وتكەن دەمالىس كۇندەرى اقتوبە وبلىسىنىڭ اۋىلشارۋاشىلىعى جارمەڭكەسىندە استانالىقتار ىرعىزدىڭ بالىعىن, شالقاردىڭ ەتىن, مارتوكتىڭ ءسۇتىن, ويىلدىڭ تارىسى مەن مايقۇرتىنا قارىق بولدى. ەكى كۇنگە سوزىلعان شارادا 300 توننا ءونىم ساتىلدى.
«قازاقستان» سپورت كەشەنى الاڭىندا وتكەن جارمەڭكەگە 6 اۋدان مەن اقتوبە قالاسىنىڭ 50-دەن استام تاۋار وندىرۋشىلەرى قاتىستى. ولار 124 توننا ەت, 26 توننا كارتوپ پەن كوكونىس, 27 توننا ءسۇت ونىمدەرى, 15 توننا وسىمدىك مايى, 21 مىڭ دانا جۇمىرتقا, 30 توننا شۇجىق ونىمدەرى جانە 50 توننادان استام باسقا دا ازىق-تۇلىك اكەلگەن.
بازار باعاسىنان 10-15% تومەن ساتىلعان جارمەڭكەدە ەلوردالىقتاردىڭ قاراسى كوپ بولدى. «ەكسپو-2017» كورمەسى اياسىندا ءوتىپ جاتقان جارمەڭكەگە وبلىستىڭ «ايس+», «مولوچنىە يستوري-ا», «اندي», «شىڭعىس», «قوستەمىر», «رامازان», «جاڭا-ءالجان ديىرمەن كومبيناتى», «اقتوبە-نان», «روكوس» جانە تاعى باسقا قايتا وڭدەۋ كاسىپورىندارى قاتىستى. ءىس-شارا اقتوبە وبلىسىنىڭ ءبيشى, ءانشى ارتىستەرىمەن ۇيىمداستىرىلعان كونتسەرتتىك باعدارلاماعا ۇلاستى.
