اmanat پارتياسىنىڭ XXIV سەزىندە Amanat پارتياسىنىڭ توراعاسى ەرلان قوشانوۆ پرەزيدەنتتىك سايلاۋعا قاسىم-جومارت توقاەۆتىڭ كانديداتۋراسىن ۇسىندى. «Amanat پارتياسىنىڭ مىندەتى جانە ءبىزدىڭ تاريحي جاۋاپكەرشىلىگىمىز – بارشا قازاقستاندىقتاردى پرەزيدەنتتىڭ وزىق رەفورمالارى توڭىرەگىنە توپتاستىرۋ» دەپ مالىمدەدى ەرلان قوشانوۆ.
ودان كەيىن پارتيا دەلەگاتتارى پىكىر ءبىلدىردى. تاجىريبەلى ۇستاز اياگۇل ميرازوۆا «مەملەكەت باسشىسى ىشكى-سىرتقى ساياساتتا تاجىريبەسى مول, ەلدىڭ وتكەنىن, بۇگىنىن, جاعدايىن تەرەڭ بىلەتىن تاجىريبەلى تۇلعا بولعانىن» قالايتىنىن ايتتى. قازاقستاننىڭ ەڭبەك سىڭىرگەن قايراتكەرى, بەلگىلى بالۋان, وليمپيادا جۇلدەگەرى داۋلەت تۇرلىحانوۆ بۇگىندە ەلىمىزدە ادىلەتتى قوعام قۇرۋ, حالىقتىڭ ۇنىنە قۇلاق اساتىن مەملەكەت قالىپتاستىرۋ باعىتىندا بەلسەندى جۇمىستار جۇرگىزىلىپ جاتقانىن اتاپ ءوتتى.
سەزگە 1200-دەن استام ادام قاتىستى. ولاردىڭ قاتارىندا ساياسي كەڭەستىڭ مۇشەلەرى, پارلامەنت دەپۋتاتتارى, وڭىرلەردەن كەلگەن 700 دەلەگات, سونداي-اق ساراپشىلار, ۇكىمەتتىك ەمەس ۇيىمداردىڭ وكىلدەرى جانە تاعى باسقالار بار.
Amanat-تىڭ كەزەكتەن تىس XXIV سەزى بارىسىندا پارتيانىڭ جاڭا ساياسي تۇعىرناماسى بەكىتىلدى. نەگىزگى يدەولوگيالىق قۇجات دامۋدىڭ نەگىزگى باعىتتارى مەن ساياسي بىرلەستىكتىڭ پرينتسيپتەرىن كورسەتەدى. پارتيا توراعاسى ەرلان قوشانوۆ بۇگىن قابىلدانعان Amanat-تىڭ ساياسي تۇعىرناماسى ۇزاق مەرزىمدى جانە ستراتەگيالىق قۇجات ەكەنىن اتاپ ءوتتى. «جالپى, بۇگىنگى سەزدى تاريحي دەپ ايتۋعا تولىق نەگىز بار. ءبىز پارتيانىڭ جاڭا ساياسي تۇعىرناماسىن قابىلدادىق. تۇعىرنامانىڭ باستى قاعيداسى – ادام, قوعام جانە مەملەكەت. ونداعى پرينتسيپتەر پرەزيدەنتىمىزدىڭ ساياسي رەفورمالارىمەن ۇندەس ءارى ساباقتاس. پارتيا الداعى قىزمەتىندە وسى ۇستانىمداردى باسشىلىققا الادى» دەدى ەرلان قوشانوۆ.
