– پرەزيدەنت جولداۋىندا ەلىمىزدىڭ ەكونوميكالىق جاعدايىن تۇبىرىنەن وزگەرتۋگە مۇمكىندىك بەرەتىن ەكى ۇلكەن جاڭالىق بار.
ءبىرىنشى, بلوكتىك بيۋدجەتتەۋ. بۇرىن بيۋدجەت ورتالىقتان ءبولىنىپ, جەرگىلىكتى اكىمدىكتەر سونى تەك يگەرۋگە كۇش سالاتىن. ال بلوكتىك جۇيە بويىنشا بەلگىلى ءبىر سوما جەرگىلىكتى اكىمدىكتىڭ قاراۋىنا بەرىلەدى, ولار ءوز قاجەتتەرى بويىنشا جوسپار جاساپ, قارجىنى يگەرىپ, سوڭىنان تيىمدىلىك كورسەتكىشتەرى (KPI) ارقىلى ەسەپ بەرەدى. ول «سەنىم ءليميتى» دەپ اتالادى. بۇل جەرگىلىكتى وڭىرلەرگە قارجىنى ءتيىمدى جۇمساۋعا جول اشادى. ال قازىر ورتالىق ورگاندار مەن قارجى مينيسترلىگى قارجىنىڭ جۇمسالۋ جوسپارىن جاساپ, ونى ءبولىپ بولعانشا جارتى جىل ءوتىپ كەتەدى. بۇل ءبىزدىڭ ەلدەگى كوپ جۇمىستىڭ ۋاعىندا جۇرمەۋىنە ۇلكەن كەدەرگى بولىپ تۇرعان سەبەپتەردىڭ ءبىرى ەدى.
ەكىنشىدەن, قوسىلعان قۇنعا سالىناتىن سالىقتىڭ (ندس) جەرگىلىكتى بيۋدجەتتە قالۋى. قوسىلعان قۇنعا سالىناتىن سالىقتاردىڭ ەكىنشى دەڭگەيلى بيۋدجەتكە ءتۇسۋى وڭىرلەردەن جيىلاتىن سالىقتىڭ تۇگەلدەي ورتالىققا كەتپەي, ءبىر ءبولىمى ايماقتاردا قالاتىنىن اڭعارتادى. دەمەك, ەندى ايماقتاردىڭ وزدەرىنىڭ بيۋدجەتىندە اقشا بولادى. ەگەر ايماقتار وسى قارجىنى ءونىمدى تۇردە جۇمساي الاتىن بولسا, بۇل وڭىرلەردىڭ دامۋىن العا سۇيرەيدى. سونىمەن قاتار, جەرگىلىكتى بيۋدجەتكە قارجى تۇسكەننەن كەيىن اكىمدىكتەر وڭىردەگى ءوندىرىستى دامىتۋعا, جول سالىپ, تۋريست تارتىپ دەگەن سياقتى ادىستەرمەن ەكونوميكانى جانداندىرۋعا كۇش سالادى. بۇل ايماقتار افراسىنداعى باسەكەلەستىكتى دە ارتتىرادى. سەبەبى ورتالىقتان ءبولىپ بەرگەن نان سەكىلدى ەكونوميكالىق قارجىلاندىرۋ جۇيەسى اكىمدەردى دايىن اسقا تىك قاسىق قىلدى. قازىرگى اكىمدەردىڭ كوبى جەرگىلىكتى ورىننىڭ قازىنالىق ءتۇسىمىن مولايتۋعا باس قاتىرماي, دايىن قارجىنى يگەرۋگە عانا كۇش سالىپ وتىر. بۇل – وڭىرلىك دامۋعا ۇلكەن كەدەرگى.
ايبار ولجاەۆ,
قازاقستان ورنىقتىلىق قورىنىڭ مەنەدفجەرى, قارجى سالاسىنىڭ ساراپشىسى
