استانالىق نۇرا اۋدانى اكىمىنىڭ ورىنباسارى رۋسلان ورالوۆ پەن اۋدان اكىمىنىڭ ينسپەكتورى جارقىن ايتجانوۆ «ۇركەر» تۇرعىن الابىنداعى قوعامدىق كەڭىستىكتەردى ارالاپ شىقتى. مەردىگەر ۇيىمدار مەن اۋدان اكىمدىگى قىزمەتكەرلەرىنىڭ قاتىسۋىمەن وتكەن كەزدەسۋدە تۇرعىن الاپتى جاقسارتۋ ماسەلەسى تالقىلاندى.
الدىمەن ك.اقىشەۆ اتىنداعى №69 مەكتەپ-گيمنازياسىنا ات باسىن تىرەگەندەر ءبىلىم مەكەمەسىنىڭ بۇگىنگى جاعدايىمەن تانىستى. بيىل نىسان جانىندا مەكتەپ اۆتوبۋسىنا ارنالعان تۇراق ايماعىن جابدىقتاۋ جوسپارلانۋدا. سونداي-اق مەكتەپكە ىرگەلەس يساتاي باتىر كوشەسىندە اعاش وتىرعىزىلادى.
مەكتەپ جانىنداعى الاڭ دا نازاردان تىس قالعان جوق. ويىن الاڭىنىڭ بارلىق ەلەمەنتى جوندەلىپ, رەتكە كەلەدى.
بيىلدان باستاپ ايعىرجال كوشەسىندەگى سكۆەرگە ەرەكشە نازار اۋدارادى. ەندى قوعامدىق كەڭىستىكتى اۋداندىق اكىمدىك قاراماعىنا الماق. قازىرگى ۋاقىتتا سكۆەردى نۇرا اۋدانى اكىمدىگى اپپاراتىنىڭ بالانسىنا بەرۋ ءۇشىن اكت دايىندالۋدا.
ارالاۋ بارىسىندا اپپارات قىزمەتكەرلەرى مەردىگەر ۇيىمدارعا بىرقاتار تاپسىرما بەردى. سونىمەن قاتار سانيتارلىق تازالاۋدى كۇشەيتۋ جانە جاسىل جەلەكتەردى كۇتىپ ۇستاۋ, بەينەباقىلاۋ كامەرالارىن قوسۋ جانە جارىقتاندىرۋ ماسەلەلەرىنە قاتىستى ەسكەرتۋلەر جاسالدى.
2023 جىلدىڭ اقپان ايىندا تۇرعىن الاپتى دامىتۋدىڭ جول كارتاسى قابىلداندى. قازىرگى ۋاقىتتا «ۇركەر» تۇرعىن الابىندا 2 مەملەكەتتىك مەكتەپ, ينجەنەرلىك جەلىلەر, تروتۋارلار جانە ت. ب. سالىنۋدا. سونداي-اق بيىل اشىلعان دەنە شىنىقتىرۋ-ساۋىقتىرۋ كەشەنىندەگى سپورت ۇيىرمەلەرىنە الاپتىڭ بالالارى اراسىندا ىرىكتەۋ ءجۇرىپ جاتىر.
