بيىل «Egemen Qazaqstan» گازەتىنە تۇپ-تۋرا 100 جىل تولادى. «ۇشقىن» دەگەن اتاۋمەن العاش شىققان باسىلىمنىڭ عاسىرلىق تويى قارساڭىندا ءبىراز ءىس-شارا جوسپارلانىپ وتىر.
ونىڭ العاشقىسى بولىپ باس قالامىزداعى ەسىل اۋدانىنداعى اللەيادا 100 ءتۇپ اعاش ەگىلدى. «ءجۇز جىلدىققا – ءجۇز اعاش» اتتى جيىنعا ءماجىلىس دەپۋتاتتارى, ارداگەر جۋرناليستەر, باق باسشىلارى, اقپارات جانە قوعامدىق دامۋ ءمينيسترى داۋرەن اباەۆ قاتىستى.
– «Egemen Qazaqstan» گازەتىنىڭ مەرەيتويى اياسىندا ءوتىپ جاتقان ءار ءىس-شارانىڭ ماڭىزى وتە زور. مىنە, نۇر-سۇلتان قالاسىنىڭ تورىندە ءجۇز كوشەت وتىرعىزۋ ءۇشىن باس قوستىق. «بابالار ەككەن شىناردى بالالار سايالايدى» دەيدى عوي, سوندىقتان دا بۇگىن وتىرعىزىلاتىن اعاشتارىمىز ۇلكەن ساياباققا اينالسىن! ءوسىپ كەلە جاتقان ۇرپاق بۇل ساياباقتى بىزدەر «Egemen Qazaqstan» گازەتىنىڭ قۇرمەتىنە ەككەنىمىزدى ءبىلىپ ءجۇرسىن», دەدى داۋرەن اباەۆ اعاش ەگۋ شاراسىندا.
تاڭەرتەڭنەن باستالعان يگىلىگى مول شارا اۋىزاشار ۋاقىتىندا ۇلتتىق مۋزەي عيماراتىندا جالعاسىن تاپتى. حالىقارالىق مۋزەي كۇنى مەرەكەسىنە وراي ۇيىمداستىرىلعان كورمەگە جينالعان جۇرت قاراسى مول بولدى. «ءجۇز جىلدىق جىلناما» اتتى كورمەدە جۇرتشىلىق نازارىنا گازەتتىڭ وتكەن تاريحىنان سىر شەرتەتىن ءتۇرلى جادىگەرلەر ۇسىنىلدى. ولاردىڭ اراسىندا «ۇشقىن» دەگەن اتاۋمەن جاريالانعان گازەتتىڭ العاشقى نۇسقالارى, اق-قارا تۇستە عانا تۇسىرەتىن فوتواپپاراتتار, 1904 جىلعى «Continental Wanderer» اتتى جازبا ماشيناسى سەكىلدى ءتۇرلى تاريحي جادىگەرلەر بار. كورمە 18 ماۋسىمعا دەيىن جالعاسادى.
