قالا تۇرعىندارىنىڭ ءومىر ءسۇرۋ جاعدايىن جەڭىلدەتۋگە باعىتتالعان اۋقىمدى جوبانىڭ ءبىرى – استانانى گازداندىرۋ. بۇگىندە بۇل باعىتتا اتقارىلىپ جاتقان جۇمىس از ەمەس.
ەلوردا اكىمى التاي كولگىنوۆتىڭ ايتۋىنشا, جەكەمەنشىك تۇرعىن ۇيلەر مەن الەۋمەتتىك نىسانداردى گازعا قوسۋ جۇمىسى جالعاسىپ جاتىر.
– الەۋمەتتىك نىسانداردى گازعا قوسۋدامىز. ەلوردانىڭ ەلدى مەكەندەرىندە اۆتونومدى جىلۋ كوزدەرى ارقىلى جىلىتىلعان الەۋمەتتىك نىساندار بار. ولار اۆتونومدى جىلۋ كوزدەرى ارقىلى, ياعني كومىر نەمەسە بىرنەشە ەسە قىمبات ديزەل وتىنى ارقىلى جىلىتىلدى. قازىرگى كەزدە قالاداعى الماتى جانە سارىارقا اۋداندارىندا ورنالاسقان بارلىعى 20 الەۋمەتتىك نىساننىڭ 13 نىسانى گازعا اۋىستىرىلدى, قالعان 7 نىسان بويىنشا ىسكە قوسۋ-جوندەۋ جۇمىسى جۇرگىزىلۋدە. ولاردىڭ قاتارىندا ەلدى مەكەندەردەگى بىرقاتار كوپقاباتتى تۇرعىن ۇيلەردى جىلىتقان 3 اۋداندىق جىلۋ قازاندىعى دا بار. بۇل وبەكتىلەردى گازعا اۋىستىرۋ ەسەبىنەن جالپى ۇنەمدەۋ جىلىنا 1 ملرد تەڭگەدەن اسادى, – دەدى ا.كولگىنوۆ.
بۇعان دەيىن, ماسەلەن, قالاداعى №40 مەكتەپ ديزەلدىك وتىنمەن جىلىتۋعا جىلىنا 160 ميلليون تەڭگەگە جۋىق قارجى جۇمساسا, ەندى نىساندى گازبەن جىلىتۋعا كوشكەلى بەرى بۇل سوما شامامەن 4 ەسەگە ازايدى. ال «شاراپات» الەۋمەتتىك قىزمەت كورسەتۋ ورتالىعى گازعا قوسىلۋ ارقىلى جىلىنا 60 ميلليوننان استام تەڭگە قاراجاتتى ۇنەمدەپ وتىر.
استانادا گازداندىرىلعان ۇيلەردىڭ سانى كۇن سايىن ارتۋدا. بۇگىندە گازعا 6 مىڭنان استام ءۇي قوسىلدى. سارىارقا جانە الماتى اۋداندارى گازبەن تولىق قامتاماسىز ەتىلدى. ول ءۇشىن 680 كم استام گاز تاراتۋ جەلىلەرى سالىنىپ, ورامىشىلىك جەلىلەر جوندەلدى. ال بايقوڭىر جانە ەسىل اۋداندارىندا گاز قۇبىرىن سالۋ جۇمىستارى جۇرگىزىلۋدە. اعىمداعى جىلى اۋدان قازاندىقتارىنا «تۇران», «تەلمان» جانە «يلينكا» («ۇركەر»), «ءوندىرىس», «تەلمان», «پريگورودنىي», «Family Village», «Garden Village» شاعىن اۋداندارىنا گاز تارتۋ جەلىلەرىنىڭ قۇرىلىسى باستالدى. «شۇبار» شاعىن اۋدانىندا جوبالاۋ جۇمىستارى جۇرگىزىلىپ جاتىر.
– تۇرعىن ۇيلەردى گازعا قوسۋدى جەڭىلدەتۋ ءۇشىن بۇعان دەيىن بىرقاتار شارالار قابىلداندى: ۇيلەردى گازعا قوسۋ ءۇشىن قۇجاتتار ءتىزىمىن ەكى ەسە قىسقارتتىق; حالىقتىڭ مۇقتاج ساناتتارىنا بولەتىن سومانى ەكى ەسە, 430 مىڭ تەڭگەگە دەيىن ۇلعايتتىق; گازدى ەسەپتەۋ اسپاپتارى – ەسەپتەگىشتەر ءۇي يەلەرىنە تەگىن بەرىلۋدە; ءۇيدى گازداندىرۋ ءۇشىن ءبولىپ تولەۋ جانە بانكتەر ارقىلى پايىزسىز نەسيە بەرۋ قاراستىرىلعان. ەلوردانى گازداندىرۋ – مەملەكەت باسشىسىنىڭ باقىلاۋىندا, – دەدى اكىم.
راسىندا دا, تۇرعىن ۇيلەردى كومىرمەن جىلىتۋ ازايعان سايىن تۇرعىنداردىڭ تىرلىگى جايلى بولا باستادى. بۇل قالانىڭ ەكولوگيالىق تازالىعىنا دا ايتارلىقتاي اسەر ەتۋدە.
