالتاناتىنا مادەنيەت جانە سپورت ءمينيسترى داۋرەن اباەۆ, استانا قالاسىنىڭ اكىمى التاي كولگىنوۆ, پارلامەنت دەپۋتاتتارى مەن قوعام قايراتكەرلەرى قاتىستى.
الەمدىك تاجىريبەدە تەڭدەسى جوق بۇل مارافون شاباندوز مادەنيەتىن قازاقستان برەندى رەتىندە قالىپتاستىرۋعا نەگىز بولادى. ۇلى دالا ەلىنىڭ بايىرعى تۇرعىندارى جىلقىنى قۇرىقتاپ, العاش تاقىمىنا باسقانى الەمگە بەلگىلى. انىعىن ايتقاندا, بوتاي قونىسىن زەرتتەۋشى عالىمدار وسىنداي تۇجىرىم جاسادى. جىلقىنى قولعا ۇيرەتۋمەن قاتار, ونىڭ ۇستىندە ەركىن وتىرىپ, قوزعالۋعا قاجەتتى كيىمدى جانە تاقىمدى مىقتايتىن توقىم مەن ەردى وندىرىسكە ەنگىزىپ, كوشپەندىلەر اراسىندا ات ابزەلدەرى: ەر-توقىم, ومىلدىرىك, قۇيىسقان, ۇزەڭگى, ايىل, پىستان, جۇگەن, نوقتا, كوپشىك, شىلبىر, قامشى جانە ت.ب. جاسايتىن شەبەرلەردىڭ قول جۇمىسىنا سۇرانىس ارتتى. جاۋىنگەر اتا-بابالارىمىز التايدان كاسپيگە, ارقادان سىرعا دەيىن تالاي رەت كوش تۇزەپ, ات اۋىستىرىپ, ءبىر ايلىق جەردە ونداعان كۇندە باعىندىرىپ وتىردى عوي! «ۇلى دالا جورىعى» مارافون-بايگەسىنىڭ تۇپكى يدەياسى وسىعان سايادى.
29 قىركۇيەكتە مارافونشىلار تۇركىستان قالاسىنا كەلەدى. وعان دەيىن 1200 شاقىرىمدىق جولدى باعىندىرىپ, اقمولا, قاراعاندى, ۇلىتاۋ, قىزىلوردا وبلىسىن باسىپ وتەدى.
مارافون 100 شاقىرىمدىق 12 ساتىعا بولىنگەن. ەلدىڭ ءاربىر وڭىرىنەن مارافونعا 1 كوماندادان قاتىسادى. مارافونعا قاتىسۋشىلارعا ۇلى دالا رۋحىن سەزىنۋگە جانە تۇرىك دۇنيەسىنىڭ كيەلى جەرلەرى – جوشى حان, الاشا حان كەسەنەلەرى, سونداي-اق قازاق حاندىعىنىڭ العاشقى استاناسى سوزاق قالاسى پەن تۇركى رۋحانياتىنىڭ بەسىگى تۇركىستان قالاسى سياقتى تاريحي ورىندارعا زيارات جاساۋعا مۇمكىندىك تۋادى.
تۇركىستان قالاسىنا ەڭ قىسقا ۋاقىت ىشىندە جەتكەن كوماندا مۇشەلەرى باس جۇلدە – «ۇلى دالا ساربازى» اتاعى مەن 30000000 تەڭگە كولەمىندەگى جۇلدەمەن ماراپاتتالادى. ءىى جانە ءىىى ورىن يەگەرلەرى سايكەسىنشە, 20000000 تەڭگە جانە 15000000 تەڭگە جۇلدەنى قانجىعاسىنا بايلايدى.
جارىس بارىسىندا بارلىق قاتىسۋشىلار دەمالىس ورنى, ازىق-تۇلىكپەن جانە قاجەت مەديتسينالىق كومەكپەن قامتاماسىز ەتىلەدى.
ۇيىمداستىرۋشىلاردىڭ سوزىنشە, ۆەتەرينارلار بايگەگە قوسىلعان جۇيرىكتەردى 50 شاقىرىم سايىن جايىن باقىلىپ, تەكسەرىپ كىنارات بايقاسا, جارىس جولىنان شىعارادى.
قىسقاسى, 1200 شاقىرىمدى 12 كۇندە باعىندىرۋى ءتيىس الامان بايگەدە شاباندوز دا, قازانات تا سىنالادى.
نۇرلات بايگەنجە