ءوز كەزەگىندە ساياسي تۇعىرنامانى ازىرلەۋ جونىندەگى جۇمىس توبىنىڭ جەتەكشىسى, Amanat پارتياسىنان سايلانعان ءماجىلىس دەپۋتاتى ايدوس سارىم بۇل قۇجاتتا پارتيا قازاقستاننىڭ بولاشاعى تۋرالى يدەياسىن ايقىن كورسەتىپ, ءوزىنىڭ نيەتى مەن ماقساتتارىن بەلگىلەگەنىن اتاپ ءوتتى. «بارلىق وڭىردەن ۇسىنىستار جيناۋ جانە الەۋمەتتىك ساۋالنامالار جۇرگىزۋ ارقىلى پارتيانىڭ ءاربىر مۇشەسىنە قۇجاتقا قاتىستى ءوز پىكىرىن ايتۋعا مۇمكىندىك بەرىلدى. سونىڭ ناتيجەسى رەتىندە, پارتيانىڭ جاڭا قۇجاتى قوعامىمىزدىڭ ءارتۇرلى توپتارىنىڭ كوزقاراستارى مەن مۇددەلەرىن كورسەتەدى. باسقاشا بولۋى مۇمكىن دە ەمەس, ويتكەنى Amanat پارتياسى – قازاقستانداعى ەڭ مىقتى قوعامدىق ينستيتۋت» دەدى حالىق قالاۋلىسى.
Amanat پارتياسىنان ءماجىلىس دەپۋتاتى ەكاتەرينا سمىشلياەۆا ءوز سوزىندە تۇعىرنامادا ۇسىنىلعان تاسىلدەر ساپالى تۇراقتى ەكونوميكالىق ءوسۋدى قامتاماسىز ەتىپ قانا قويماي, قازاقستاننىڭ ءاربىر ازاماتىنىڭ ونىڭ يگىلىگىن كورۋىنە مۇمكىندىك بەرەتىنىن اتاپ ءوتتى.
پارتيانىڭ سولتۇستىك قازاقستان وبلىستىق فيليالىنىڭ اتقارۋشى حاتشىسى اسەم راحمەتوۆانىڭ ايتۋىنشا, اۋىل ەلدىڭ التىن بەسىگى بولسا, اۋىل شارۋاشىلىعى – قازاقستان ەكونوميكاسىنىڭ كۇرە تامىرى.
م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ رەكتورى, پارتيا ساياسي كەڭەسىنىڭ مۇشەسى نۇرلان سەرعاليەۆ قۇجاتتا ءبىلىم مەن عىلىم ەرەكشە ورىن الاتىنىن اتاپ ءوتتى. بەلگىلى ساياساتتانۋشى, پارتيا ساياسي كەڭەسىنىڭ مۇشەسى مارات شيبۇتوۆتىڭ پىكىرىنشە, جاڭا ساياسي تۇعىرناما: «ادام – مەملەكەتتىڭ باستى بايلىعى» يدەياسىنا نەگىزدەلگەن. «بۇل ءتاسىل ادىلەتتى قازاقستاندى قۇرۋ يدەياسىنا سايكەس كەلەدى. قۇجاتتا بايقالعانداي, پارتيا «حالىق ۇنىنە قۇلاق اساتىن مەملەكەت» قاعيداتىن ناقتى ۇستانادى. پارتيانىڭ ماقساتى – ازاماتتىڭ قۇقىقتارى مەن مۇددەلەرى قورعالاتىن, ال ادال ەڭبەك پەن ءبىلىم ءار ادامعا ءوز جوسپارلارىن جۇزەگە اسىرۋعا جانە جەتىستىككە جەتۋگە مۇمكىندىك بەرەتىن دەموكراتيالىق, ادىلەتتى جانە وركەندەگەن مەملەكەت قۇرۋ. ادامدار ءۇشىن وتباسى, دەنساۋلىق, ءبىلىم, جۇمىس ىستەپ لايىقتى تابىس تابۋ, قاۋىپسىزدىك ماڭىزدى» دەدى ول.
سەزد سوڭىندا پارتيا توراعاسى ەرلان قوشانوۆ فورۋم وتەتىنىن حابارلادى. وندا ەلىمىزدىڭ پروگرەسسيۆتى قوعامدىق-ساياسي كۇشتەرى قاسىم-جومارت توقاەۆتى قولداۋ جونىندەگى كواليتسياعا بىرىگەدى.
