«استانا» كونتسەرت زالىندا ءۇش ارىس – ساكەن سەيفۋللين, ءىلياس جانسۇگىروۆ جانە بەيىمبەت ءمايليننىڭ تۋعاندارىنا 125 جىل تولۋىنا ارنالعان «قازاقتىڭ ىرىلەرى» اتتى كەش ءوتتى.
قازاق ادەبيەتى نەگىزى قالانۋىنا ولشەۋسىز ۇلەس قوسقان تۇلعالار قايراتكەرلىك قىرلارىمەن دە بەلگىلى. اتاپ ايتقاندا, ساكەن سەيفۋللين قازاق ونەرىنىڭ ۇلكەن جاناشىرى بولدى. حالىق كوميسسارلارى كەڭەسىنىڭ توراعاسى قىزمەتىندە بولعانىندا ونەر زەرتتەۋشى, ەتنوگراف الەكساندر زاتاەۆيچكە «قازاقتىڭ 1000 ءانى» جيناعىن شىعارۋ ءۇشىن 2480 رۋبل قاراجات بولگىزدى. جارىسسوزگە شىققانداردىڭ: «ونسىز دا جەتكىلىكسىز رەسپۋبليكا بيۋدجەتىن ورىنبورداعى شەبەرحانالاردى جاڭعىرتۋعا, قىزىل اسكەردى قارجىلاندىرۋعا ءبولىنسىن» دەگەندەرىنە قارامادى. ءوزى دە ا.زاتاەۆيچكە ەكى كۇي, ءتورت ءان ورىنداپ بەرىپ, جازدىرادى. بۇدان كەيىن ساكەننىڭ نۇسقاۋىمەن وزگە دە ونەرپازدار ونەر زەرتتەۋشىنىڭ قورجىنىن تولتىردى.
ەلوردانىڭ مەملەكەتتىك اكادەميالىق فيلارمونياسىنىڭ قازاق وركەسترى, حالىق ءانى ءبولىمى, «شالقىما» حالىق بي ءانسامبلى ساكەن, ءىلياس, بەيىمبەتتىڭ ۇلتقا سىڭىرگەن ەڭبەگىن تەاترلاندىرىلعان قويىلىم ارقىلى جان-جاقتى جارقىراتا كورسەتتى. كورەرمەندەردى ساكەننىڭ اندەرى مەن ولەڭدەرىمەن, ءىلياس پەن بەيىمبەتتىڭ جىرلارىمەن سۋسىنداتتى. سونداي-اق ءۇش ارىسقا ارنالعان تۋىندىلاردى ورىندادى. سونىڭ ىشىندە كومپوزيتور مۇراتحان ەگىنباەۆتىڭ اقىن كاكىمبەك سالىقوۆتىڭ ولەڭىنە جازىلعان «ءۇش ارىس» ءانى مەن ابىكەن حاسەنوۆتىڭ «قوڭىر» كۇيى ەرەكشە ورىن الادى.
ءدال وسىنداي كەش «قازاقستان» ورتالىق كونتسەرت زالىندا «ءۇش بايتەرەك» اتاۋىمەن ۇيىمداستىرىلدى. وندا «استانا سازى» ەتنو-فولكلورلىق ءانسامبلى تۇلعالاردىڭ مەرەيتويىنا كونتسەرتىن ارنادى. كونتسەرتكە كەلگەندەر اتالمىش انسامبل مەن اسقار مۇقيات, اياۋلىم قاماجان, دەنيسلامبەك جايلاۋباي سەكىلدى دارىندى انشىلەردىڭ ونەرىنە قول سوقتى.
