2021 جىلى پرەزيدەنت قاسىم-جومارت توقاەۆتىڭ تاپسىرماسىمەن جاسوسپىرىمدەرگە قوسىمشا ءبىلىم بەرۋ ءۇشىن مەملەكەتتىك تاپسىرىس ينستيتۋتى ەنگىزىلدى. ياعني مەكتەپ جاسىنداعى بالالاردىڭ بوس ۋاقىتىن ءتيىمدى ۇيىمداستىرۋ ماقساتىندا قوسىمشا ءبىلىم بەرۋ ورتالىقتارى, مادەني ۇيىرمەلەر, سپورتتىق سەكتسيالار جۇمىسى جانداندى. بۇل باستامانى ArtSport پلاتفورماسى جۇزەگە اسىرۋعا جاۋاپتاندى. الايدا تاپسىرىس الۋشىلار اراسىندا قارجىنى ماقساتسىز يگەرۋ فاكتىلەرى تىركەلدى. بۇل تۋرالى استانا قالاسى بويىنشا تەكسەرۋ كوميسسياسىنىڭ وتىرىسىندا ايتىلدى.
تەكسەرۋ كوميسسياسىنىڭ توراعاسى ءيمانجۇسىپ اقپومباەۆ توراعالىعىمەن وتكەن جيىنعا استانا قالالىق ءماسليحاتىنىڭ توراعاسى ەرلان كاناليموۆ ونلاين فورماتتا قوسىلدى. باسقوسۋعا حالىق قالاۋلىلارى كەندەباي ادامبەكوۆ, جاندوس راحمەت, اسقار سماعۇلوۆ, بەرىك جاكەنوۆ, ساۋلە ساميدين, ۆلاديسلاۆ سەرگەەۆ, التىنشاش تابۋلدينا, باحارگۇل تولەگەن قاتىستى. مادەنيەت باسقارماسىنىڭ باسشىسى جاڭاباي مەيىرمانقۇلوۆ, دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, ءبىلىم باسقارما باسشىسىنىڭ ورىنباسارى ناريمان ەلامانوۆ پەن اكتيۆتەر جانە مەملەكەتتىك ساتىپ الۋ باسقارما باسشىسىنىڭ ورىنباسارى جاندوس داۋلەتوۆ ارنايى كەلدى.
تەكسەرۋ كوميسسياسىنىڭ مۇشەسى ارداق توقبەرگەنوۆ مالىمدەگەندەي, 2021 جىلى قاڭتار ايىنان 2022 جىلى قىركۇيەككە دەيىنگى كەزەڭدى قامتىعان مەملەكەتتىك اۋديت كەزىندە مادەنيەت باسقارماسى مەن دەنە شىنىقتىرۋ جانە سپورت باسقارماسىنىڭ جۇمىسى سارالاندى.
– اۋديت بارىسىندا بىرقاتار بۇزۋشىلىق انىقتالدى. ماسەلەن, مادەنيەت باسقارماسى 4 ميلليارد 843 ميلليون تەڭگەنىڭ, سپورت باسقارماسى بويىنشا 5 ميلليارد 896 ميلليون تەڭگەنىڭ بيۋدجەتتىك وتىنىمىندە اقپارات دۇرىس كورسەتىلمەگەن. مەملەكەتتىك تاپسىرىستى ورنالاستىرۋ جوسپارلانعان ۇيىرمە تۇرلەرى بويىنشا ناقتىلىق جانە ۇيىرمەلەردىڭ قاجەتتىلىگى بويىنشا ەسەپ جوق جانە 4 جاستان 17 جاسقا دەيىنگى بالالاردىڭ قامتىلۋ جالپى سانى بەلگىسىز. ءوتىنىمدى قاراۋ مەرزىمىن بۇزۋدىڭ 348 جاعدايى بەلگىلى بولدى. ونىڭ ىشىندە 141-ءى شىعارماشىلىق, 207-ءسى سپورتتىق تاپسىرىسقا جاتادى. 2023 جىلدىڭ قاڭتار-ناۋرىز ايىندا اقپاراتتىق جۇيەنىڭ جۇمىسى قولجەتىمسىز بولىپ, بالالار تەگىن سەكتسياعا قاتىسا المادى, – دەپ بىرقاتار ماسەلەنى اتادى ارداق توقبەرگەنوۆ.
