كورنەكتى جازۋشى, دراماتۋرگ, جۋرناليست ورالحان بوكەيدىڭ 80 جىلدىعىنا وراي استاناداعى ۇلتتىق كىتاپحانادا ونىڭ شىعارماشىلىعىنا ارنالعان كونفەرەنتسيا ءوتتى.
قازاقستان رەسپۋبليكاسىنىڭ مادەنيەت جانە اقپارات مينيسترلىگى, اباي اتىنداعى حالىقارالىق مادەنيەت پەن ونەردى قولداۋ قورى, سونداي-اق كاتونقاراعاي اۋدانى كاسىپكەرلەرىنىڭ ۇيىتقى بولىپ, ۇيىمداستىرۋىمەن وتكەن بۇل شارا مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىمەن اشىلدى.
«ورالحان بوكەي – ۇلت رۋحانياتىنىڭ كوكجيەگىن كەڭەيتۋگە زور ۇلەس قوسقان ءبىرتۋار تۇلعا. قارىمدى قالامگەر ادەبيەت الەمىنە قادام باسقان ساتتەن باستاپ شوقتىعى بيىك شىعارمالارىمەن وقىرمان قاۋىمنىڭ ىستىق ىقىلاسىنا بولەندى. ونىڭ «قايداسىڭ, قاسقا قۇلىنىم», «قار قىزى», «ۇيقىم كەلمەيدى», «اتاۋ كەرە» جانە باسقا دا شىعارمالارى قازاق ادەبيەتىنىڭ التىن قورىنا قۇندى قازىنا بولىپ قوسىلدى. جازۋشىنىڭ جاۋھار مۇراسى كوپتەگەن شەتەل تىلىنە اۋدارىلىپ, پەسالارى ەلىمىزدىڭ ىرگەلى ونەر وردالارىندا قويىلىپ, كورەرمەن كوزايىمىنا اينالدى. «التايدىڭ كەر بۇعىسى» اتانعان ەرەكشە دارىن يەسىنىڭ شىعارماشىلىق جولى, ازاماتتىق ۇستانىمى جانە قايراتكەرلىك قاسيەتى جاستارعا ءاردايىم ۇلگى-ونەگە. ونىڭ مول ادەبي مۇراسى ءالى تالاي ۇرپاققا رۋحاني ازىق بولا بەرەتىنى ءسوزسىز» دەپ جازىلعان قۇتتىقتاۋ حاتتى پرەزيدەنتتىڭ كەڭەسشىسى باۋىرجان وماروۆ جەتكىزدى.
شاراعا جينالعان قالامگەرلەر, زەرتتەۋشىلەر ورالحان جايلى جىلى ەستەلىكتەر ايتىپ, ويلارىمەن بولىسكەننەن كەيىن مەرەيتوي قارساڭىندا باسپادان شىققان «شولپانداي تاڭ الدىنا تۋىپ-باتتى» كىتابىنىڭ تۇساۋى كەسىلدى. سونداي-اق بىرقاتار ازاماتقا «ورالحان بوكەيگە – 80 جىل» توسبەلگىسى تابىستالدى.
