ەلورداداعى قر قارۋلى كۇشتەرىنىڭ ۇلتتىق اسكەري پاتريوتتىق ورتالىعىندا كسرو جانە قازاقستان جازۋشىلار وداعىنىڭ مۇشەسى, «ۇلى وتان سوعىسى» وردەنى, «ستالينگرادتى قورعاعانى ءۇشىن» جانە «جاۋىنگەرلىك ەرلىگى ءۇشىن» مەدالدارىنىڭ يەگەرى اسكەن ءنابيۇلىنىڭ 100 جىلدىعىنا ارنالعان «بارمىسىڭدار, ارمىسىڭدار, بابالار!» اتتى ەسكە الۋ كەشى ءوتتى.
اقمولا وبلىسىنىڭ اقكول اۋدانىنداعى قىنا دەگەن اۋىلىندا دۇنيەگە كەلگەن بەلگىلى جازۋشى-جۋرناليست اسكەن ءنابيۇلىنىڭ رۋحىنا ارنالعان وسىناۋ كەش تۋعان جەرىن جاۋدان ازات ەتۋ ءۇشىن 1941 جىلى ورتا مەكتەپتى بىتىرىسىمەن سول جىلدىڭ جەلتوقسانىندا مايدانعا اتتانعان جاس جاۋىنگەردىڭ ستالينگراد مايدانىنا قاتىسىپ, ءبىزدىڭ بەيبىت كۇنىمىز ءۇشىن باسىن قاتەرگە تىككەنى, ەلگە جەڭىسپەن ورالعاننان كەيىنگى ءومىرى مەن شىعارماشىلىعىنان سىر شەرتەتىن بەينەروليكتى تاماشالاۋدان باستالدى. قازاق ۇلتتىق ونەر ۋنيۆەرسيتەتىنىڭ ستۋدەنتتەرى قالامگەردىڭ «قىز تاعدىرى» اڭگىمەسىنەن ءۇزىندى وقىدى.
اسەكەڭنىڭ ۇلى, بەلگىلى كاسىپكەر مارات نابيەۆ مەرەيتوي اياسىندا جازۋشىنىڭ ءومىرى مەن شىعارماشىلىعىنا ارنالعان فوتوكورمە ۇيىمداستىرىلعانىن, الداعى ۋاقىتتا عىلىمي-تاجىريبەلىك كونفەرەنتسيالار, كورمەلەر, رەسپۋبليكالىق ۇزدىك شىعارمالار جانە كوركەمسۋرەت بايقاۋلارى جانە ت.ب. ءىس-شارالار ۇيىمداستىرىلاتىنىن اتاپ ءوتتى.
ەسكە الۋ كەشىندە جازۋشىمەن ءار جىلداردا قىزمەتتەس بولعان كەڭەس وداعىنىڭ باتىرى, قر حالىق قاھارمانى توقتار اۋباكىروۆ, بەلگىلى جۋرناليست, حالىقارالىق «جامبىل» اتىنداعى سىيلىقتىڭ لاۋرەاتى ءبادۋان يماشۇلى, ايتباي جاناتاەۆ, قازاقستاننىڭ ەڭبەك سىڭىرگەن قۇرىلىسشىسى سايلاۋبەك سماعۇلوۆ, عالىم ايسۇلتان قالىباەۆ جانە اسەكەڭنىڭ قارىنداسى كۇلماي نۋكۋشەۆا «اسكەن نابيەۆكە – 100 جىل» مەرەيتويلىق توسبەلگىسىمەن ماراپاتتالدى.
ءىس-شارا بارىسىندا ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ «قورقىت» ەتنو-ءانسامبلى (كوركەمدىك جەتەكشىسى, مادەنيەت قايراتكەرى, كومپوزيتور شولپان قورعانبەك) ونەر كورسەتتى.
