كونستيتۋتسيا كۇنىنە ورايلاستىرىلعان كوركەم گيمناستيكادان كىشى رازريادتار اراسىندا قالا بىرىنشىلىگى باستالدى. Medipol سپورت كەشەنىندە باستاۋ العان ىرىكتەۋ كەزەڭىندە قاراعاندى وبلىسى, استانا, الماتى جانە شىمكەنت قالالارىنان كەلگەن 200-دەن استام جاس گيمناسشىلار باق سىنايدى.
ءىس-شارانىڭ اشىلۋ سالتاناتىنا استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, قالالىق كوركەم گيمناستيكا فەدەراتسياسىنىڭ پرەزيدەنتى سايرانبەك ابىلقايىر قاتىستى.
– سپورتشىلار 3 كۇن بويى گيمناستيكالىق جاتتىعۋلاردى ورىنداپ, شەبەرلىگىن كورسەتەدى. ۇزدىك تانىلعاندارى ەل چەمپيوناتىنا جولداما الادى, – دەيدى سايرانبەك ابىلقايىر.
استانا قالاسىندا گيمناستيكا قارقىندى دامىپ كەلەدى. بۇعان رەسپۋبليكالىق جانە حالىقارالىق بايراقتى باسەكەلەردە تابىستى ونەر كورسەتىپ جۇرگەن ەلوردالىق سپورتشىلاردىڭ جەتىستىگى دالەل بولادى. 13 كوركەم گيمناستيكا مەكتەبى مەن ءبىر بالالار-جاسوسپىرىمدەر وليمپيادالىق دايارلاۋ مەكتەبىندە 3000 اسا گيمناست شەبەرلىگىن شىڭدايدى.
چەمپيوناتتىڭ اشىلۋ سالتاناتى بارىسىندا «سپورت شەبەرىنە ۇمىتكەر» اتاعىمەن بىرنەشە جاس گيمناسشىلار ماراپاتتالدى.