پورتالدىڭ كەمشىلىگى كوپ. ماسەلەن, 2 بولەك بالاعا جانە ودان كوپ بالاعا 1 ۆاۋچەر بەرۋ فاكتىسى تىركەلدى. ەكى باسقارما بويىنشا مۇنداي فاكتىنىڭ سانى – 1132. سونىڭ سالدارىنان وپەراتور بيۋدجەت قاراجاتىنا ناقتى قاجەتتىلىكتى انىقتاۋى قيىنداپ, بيۋدجەت قاراجاتى ماقساتسىز جۇمسالۋعا جول اشتى. 2021 جىلى مامىر ايىندا جۇمىسى باستالعانىمەن artsport.edu.kz وپەراتورى مەن پلاتفورما يەسى اراسىندا پلاتفورمانى پايدالانۋ تۋرالى شارت ءالى جوق. سول سەبەپتى پلاتفورمادا اقپاراتتىق قاۋىپسىزدىكتى سىناۋدىڭ ءساتتى ناتيجەسى تۋرالى اكتى قامتاماسىز ەتىلمەگەن, باستىسى, دەنساۋلىق, ءبىلىم, سپورت جانە ادىلەت مينيسترلىگىنىڭ اقپاراتتىق جۇيەسىمەن ينتەگراتسيالانباعان. مادەنيەت جانە سپورت باسقارمالارى اقپاراتتىق جۇيەنىڭ سەرۆەرىندە جانە اقپارات تاسىعىشتاردا مەملەكەتتىك تاپسىرىس راسىمدەرىن ورىنداۋ بارىسىندا جيناقتالعان مالىمەتتەردى ساقتاۋدى جۇزەگە اسىرمايدى, سونداي-اق ىركىلىستەر بولعان جاعدايدا جۇمىسقا قابىلەتتىلىكتى تەز قالپىنا كەلتىرۋ مۇمكىندىگى ءۇشىن دەرەكتەردىڭ رەزەرۆتىك جيناقتالۋى جوق.
– اۋديت بيۋدجەت قاراجاتىن ماقساتسىز, نەگىزسىز پايدالانۋدىڭ بىرقاتار فاكتىسىن انىقتادى.
بىرىنشىدەن, ەلوردانىڭ شىعارماشىلىق ۇيىرمەلەرى مەن سپورت سەكتسيالارىنا باراتىن بالالار اراسىندا وزگە وڭىرلەردىڭ بالالارى تىركەلدى. اقمولا وبلىسىنىڭ ىرگەلەس اۋداندارىنداعى بالالارعا 10 812 ۆاۋچەر بەرىلىپ, 2 ميلليارد 951 ميلليون تەڭگە ءتيىمسىز جۇمسالدى.
ەكىنشىدەن, مەكتەپ جاسىنداعى 441 بالا (مادەنيەت باعىتى بويىنشا) جانە 1 173 بالا (سپورت باعىتى بويىنشا) 406 ميلليون 762 مىڭ تەڭگە بيۋدجەت قاراجاتى نەگىزسىز جۇمسالدى.
ۇشىنشىدەن, جەكەلەگەن جەتكىزۋشىلەر پلاتفورمادان بالالار تۋرالى اقپاراتتى الىپ تاستاعان, وقۋ باعدارلاماسى جوق, شىعارماشىلىق ۇيىرمەنى وتكىزۋ كەستەسى تۋرالى تولىققاندى اقپارات ورناتىلماعان.
مەملەكەتتىك اۋديت قورىتىندىسى بويىنشا قارجىلىق بۇزۋشىلىق 473 ميلليون 64 مىڭ تەڭگەنى قۇراسا, بيۋدجەت قاراجاتىن ءتيىمسىز جوسپارلاۋ 10 ميلليارد 739 ميلليون 812 مىڭ تەڭگەنى قۇرادى. سونداي-اق 560 پروتسەدۋرالىق بۇزۋشىلىقتار مەن 16 جۇيەلىك كەمشىلىكتەر انىقتالدى, – دەدى كوميسسيا مۇشەسى.
تەكسەرۋ كوميسسياسى اۋديتورلىق ءىس-شارادا انىقتالعان بۇزۋشىلىقتار مەن كەمشىلىكتەردى جويۋ ءۇشىن تاپسىرمالار مەن ۇسىنىمدار ازىرلەدى.
