ەلوردا اكىمى جەڭىس قاسىمبەك «استانا-اەك» اق جۇمىسىمەن تانىستى. قالا باسشىسى كەزدەسۋدە قالاداعى ەلەكترمەن جابدىقتاۋدىڭ قازىرگى جانە پەرسپەكتيۆالى سحەماسى ماسەلەلەرىن ەنەرگەتيكتەرمەن بىرلەسىپ تالقىلادى.
«قالاداعى جايلى ءومىر ينجەنەرلىك جەلىلەردىڭ جۇمىسىمەن تىكەلەي بايلانىستى. قالانىڭ كەڭەيىپ, تۇرعىندار سانىنىڭ ءوسۋىن ەسكەرەر بولساق, كوممۋنيكاتسيالارعا تۇسەتىن كۇش ارتىپ كەلەدى. بارلىق جەلىلەر بويىنشا جۇيەلى جۇمىس جۇرگىزەمىز. «استانا-اەك» اق-قا ارنايى بارىپ, قالامىزدى ەلەكترمەن جابدىقتاۋدىڭ قازىرگى جانە پەرسپەكتيۆالى سحەماسى ماسەلەلەرىن ەنەرگەتيكتەرمەن بىرلەسە تالقىلادىق. 2023-2024 جج. جىلىتۋ ماۋسىمىنا دايىندىق اياسىندا 110 كۆ اۋە جەلىلەرىنە, 10 كۆ اۋە جەلىلەرىنە كۇردەلى جوندەۋ جۇرگىزىلدى, سول سياقتى كەرنەۋى 20-10 كۆ تاراتۋ ترانسفورماتورلىق قوسالقى ستانتسيالارىنىڭ كۇردەلى جوندەۋ جۇمىسى اياقتالۋعا جاقىن» دەپ جازدى جەڭىس قاسىمبەك ءوزىنىڭ الەۋمەتتىك جەلىدەگى پاراقشاسىندا.
بۇدان بولەك, قالا اكىمى «مىڭجىلدىق» اللەياسى اۋدانىنداعى جاڭا نىسانداردى ەلەكترمەن جابدىقتاۋعا قوسۋ ءۇشىن 40 مۆا ترانسفورماتورلارىن 80 مۆا-عا اۋىستىرىپ, «جۇلدىز» 110/10 كۆ قوسالقى ستانتسياسىن قايتا قۇرۋ جۇمىسى جۇرگىزىلەتىنىن ءمالىم ەتتى.
«تەمىرجولشىلار ەلدى مەكەنىنىڭ تۇتىنۋشىلارىن قالانىڭ ەلەكتر جەلىسىنە قايتا قوسۋ ءۇشىن جاڭا «قازبەك» 110 كۆ قوسالقى ستانتسياسىنىڭ قۇرىلىسى باستالدى» دەدى جەڭىس قاسىمبەك.
سول سياقتى كەزدەسۋدە وزگە دە ءتۇيتكىلدى ماسەلەلەر مەن ولاردى شەشۋ جولدارى تالقىلاندى.
