«ەكسپو-2017» حالىقارالىق مامانداندىرىلعان كورمەسى وتاندىق ءتۋريزمنىڭ تارتىمدىلىعىن ارتتىرۋعا ۇلكەن سەپ بولدى. بۇل تۋرالى استانا قالاسى ينۆەستيتسيالار جانە دامۋ باسقارماسىنىڭ باسشىسى الىشەر ابدىقادىروۆ ءباسپاسوز ماجىلىسىندە مالىمدەدى.
– «ەكسپو» كورمەسىن وتكىزۋىمىزدىڭ ارقاسىندا قىزمەت كورسەتۋ سالاسى مەن قالاداعى ينفراقۇرىلىم جاڭا دەڭگەيگە كوتەرىلىپ, تۋريستىك سەكتور جاندانا ءتۇستى. رەسمي دەرەكتەرگە سايكەس, 10 ماۋسىمنان 10 قىركۇيەككە دەيىن ەلورداعا 1,5 ملن ادام كەلگەن. ونىڭ 600 مىڭعا جۋىعى حالىقارالىق قاتىناس رەتىندە تىركەلگەن. سودان بولار, قوناقۇيلەرگە كەلۋشىلەردىڭ سانى ءۇش ەسەگە ارتقان. ال قوناقۇي مەن قوعامدىق تاماقتانۋ ورىندارىنان تۇسكەن سالىق مولشەرى بيىلعى جىلدىڭ تامىز ايىندا 170 ميلليون تەڭگەدەن اسقان, – دەدى ءا.ابدىقادىروۆ.
ونىڭ ايتۋىنشا, بىلتىرعى جىلمەن سالىستىرعاندا تۋروپەراتورلاردىڭ قىزمەتىنە سۇرانىس 78 پايىزعا ارتقان. ال Astana City Pass تۋريست كارتاسىن 30 مىڭعا جۋىق ادام قولدانعان. كورمە كەزىندە اۆستريا, مالايزيا, سينگاپۋر, رەسەي, تۇركيا, قىتاي, يسپانيا, پولشا سياقتى 13 ەلدەن كەلگەن 12 مىڭ ادام اۋديوگيدتى پايدالاندى.
– ەندى وسى كورسەتكىشتەردى ساقتاپ قالۋ ءۇشىن ءبىز جاڭا ستراتەگيا ويلاستىردىق. باستى ماقسات – 2020 جىلعا قاراي ەلورداعا كەلەتىن شەتەلدىك تۋريستەردىڭ سانىن 1 ميلليونعا دەيىن جەتكىزۋ. ول ءۇشىن حالىقارالىق مامانداردىڭ كومەگىمەن ءۇش باعىتتى ايقىنداپ الدىق. ءبىرىنشى باعىت – كونگرەستىك-ىسكەرلىك تۋريزم. ەلوردانىڭ ينفراقۇرىلىمى اۋقىمدى جيىندار مەن حالىقارالىق دارەجەدەگى كورمەلەردى وتكىزۋ ءۇشىن قولايلى. ەكىنشىسى – قالاداعى رەكرەاتسيالىق تۋريزم. ياعني, حالىق كوپ شوعىرلاناتىن تارتىمدى جەرلەردى كوبەيتۋ كەرەك. سوڭعىسى – مەديتسينالىق ءتۋريزمدى دامىتۋ. ءبىزدىڭ مامانداردىڭ كاسىبيلىگى شەتەلدىك ەم الۋشىلاردى تارتۋى مۇمكىن, – دەپ ءسوزىن قورىتىندىلادى باسقارما باسشىسى.
گۇلدانا تالعاتقىزى
