ەلورداداعى بەيبىتشىلىك جانە كەلىسىم سارايىندا «ۇلت شامشىراعى – ۇستازدار» اتتى مەرەكەلىك كونتسەرت ءوتتى.
استانا قالاسى ءبىلىم باسقارماسىنىڭ ۇيىمداستىرۋىمەن وتكەن كەشكە وقۋ-اعارتۋ ءمينيسترى اسحات ايماعامبەتوۆ, ەلوردا اكىمى التاي كولگىنوۆ پەن رەسپۋبليكانىڭ ءار ايماعىنان شاقىرىلعان ءبىلىم بەرۋ ۇيىمدارىنىڭ قىزمەتكەرلەرى, ارداگەر ۇستازدار مەن قوعام قايراتكەرلەرى قاتىستى.
وقۋ-اعارتۋ ءمينيسترى اسحات ايماعامبەتوۆ قۇتتىقتاۋ سوزىندە پرەزيدەنت جولداۋىنىڭ مىندەتتەرىن ايتىپ, ۇستاز مارتەبەسىن ارتتىرۋعا باعىتتالعان جۇمىستاردىڭ ماڭىزىن اتاپ ءوتتى.
– مەملەكەت باسشىسى بالاباقشا تاربيەشىلەرىنىڭ مارتەبەسىن كوتەرۋ جانە جۇكتەمەسىن ازايتۋ بويىنشا تاپسىرما بەردى. وسىعان بايلانىستى كەلەسى جىلى قاڭتار ايىنان باستاپ 100 مىڭعا جۋىق تاربيەشىنىڭ جالاقىسى وسەدى. پەداگوگتاردىڭ جالاقىسى 25%-عا كوتەرىلەدى, – دەدى مينيستر.
ءبىلىم بەرۋ سالاسىندا ايانباي ەڭبەك ەتىپ جۇرگەن ۇلاعاتتى ۇستازداردىڭ ەڭبەگىن باعالاپ, قوعامداعى پەداگوگ مارتەبەسىن ارتتىرۋ ماقساتىندا جولداۋدىڭ ورنى ايرىقشا ەكەنىن قالا اكىمى التاي كولگىنوۆ تە اتادى.
– بۇگىنگى كاسىبي مەرەكەلەرىڭىز تمد ەلدەرى پەداگوگتارىنىڭ VII سەزىمەن تۇسپا-تۇس كەلىپ وتىر. پرەزيدەنتىمىز ءبىلىم سالاسىنا ەرەكشە كوڭىل اۋدارىپ كەلەدى. مەملەكەت باسشىسى ءوز جولداۋىندا جاڭا مەكتەپتەر سالۋ جونىندە ارنايى باعدارلاما قابىلدادى. جوسپار بويىنشا جۇمىستار اتقارۋدامىز. سەبەبى ەلوردامىز قارقىندى دامۋ ۇستىندە. جىل سايىن بالالار سانى ارتىپ جاتىر. ماسەلەن, ون جىل بۇرىن مەكتەپتەردە 70 مىڭ بالا وقىسا, قازىردە ولاردىڭ سانى 250 مىڭعا جاقىنداپ قالدى. ولاردىڭ ءبارىن تاربيەلەپ وقىتاتىن وزدەرىڭىز. مەكتەپتەردى سالۋىن سالعانمەن, مۇعالىمدەردى دايىنداۋ كەرەك. سوندىقتان استانا قالاسىندا ارنايى پەداگوگيكالىق ينستيتۋت سالۋ جوسپاردا بار.
ەلوردامىز – باس قالادا سىزدەرگە ارتىلاتىن سالماق ۇلكەن. شىعارماشىل جولدارىڭىزدا قايراتتارىڭىز قاجىماسىن. مەرەكەلەرىڭىز قۇتتى بولسىن! – دەدى قالا اكىمى.
مەرەكەلىك كەشتە ءبىر توپ مۇعالىمدەر «استانا قالاسىنىڭ قۇرمەتتى پەداگوگى», «ءبىلىم بەرۋ ءىسىنىڭ قۇرمەتتى قىزمەتكەرى» جانە ى.التىنسارين اتىنداعى توسبەلگىلەرمەن ماراپاتتالىپ, ۇستازدارعا 1 ملن تەڭگە كولەمىندە ارنايى سەرتيفيكات تابىستالدى.
سولاردىڭ ءبىرى – №82 «دارىن» مامانداندىرىلعان مەكتەپ-ليتسەيىنىڭ فيزيكا ءپانى مۇعالىمى گۇلشارا دۇيسەنوۆا «استانا قالاسىنىڭ قۇرمەتتى پەداگوگى» اتاندى.
– بۇگىن – بارشا مۇعالىمدەر قاۋىمى ءۇشىن ەرەكشە كۇن. ءوز باسىم ءۇشىن بۇل ماراپات كۇتپەگەن سىي بولدى. ۇستازدارعا جاسالعان ەرەكشە مۇمكىندىكتەردىڭ نەگىزىندە جەتىستىككە جەتكەن وقۋشىلارىمدى تاربيەلەي الدىم دەپ ويلايمىن, – دەدى گۇلشارا دۇيسەنوۆا.
مەرەكەلىك كونتسەرتتى قازاقستاننىڭ ەڭبەك سىڭىرگەن قايراتكەرلەرى ارداق بالاجانوۆا, كلارا تولەنباەۆا, «قورقىت» ەتنو-ءانسامبلى مەن «جاستار» تەاترىنىڭ ءارتىستەرى قويىلىممەن اسەمدەي ءتۇستى.
