استانا قالاسىنىڭ قورشاعان ورتانى قورعاۋ جانە تابيعاتتى پايدالانۋ باسقارماسى «استانا ورمانى» جشس, «استانا ۆەتسەرۆيس» شجق مكك جانە اقمولا وبلىستىق ورمان جانە جانۋارلار دۇنيەسى اۋماقتىق ينسپەكتسياسىنىڭ وكىلدەرىمەن 950 باس كولەمىندە قىرعاۋىلدى ەركىندىككە جىبەردى.
«استانا ورمانى» جشس ديرەكتورىنىڭ ورىنباسارى ارمان مۋكاتوۆتىڭ ايتۋىنشا, ەلوردانىڭ جاسىل بەلدەۋىنە قىرعاۋىلدار جىبەرۋ جىل سايىن جالعاسىپ كەلەدى.
– استاناداعى جاسىل بەلدەۋدىڭ جالپى اۋماعى 14 827 گەكتار. كونستيتۋتسيا مەرەكەسى قارساڭىندا وسى جاسىل بەلدەۋگە 950 قىرعاۋىل جىبەرىلدى. جالپى, جىل سايىن 1 800 قىرعاۋىل ەركىندىككە جىبەرىلەدى. قىرعاۋىلداردى ءوسىرۋ زياندى جاندىكتەرمەن كۇرەسۋگە, جاسىل بەلدەۋ ايماعىنداعى جاعدايدى تابيعي ورماندارعا بارىنشا جاقىنداتۋعا, سونداي-اق, قازاقستاندا قىرعاۋىلداردىڭ مەكەن ەتۋ ارالىن كەڭەيتۋگە مۇمكىندىك بەرەدى, – دەدى ارمان مۋكاتوۆ.
وسىدان ون جىلعا جۋىق ۋاقىت بۇرىن استانانىڭ جاسىل بەلدەۋىندە قىرعاۋىل ءوسىرۋ تۋرالى شەشىم قابىلدانعان بولاتىن. مامانداردىڭ مالىمدەۋىنشە, استانانىڭ جاسىل بەلدەۋىندە بۇل قۇستاردى اسىراۋعا جاساندى ءوسىرۋ جانە جەرسىندىرۋ بويىنشا بيولوگيالىق نەگىزدەمە بار. ايازعا ءتوزىمدى جانە قىستا قوسىمشا جەم بەرۋدى عانا قاجەت ەتەتىن قىرعاۋىلداردى ءوسىرۋ بىرقاتار ماسەلەنى شەشۋگە كومەكتەسەدى جانە رەسپۋبليكامىزدىڭ بيولوگيالىق الۋانتۇرلىلىگىن ساقتاۋعا مۇمكىندىك بەرەدى.
سونىمەن قاتار, زيانكەستەرمەن بيولوگيالىق كۇرەسۋ ارقىلى ورمان ەكپەلەرىن ساقتاۋعا ىقپال ەتەدى. سوڭعىسىنىڭ تيىمدىلىگى جاسىل بەلدەۋدە 2010-2022 جىلدار ارالىعىندا ورمان زيانكەستەرىنە قارسى 350 گا پەستيتسيدتەردى قولدانۋدىڭ ازايۋىمەن راستالدى. قىرعاۋىل سوڭعى ونجىلدىقتاردا استانا قالاسىنان 700 شاقىرىم قاشىقتىقتا ورنالاسقان رەسپۋبليكانىڭ كوپتەگەن وبلىسىندا ايتارلىقتاي تومەندەدى.
«استانا ورمانى» جشس ورمانشىلارى ەركىندىككە جىبەرىلگەن قىرعاۋىلداردى تۇراقتى تۇردە قاداعالاۋ, قاجەت بولعان جاعدايدا قىسقى ۋاقىتتا قوسىمشا قورەكتەندىرىپ قامتاماسىز ەتۋدى جوسپارلاپ وتىر.
