قازاقتىڭ ۇلتتىق ءبيى «ورتەكە» يۋنەسكو-نىڭ تىزىمىنە ەنگىزىلەدى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى. مينيسترلىك مالىمەتىنشە, ساراپشىلاردان قۇرالعان كوميسسيا ۇلتتىق ءبيدى يۋنەسكو-نىڭ تىزىمىنە قوسۋ ۇسىنىسىن 2019 جىلى جاساعان.
«قانداي دا ءبىر مۇرانى اتالعان ۇيىمنىڭ تىزىمىنە ەنگىزۋ ءۇشىن قاتىسۋشى ەل بىرقاتار تالاپتاردى ورىنداۋى كەرەك. ەڭ الدىمەن, مەملەكەت تانىستىرۋ بەينەروليگىن اعىلشىن جانە فرانتسۋز تىلدەرىندە ءتۇسىرىپ يۋنەسكو-نىڭ باس شتابىنا ۇسىنىس جولدايدى. ماتەريالدىق ەمەس مادەني مۇرانى ساقتاۋ جونىندەگى ۇكىمەتارالىق كوميتەت مۇشەلەرى ۇسىنىستى قاراستىرىپ, شەشىمدى داۋىس بەرۋ ارقىلى قابىلدايدى. ماسەلەن, ءبىز «ورتەكە» ءبيىن ۇكىمەتارالىق كوميتەت قاراۋىنا 2019 جىلى ۇسىندىق. دەگەنمەن ونى يۋنەسكو تاراپىنان ىلگەرىلەتۋ پروتسەسى بيىل عانا باستالدى» دەپ ءمالىم ەتتى مينيسترلىكتىڭ ءباسپاسوز قىزمەتى.
قازاقتىڭ ەتنومۋزىكا جانە ەتنوتەاتر سالاسىنداعى زەرتتەۋلەرىندە «ورتەكە» ونەرى تۋرالى دەرەكتەر از. دەگەنمەن كەيبىر عالىمداردىڭ ەڭبەكتەرىندە «ورتەكەنىڭ» 3 مىڭ جىلدان استام ۋاقىت بۇرىن پايدا بولعانى كورسەتىلگەن. بەلگىلى مۋزىكاتانۋشى عالىم احمەت جۇبانوۆ
قازاقتىڭ قۋىرشاق تەاترى ءوز باستاۋىن وسى ونەردەن الاتىنىن اتاپ وتكەن. سونىمەن قاتار بۇل تۋرالى عالىم الكەي مارعۇلاننىڭ, بەلگىلى كۇيشى جانە زەرتتەۋشى ابدۋلحاميت رايىمبەرگەنوۆتىڭ, مۇرات وسكەمباەۆتىڭ جازبالارىندا كەزدەسەدى. بۇدان باسقا «ورتەكە» ەجەلگى قولدانبالى ونەر شەبەرلەرىنىڭ ەڭبەكتەرىنە ارقاۋ بولعان. وعان دالەل – تامعالى, ەشكىولمەس, كۇلجاباسى سياقتى ەڭ كونە ەسكەرتكىشتەردە بەينەلەنگەن پەتروگليفتەر. وسىلاردى ەسكەرە كەلە, اتالعان ونەر يۋنەسكو-نىڭ ماتەريالدىق ەمەس مۇراسىنىڭ تىزىمىنە ەنگىزۋگە ناقتى لايىق دەپ ەسەپتەلدى.
ۆەدومستۆو 2013 جىلدان باستاپ قازاقستاننىڭ ماتەريالدىق ەمەس مادەني مۇرالارىنىڭ ۇلتتىق ءتىزىمىن جاساۋ, ونى يۋنەسكو-عا ەنگىزۋ جۇمىستارىن جۇرگىزىپ كەلەدى. وسى ۋاقىتقا دەيىن قازاق حالقىنىڭ 11 مادەني مۇراسى ۇيىمنىڭ تىزىمىنە كىردى.
