1 قىركۇيەكتە 18 مىڭ ءبۇلدىرشىن العاش رەت قوڭىراۋدىڭ ءۇنىن ەستىپ, مەكتەپ تابالدىرىعىن اتتاماق. ءبىرىنشى سىنىپقا باراتىن وقۋشىلارمەن قاتار, 155 مىڭ وقۋشى سالتاناتتى شاراعا قاتىسادى.
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگ بارىسىندا قالالىق ءبىلىم باسقارماسىنىڭ باسشىسى ءانۋار جانعوزين حابارلادى.
جاڭا وقۋ جىلىندا استانالىق وقۋشىلار قالالىق, رەسپۋبليكالىق جانە جەكەمەنشىك باعىنىستاعى 105 مەكتەپتە ءبىلىم الاتىن بولادى. ءبىلىم وردالارىنىڭ بارلىعى وقۋلىقتارمەن 100 پايىزعا قامتىلماق. ول ءۇشىن بيۋدجەتتەن 2,7 ملرد تەڭگە بولىنگەن. قازىرگى تاڭدا وقۋلىقتاردى ەلورداعا جەتكىزۋ جۇمىستارى ءجۇرىپ جاتىر.
ءانۋار جانعوزيننىڭ پىكىرىنشە, مۇعالىمدەردى قاعازباستىلىقتان قۇتقارۋدىڭ جولى – ەلەكتروندى جۋرنال مەن www.kundelik.kz ەلەكتروندى كۇندەلىگى. ونلاين كۇندەلىك اتا-انالارعا بالالارىنىڭ وقۋ ۇلگەرىمىن قاداعالاۋعا مۇمكىندىك بەرەدى. بيىل بۇل جۇيەنىڭ ءموبيلدى قوسىمشاسى دا ىسكە قوسىلماق.
باسقارما باسشىسى قالا اكىمى اسەت يسەكەشەۆتىڭ تاپسىرماسىمەن ءبىلىم بەرۋ جۇيەسىن قارجىلاندىرۋ سوڭعى 2 جىلدا ەداۋىر ۇلعايعانىن ايتتى. ماسەلەن, بىلتىر بولىنگەن قارجى 54 ملرد تەڭگەنى قۇراسا, بيىل 65 ملرد تەڭگەگە دەيىن ءوستى. اكىمدىك ءبىلىم بەرۋ نىساندارىن قاجەتتى دەڭگەيدە قامتاماسىز ەتۋ, جوندەۋ جۇمىستارى جانە قوسىمشا ءبىلىم بەرۋ جۇيەسىنە باسىمدىق بەرىپ وتىر.
ايتسە دە, بۇل قارجى مەكتەپتەردەگى ءۇش اۋىسىمدى وقىتۋ ماسەلەسىن تۇبەگەيلى شەشۋگە جەتكىلىكسىز كورىنەدى. الدىڭعى وقۋ جىلىندا ءۇش اۋىسىمدى 11 مەكتەپ بولعان ەدى. ال بيىل بۇل تۇيتكىل قالاي شەشىمىن تاپپاق؟ سۇراققا ءانۋار جانعوزين «وقۋ وردالارىنىڭ قۇرىلىسى قارقىندى. بيىل 6 مەكتەپتىڭ عيماراتى پايدالانۋعا بەرىلەدى. كەلەر جىلى تاعى 5 مەكتەپ سالىنادى جانە 6 مەكتەپتىڭ جانىنان قوسىمشا عيمارات تۇرعىزىلادى. قازىرگى تاڭدا ۇكىمەتپەن 24 مەكتەپتىڭ جانە 10 قوسىمشا عيماراتتىڭ قۇرىلىسى بويىنشا كەلىسسوزدەر جۇرگىزىپ جاتىرمىز. وسىلايشا, الداعى 4 جىلدا مەكتەپتەرگە تۇسەتىن جۇكتەمەنى ازايتقىمىز كەلەدى» دەپ جاۋاپ بەردى.
ال بيىلعى وقۋ جىلىنىڭ جاڭالىعى قالالىق ءبىلىم وردالارىندا جان باسىنا قارجىلاندىرۋ ءادىسى ەنگىزىلەتىنى بولماق.
