ەلوردا تورىندە ءدۇيىم ەلدىڭ باسىن قوسقان كورمەگە 205561 ادام كەلگەن. ولاردىڭ 26 مىڭنان استامى – شەتەلدىك قوناقتار. جالپى, العاشقى ون كۇن ىشىندە كورمەگە كىرىپ-شىعۋ كورسەتكىشى 1 ميلليون 57 مىڭنان اسقان.
ۇيىمداستىرۋشىلاردىڭ ايتۋىنشا, «نۇر الەم» – كەلۋشىلەردى ەڭ كوپ قابىلداعان ۇلتتىق پاۆيلون. سونىمەن قاتار, قىتاي, بىرىككەن اراب امىرلىكتەرى, ءۇندىستان, مالايزيا, وزبەكستان, تۇركيا رەسەي, تايلاند جانە جاپونيا پاۆيلوندارى تانىمالدىق بويىنشا كوش باستاپ تۇر. وسى ۋاقىتقا دەيىن ەكسپو قالاشاعىندا 281 مادەني, ويىن-ساۋىق, ىسكەرلىك شارالار وتكىزىلگەن ەكەن.
«استانا ەكسپو-2017» ۇلتتىق كومپانياسىنىڭ كوممەرتسيالاندىرۋ دەپارتامەنتىنىڭ ديرەكتورى داۋلەت ەركىمباەۆتىڭ ايتۋىنشا, كورمە اۋماعىندا ساتىلعان كادەسىيلاردىڭ قۇنى 28 ملن تەڭگەنى قۇراعان. وسى ۋاقىتقا دەيىن 1,5 ملن بيلەت ساتىلسا, قوعامدىق تاماقتانۋ ورىندارىندا 80 ملن تەڭگەنىڭ ازىق-تۇلىك ونىمدەرى تۇتىنىلعان. قاۋىپسىزدىك ماسەلەسى تۋرالى ءسوز العان ۇلتتىق كومپانيانىڭ قاۋىپسىزدىك دەپارتامەنتىنىڭ ديرەكتورى رۇستەم چاكەنوۆ كورمە كەزىندە ەشقانداي ءتارتىپ بۇزۋشىلىق تىركەلمەگەنىن العا تارتتى.
گۇلميرا ايماعانبەت
