كوپقاباتتى تۇرعىن ءۇي كەشەندەرى سالىنۋى ءتيىس 20-عا جۋىق ۋچاسكەدە الەۋمەتتىك نىساندار اشىلادى. ولار – مەكتەپتەر, ەمحانالار, قوعامدىق ورىندار (گۇلزارلار, جەلەكجولدار, اۋلالار), بالاباقشالار. بۇل تۋرالى استانا قالاسىنىڭ اكىمى جەڭىس قاسىمبەك ءمالىم ەتتى.
«ر.باعلانوۆا كوشەسى مەن تۇران داڭعىلىنىڭ قيىلىسىندا جەكەمەنشىك قۇرىلىس سالۋشى تۇرعىن ءۇي كەشەنىن سالۋدى جوسپارلاعان. وسى ماسەلەگە بايلانىستى جاقىن ماڭداعى ۇيلەردىڭ تۇرعىندارى بىزگە جۇگىنىپ, اتالعان ورىنعا ساياباق سالۋدى ءوتىندى. ناتيجەسىندە تۇرعىن ءۇي قۇرىلىسىنان باس تارتىلدى, ال «Svoy dom» جەكە ينۆەستورىمەن بىرلەسە وتىرىپ, بۇل ورىنعا قوعامدىق كەڭىستىك سالىندى. گۇلزار ءتۇرلى جاس ساناتىنا ارنالىپ, بىرنەشە ايماققا بولىنگەن: سكەيت ايماعى, تىنىش ايماق, سەرۋەندەۋ ايماعى, بالالار ويىن الاڭى جانە ت. ب. ەكولوگيا ايلىعى اياسىندا تۇرعىندارمەن بىرگە مۇندا اعاشتار وتىرعىزىلادى» دەدى شاھار باسشىسى.
قالا اكىمى ساياباقتى اباتتاندىرۋ جۇمىسى ءارى قاراي جالعاسىن تاباتىنىن دا اتاپ ءوتتى.
«ەسىل وزەنىنىڭ جاعاسىندا, كوسىگين كوشەسىنىڭ اۋدانىندا ەگجەي-تەگجەيلى جوسپارلاۋ جوباسىنا وزگەرىستەر ەنگىزىلدى, كوپپاتەرلى تۇرعىن ءۇي كەشەنi گۇلزارعا, «Copenhagen» تك اۋدانىندا كوپپاتەرلى تۇرعىن ءۇي كەشەنى دە گۇلزارعا اۋىستىرىلدى. «Nova city» تك اۋدانىندا بالاباقشا, «گورودسكوي رومانس» تك اۋدانىندا مەكتەپتىڭ جاڭا عيماراتى, بالاباقشا, گۇلزار جانە ت. ب. سالىندى. سول سياقتى بيىل قاڭتار ايىنان باستاپ قالادا ينجەنەرلىك جەلىلەردىڭ بولماۋى جانە باس جوسپاردىڭ كەلىسىمىنسىز جاڭا قۇرىلىسقا رۇقسات بەرىلمەيتىنىن اتاپ وتكىم كەلەدى» دەدى جەڭىس قاسىمبەك.
