2021 جىلى اتاپ وتىلەتىن قر تاۋەلسىزدىگىنىڭ 30 جىلدىعىنا وراي ەلوردادا «30 يگى ءىس» ۇرانىمەن الەۋمەتتىك جانە قايىرىمدىلىق ءىس-شارالارى ۇيىمداستىرىلدى. ونىڭ اياسىندا جالعىزباستى زەينەتكەرلەر مەن ارداگەرلەرگە, كوپبالالى جانە مۇقتاج وتباسىلارعا, سونداي-اق ومىردە قيىن جاعدايعا تاپ بولعان ادامدارعا قولداۋ ءبىلدىرىپ, كومەك كورسەتتى.
قايىرىمدىلىق جارىسىنا ايەلدەر ءىسى جانە وتباسىلىق-دەموگرافيالىق ساياسات جونىندەگى كوميسسيا قوسىلىپ, رەسمي وكىلدەرى «انا ءۇيى» قوعامدىق قورىنىڭ انالار ۇيىنە باردى. كەزدەسۋ بارىسىندا بىرقاتار ماسەلەلەر شەشىلدى.
جوباعا بەلسەنە قاتىسقان «استانا جاستارى» جاستار رەسۋرستىق ورتالىعىنىڭ 500-گە جۋىق ەرىكتىلەرى جالعىزباستى ارداگەرلەر مەن زەينەتكەرلەرگە اۋلاسىنان قار شىعارىپ, وتىن كىرگىزىپ, اعاش جارىپ, قولعابىس بەردى. كومەككە مۇقتاج جانە كوپبالالى 100 وتباسى, مۇمكىندىگى شەكتەۋلى ادامدار, زەينەتكەرلەر, ارداگەرلەر جاستارعا العىسىن ءبىلدىردى. ارقايسىنا شامامەن 30 كەلى ازىق-تۇلىك سالىنعان سەبەتتەردى جەتكىزىپ بەردى. سونداي-اق اكتسيا اياسىندا جاستار قىستا كوممۋنالدىق قىزمەتكەرلەرى مەن قالا تۇرعىندارىنا ەلوردا كوشەلەرىندە ىستىق شاي مەن باۋىرساقتار تاراتتى.
«جاس سارباز» بالالار مەن جاسوسپىرىمدەر قوزعالىسىنىڭ تاربيەلەنۋشىلەرى دە بۇل يگى ءىستى قولدادى. ولار قورعانىس مينيسترلىگىنىڭ اسكەري دارىگەرلەرىنە 30 ازىق-تۇلىك جيىنتىعىن بەردى. ءىس-شارا قازاقستان قارۋلى كۇشتەرىنىڭ اسكەري-پاتريوتتىق ورتالىعى مەن Magnum ساۋدا ورتالىعىنىڭ قولداۋىمەن ءوتتى.
نۇر-سۇلتان قالاسىنداعى «رۋحاني جاڭعىرۋ» جوبالىق كەڭسەسى وكىلدەرى №90 مەكتەپ-گيمنازياسىنا 30 كىتاپ سىيلادى.
«كىتاپ – بالانى دامىتاتىن نەگىزگى قۇرالداردىڭ ءبىرى. سوندىقتان مەكتەپكە ءۇش تىلدە جازىلعان 30 كىتاپ بەرەمىز. الداعى ۋاقىتتا بۇل يگى ءىستىڭ جالعاساتىنىنا سەنىمدىمىن» دەپ اتاپ ءوتتى «رۋحاني جاڭعىرۋ» جوبالىق كەڭسەسى ديرەكتورىنىڭ ورىنباسارى جازيرا ناريمانقىزى. قازاقستان حالقى اسسامبلەياسىنىڭ وكىلدەرى «پاراسات» قايىرىمدىلىق ورتالىعىمەن بىرلەسە وتىرىپ, مۇقتاج 50 وتباسىنا ازىق-تۇلىك سەبەتتەرىن تاراتتى.
