– جىلداعىداي قىركۇيەكتىڭ 1-ىندە مەملەكەت باسشىسى قاسىم-جومارت توقاەۆ حالىققا جولداۋىن ارنادى. «ادىلەتتى قازاقستاننىڭ ەكونوميكالىق باعدارى» دەپ اتالعان بيىلعى جولداۋدا, نەگىزىنەن, الەۋمەتتىك-ەكونوميكالىق باعىتقا باسىمدىق بەرىلدى. مەملەكەت باسشىسى ءسوزىن حالىقتىڭ تۇرمىس ساپاسىنا تىكەلەي اسەر ەتكەن كەيبىر شارالاردى اتاپ وتۋدەن باستادى. مىسالى, 2020 جىلدان بەرى مۇعالىمدەردىڭ جالاقىسى ەكى ەسە وسكەنىن, دارىگەرلەردىڭ دە ايلىعىنىڭ ايتارلىقتاي كوبەيگەنىن ايتتى. راسىندا, ولاردىڭ تابىسى قازىرگى تاڭدا ەلىمىزدەگى ورتاشا جالاقىدان الدەقايدا جوعارى. ودان بولەك, حالىققا زەينەتاقى جيناعىنىڭ ءبىر بولىگىن پايدالانۋ مۇمكىندىگى بەرىلدى.
«ميلليونعا جۋىق ادام وسى جوبانىڭ يگىلىگىن كوردى – تۇرعىن ءۇي ماسەلەسىن شەشىپ, باسپانالى بولدى. «جايلى مەكتەپ» جوباسى اياسىندا 400-گە جۋىق مەكتەپ سالىنادى. قازىر اۋىلدىق جەردە 300-دەن استام دەنساۋلىق ساقتاۋ نىسانى سالىنىپ جاتىر. «ۇلتتىق قور – بالالارعا» جوباسى قولعا الىندى. سونىڭ ارقاسىندا جاڭا جىلدان باستاپ بالالاردىڭ ەسەپشوتىنا قاراجات تۇسە باستايدى. يگەرىلمەي جاتقان نەمەسە زاڭسىز بەرىلگەن 8 ميلليون گەكتار جەر مەملەكەت مەنشىگىنە قايتارىلدى. مەن ناقتى ىسكە اسقان شارالاردىڭ ءبىر بولىگىن عانا اتاپ ءوتتىم. شىن مانىندە, كوپ جۇمىس اتقارىلدى, بولاشاقتا دا ءوز جالعاسىن تابادى» دەدى پرەزيدەنت.
جولداۋدا سونىمەن قاتار ەلىمىزدەگى اۋقىمدى ساياسي جاڭعىرۋ جۇمىستارى, ادام قۇقىعىن قورعاۋ سالاسىنداعى ماڭىزدى قادامدار, سىرتقى ساۋدا-ساتتىقتىڭ بۇرىن بولماعان دەڭگەيگە كوتەرىلۋى, ادىلدىك, ينكليۋزيۆتىك جانە ۇنەمشىلدىكتىڭ جاڭا ەكونوميكالىق باعدارىمىزدىڭ وزەگىنە اينالۋى, ەلىمىزدىڭ تۋريستىك الەۋەتىن ارتتىرۋ, اۋىل شارۋاشىلىعى سالاسىنداعى رەفورمالار, ەنەرگەتيكالىق قاۋىپسىزدىك, سۋ, كولىك, نەسيە بەرۋ ۇيىمدارىنىڭ پايىز ۇستەمەسىن ازايتۋ ماسەلەلەرى جانە باسقا دا كوپتەگەن تۇيتكىلدى جايتتار كوتەرىلدى.
ماعان ەرەكشە اسەر ەتكەنى پرەزيدەنتىمىزدىڭ ابايدىڭ «تولىق ادام» ىلىمىنەن باستاۋ الاتىن «ادال ازامات» تۇجىرىمداماسىن العا تارتا وتىرىپ, ەل ازاماتتارىن ادال قوعام قۇرۋعا شاقىرۋى بولدى. شىنىندا دا, قوعامداعى كوپتەگەن وزەكتى ماسەلەنىڭ شەشىمى وسى ادالدىق قاسيەتتىڭ جوعىنان تۋىندايتىنى راس. ادالدىق جوق جەردە ەشقاشان ادىلدىك بولمايدى. ەلىمىزدىڭ ىرگەسى بەرىك, كەرەگەسى كەڭ, ءتورت قۇبىلامىز تەڭ بولۋى ءۇشىن كەلەر ۇرپاق الدىنداعى مىندەتىمىزگە ادال بولىپ, اۋىزبىرشىلىگىمىزبەن تاباندى ەڭبەك ەتەيىك.
اكبارجون يسمايلوۆ,
قازاقستان حالقى اسسامبلەياسى توراعاسىنىڭ ورىنباسارى
